Marcos 9

1Tsaypitanami Jesús kayno nirqan: <<Rasunpami kayno nï: Manaraqpis wanurmi wakinniki rikapäkunki Tayta Dios mandaykashqan munayninwan shamuqta>>.

Jesús chipchipyaykaq rikakushqan

Mateo 17.1-13; Lucas 9.28-36

2Tsaypita soqta junaqtami Pedruta, Santiaguta y Juanta pushakurkur Jesús witsarqan altunnin jirkaman. Tsaychömi paykuna rikaykaptin Jesús jukniraqman tikrarqan. 3Röpanpis [rajuno] pasaypa yoraq rikakurmi chipchipyarqan. Mayjina taqsharpis manami pipis tsaynöqa yoraqätsintsu. 4Tsaychömi rikapäkurqan Moisésta y Elíasta Jesúswan parlarkaykaqta.

5Tsawraqa Jesústa Pedro kayno nirqan: <<Alipaqmi kaycho karkaykä, rabí. Kimsa tsuklata rurapäkushaq: jukta qampaq, jukta Moiséspaq y jukta Elíaspaq>>.

6Mantsakashqa karmi mana yarpachakuypa Pedro tsayno parlarqan.

7Tsayno parlaykaptinmi pukutay tsapakurkurqan. Pukutay rurinpitami Tayta Dios kayno nimurqan: <<Paymi kuyay Tsurï.#Mat. 3.17; Mar. 1.11; Luc. 3.22. Pay nishushqaykita wiyakäriy>>.

8Tsayno nimuptin yapay rikärir pitapis manami rikapäkurqannatsu, sinöqa Jesús japalatanami.

9Jirkapita uraykämushqanchömi Jesús kayno nirqan: <<Puntacho rikapäkushqaykita pitapis ama wilapankiraqtsu. Runapa Tsurin wanushqanpita kawarimuptinraq wilakärinki>>.

10Tsayno niptinmi pitapis mana wilaparqantsu. Kikinpurami itsanqa parlapäkurqan kayno nir: <<Wanushqanpita kawarimunanpaq kashqanta parlarqa ¿imapitaraq parlaykan?>>

11Tsaymi Jesústa tapurqan kayno nir: <<¿Imanirtaq ley yachatsiqkuna nipäkun Cristo shamunanpaqqa puntata Elíasraq shamunanpaq kashqanta?>>#Mal. 4.5-6.

12Niptinmi Jesús kayno nirqan: <<Elías rasunpami puntata shamunqa lapanta kamakätsinanpaq. Tsayno kaptinpis Diospa palabrancho niykan Runapa Tsurinta chikir fiyupa nakatsinanpaq kashqantami. 13Itsanqa Elías maynami shamushqa.#Mat. 11.14. Tayta Diospa palabrancho qelqaraykashqannölami payta wanutsipäkurqan>>.

Juk mözuta Jesús aliyätsishqan

Mateo 17.14-20; Lucas 9.37-43a

14Jirkapita urämurmi tarirqan ley yachatsiqkunawan wakin discïpulunkuna rimanakurkaykaqta. Paykunatami atska runakuna juntaparaykarqan. 15Jesústa rikarmi runakuna kushikushpan warakayla aywar winchikärirqan. 16Tsaychömi discïpulunkunata Jesús nirqan: <<¿Imanirtaq ley yachatsiqkunawan rimanakurkaykanki?>>

17Tsaymi juk runa kayno nirqan: <<Rabí, supay upayätsishqan tsurïtami aliyaykatsinaykipaq apamushqä. 18Tsurïta supay elaqpitami pampaman saqtarin, poqshaytapis aqtutsin y kiruntapis uchutsin. Tsarishqan hörami qeruno chukru rikakun. Tsaymi supayta qarqunanpaq discïpuluykikunata ruwakuptïpis mana kamäpakushqatsu>>.

19Tsayno niptinmi Jesús kayno nirqan: <<¡Yärakuyniynaq runakuna! ¡Imayyaqraq qamkunawan kaykäshaq! ¡Imayyaqraq qamkunata awantashayki! Mä tsay mözuta apapäkamuy>>.

20Tsayno niptinmi mözuta apaparqan. Jesústa rikärir supay saqtariykuptinmi mözuqa poqshayta aqtur qochparqan. 21Tsaymi mözupa papäninta Jesús tapurqan: <<¿Imaypitanataq supay nakatsin?>>

Tsawraqa papänin kayno nirqan: <<Wamra kashqanpita patsami. 22Atska kutimi wanutsiyta munashpan ninamanpis yakumanpis saqtan. Kuyapämashpaykiqa tsurïta aliyaykatsilay, tayta>>.

23Tsayno ruwakuptinmi Jesús kayno nirqan: <<¿Imanirtaq <puëdirqa> nimanki? Rasunpa yärakamaptikiqa manami imapis sasatsu>>.

24Tsayno niptinmi mözupa papänin jukla kayno nirqan: <<¡Aw, yärakümi! Mas yärakunäpaq yanapaykalämay>>.

25Atska runakuna bururuyla aywaykämuqta rikarmi tsay mözucho kaykaq supayta Jesús olqüpar kayno nirqan: <<¡Upayätsiq supay! ¡Kay mözupita jukla yarquy! ¡Kananpitaqa ama payman kutiynatsu!>>

26Tsaymi tsay supay qaparar mözuta yapay saqtarqan. Tsaypita yarqurirmi wanushqatano kachariykur supay aywakurqan. Mözu jitaraykaqta rikarmi runakuna nipäkurqan wanushqana kaykashqanta. 27Tsayno kaptinpis makipita tsarirkurmi aliyashqatana Jesús sharkatsirqan.

28Tsaypita juk wayiman Jesús yaykuptinmi discïpulunkuna tapurqan kayno nir: <<Noqakunaqa ¿imanirtaq tsay supayta qarquyta mana kamäpakärishqätsu?>>

29Tsawraqa Jesús kayno nirqan: <<Tsay niraq supaytaqa [ayunar] Tayta Diosta manakurraqmi qarqapäkunki>>.

Wanunanpaq kashqanta yapay wilakushqan

Mateo 17.22-23; Lucas 9.43b-45

30Tsaypita aywakurmi discïpulunkunawan pasarqan Galileapa. Discïpulunkunalata yachatsiyta munarmi mayman aywashqantapis runakuna musyananta munarqantsu. 31Discïpulunkunata yachatsirmi Jesús kayno nirqan: <<Runapa Tsurinta chikiqninkunapa makinmanmi entreganqa. Wanutsiptinpis kimsa junaqtami kawarimunqa>>.

32Tsayno wilaptinpis discïpulunkuna manami tantiyarqantsu imata niykashqantapis. Mana tantiyarpis tapuytami itsanqa mantsakärirqan.

Wamrano kanantsipaq Jesús tantiyatsishqan

Mateo 18.1-5; Lucas 9.46-48

33Tsaypita Capernaúm markaman chayaykur wayicho kaykashpannami discïpulunkunata Jesús tapurqan kayno nir: <<Nänipa shamur ¿imapitataq parlarkaykashqanki?>>

34Mas mandaq kayta qechunakur rimanakushqa karmi tapuptinpis upälakärirqan.#Luc. 22.24. 35Tsaypitanami Jesús jamaykushpan chunka ishkay discïpulunkunata qayaykur kayno nirqan: <<Mayqanpis mas mandaq kayta munarqa lapanpitapis mas humildi kar ashmaynöla pïmaytapis yanapatsun>>.#Mat. 20.26-27; 23.11; Mar. 10.43-44; Luc. 22.26.

36Nirkurnami lapanpa chawpincho juk wamrata marqarkur kayno nirqan: 37<<Kay wamrano kaqkunata noqapa jutïcho pipis chaskirqa noqatami chaskiykäman. Noqata chaskikamarqa kachamaq Taytätapis chaskikurkaykanmi>>.#Mat. 10.40; Luc. 10.16; Juan 13.20.

Supayta qarquptin mana michänanpaq Jesús yätsishqan

Lucas 9.49-50

38Tsaypitanami Juan kayno nirqan: <<Rabí, noqakuna rikapäkushqä juk runa jutikicho supaykunata qarquykaqta. Noqantsiwan mana puriptinmi michäpäkushqä>>.

39Tsawraqa Jesús kayno nirqan: <<Ama michankitsu. Pipis jutïcho milagruta ruraq kaqqa manami conträ rimaykanqatsu. 40Contrantsi mana karqa favornintsimi kaykan.#Mat. 12.30; Luc. 11.23. 41Rasunpami kayno nï: Discïpulü kashqaykipita pipis juk pucillu yakulatapis makyashushpaykiqa premiutami chaskinqa>>.#Mat. 10.42.

Jutsaman pitapis mana ishkitsinanpaq Jesús nishqan

Mateo 18.6-9; Lucas 17.1-2

42<<Pipis noqaman yärakamaq juk wamralatapis jutsata ruratsiptinqa mas alimi kanman mulinu rumita kunkanman wataparkur lamarman qarpuriptin. 43Makiki jutsata ruratsishuptikiqa roquriykuy. Imaypis mana upiq ninaman ishkay makiyuq qaykushqa kanaykipa trukanqa mas alimi kanman juk makiyuqlapis mana ushakaq kawayta chaskiptiki.#Mat. 5.30. 44[Infiernuchöqa runata ushakätsiq kurukuna imaypis manami wanunqatsu. Ninapis manami imaypis upinqatsu.]

45<<Chakikipis jutsata ruratsishuptikiqa roquriykuy. Infiernuman ishkay chakiyuq qaykushqa kanaykipa trukanqa mas alimi kanman juk chakiyuqlapis mana ushakaq kawayta chaskiptiki. 46[Infiernuchöqa runata ushakätsiq kurukuna imaypis manami wanunqatsu. Ninapis manami imaypis upinqatsu.]

47<<Nawikipis jutsata ruratsishuptikiqa oqtiriykuy. Infiernuman ishkay nawiyuq qaykushqa kanaykipa trukanqa mas alimi kanman juk nawilaykiwanpis Tayta Dios mandaykashqanman yaykuptiki.#Mat. 5.29. 48Infiernuchöqa runata ushakätsiq kurukuna imaypis manami wanunqatsu. Ninapis manami imaypis upinqatsu.#Isa. 66.24.

49<<Sacrificiuta kachitsarkur#Lev. 2.13; Eze. 43.24. rupatsishqannömi lapan runakunapis ninapa pasaqno nakapäkunqaraq. 50Kachiqa alimi kaykan. Qamyakäkurmi itsanqa imapaqpis mana välinnatsu.#Mat. 5.13; Luc. 14.34-35. Runa mayikiwan kuyanakur ali kawarqa qamkunapis kachinömi kanki>>.

Currently Selected:

Marcos 9: qvmB

Highlight

Copy

Compare