Marcos 7

Runakuna lutankunata yarpar impüru rikakushqan

Mateo 15.1-20

1Juk kutimi fariseukuna y ley yachatsiqkuna Jerusalénpita aywapäkurqan Jesús kaqman. 2Tsaychömi rikarqan Jesúspa discïpulunkuna makinta mana maylakuylapa mikurkaykaqta. 3Fariseukuna y Israel mayinkunaqa unay aylunkunapa costumbrinkunata cumplirmi mikunanpaq makintaraq imaypis maylakärin. Mana maylakurqa manami mikupäkuntsu.#7.3 Manami makinkuna limpiu kananpaqtsu maylakäriq, sinöqa costumbrinta cumplir püru kananpaqmi. Püru kananpaqmi ichikla yakuta makinman winakuq. Tsaypita masta musyanaykipaq liyinki Lev. 11.32; 15.4-12; Núm. 19.18. 4Tsay costumbrikunata cumplirmi pucillukunatapis, wichikunatapis, mankakunatapis [y catrikunatapis] maylapäkun. Tsaynömi rantipakushqanpita kutirpis mikunanpaqqa armakärin. Tsaynölami mas wakin costumbrinkunatapis cumplipäkun. 5Tsaymi fariseukuna y ley yachatsiq runakuna Jesústa tapupäkurqan kayno nir: <<¿Imanirtaq discïpuluykikuna unay ayluntsikunapa costumbrinkunata mana cäsuypa impüru makiwan mikupäkun?>>

6Tsayno niptinmi Jesús kayno nirqan: <<¡Ishkay cära runakuna! Rasuntachari Isaías qamkunapaq kayno qelqarqan:

<< <Kay runakunaqa shimilanwanmi respitapäkaman.

Shonqunchöqa manami yarpaylapis yarpämantsu.

7Nishqäta yachatsinanpa trukanqa runakuna nishqalantami yachatsipäkun.

Tsaymi manakaqlapaq adorapäkamanpis>.#Isa. 29.13.

8<<Isaías nishqannölami qamkunapis Tayta Diospa mandamientunkunata cäsukärinaykipa trukanqa kikikikunapa costumbrikikunalata rurarkaykanki. [Tsaymi wichikunatapis pucillukunatapis püru kananpaq maylapäkunkiraq. Tsaynölami wakin costumbrikunatapis rurarkaykanki]>>.

9Mastapis Jesús kayno nirqan: <<¡Achyä pï, costumbrikikunata cumplir Tayta Diospa mandamientunkunata alichari cumplirkaykanki! 10Moisés kaynömi nirqan: <Mamaykita y taytaykita respitanki>.#Éxo. 20.12; Deut. 5.16. Tsaynöpis kayno nirqan: <Pipis mamanta o taytanta mana respitaq kaqqa wanutsishqa katsun>.#Éxo. 21.17; Lev. 20.9.

11<<Tsayno niykaptinmi qamkunaqa yachaykätsinki kayno nir: <Mamaykita y taytaykita yanapayta mana munarqa kayno ninki: <<Qamkunata yanapanäpaq kaqkunata Tayta Diosta qoykunäpaqmi promitishqä>> >. 12Tsayno nirmi runakunata yachaykätsinki mamanta y taytanta mana yanapananpaq. 13Costumbrikikunata tsayno yachatsirqa Tayta Diospa palabranta manakaqmanmi churarkaykanki. Tsaynölami wakin costumbrikikunatapis yacharkaykätsinki>>.

14Tsayno nirkushpanmi runakunata qayaykur Jesús kayno nirqan: <<Kay nishqäkunata lapayki shumaq tantiyakäriy. 15Manami imatapis mikushqanpitatsu pipis impüru rikakun, sinöqa shonquncho mana alita yarpashqanpitami. 16[Rinriyuq kaqkunaqa nishqäkunata wiyakäritsun]>>.

17Tsaypitanami runakunata kacharir juk wayiman Jesús yaykurqan. Tsaychönami discïpulunkuna ruwakurqan yachatsishqanta tantiyatsinanpaq. 18Tsaymi Jesús kayno nirqan: <<¿Qamkunapis manaku tantiyapäkunki runa imata mikurpis impüru mana rikakushqanta? 19Mikushqantsikunaqa manami shonquntsimantsu yaykun, sinöqa pachantsimanmi. Tsaypitanami pasakun>>.

Tsayno nirmi Jesús tantiyatsirqan lapan mikuykunapis mikunantsipaq ali kashqanta.

20Mastapis kayno nirqan: <<Shonquncho mana ali yarpashqankunami runata impüruyätsin. 21Runakunaqa shonquncho mana alikunata yarparmi fornicación jutsata rurapäkun, suwakärin, wanutsinakärin, 22majanta jarukärin, codiciösu kapäkun, lulakärin, shanaripakur jutsata rurapäkun, envidiösu kapäkun, manakaqta tumpanakun, yachaq tukärin y lutankunata rurapäkun. 23Tsay lapan mana ali ruraykunami shonqunpita yarqamur runakunata impüruyätsin>>.

Mana Israel warmi Jesúsman yärakushqan

Mateo 15.21-28

24Tsaypitanami Jesús aywarqan Tiro [y Sidón] markakuna lädupa. Tsayman chayashqanta runakuna musyananta mana munarmi pakaylapa juk wayiman patsakurqan. Tsayno pakakuptinpis runakuna musyarqanmi tsaycho kaykashqanta.

25Tsay markachömi juk warmipa warmi wawanta supay fiyupa nakaykätsirqan. Jesús tsayman chayashqanta musyarmi tsay warmiqa nawpanman qonqurpakuykur 26ruwakurqan wawanpita supayta qarqunanpaq. Tsay warmi manami Israel warmitsu karqan, sinöqa jinan Sirofeniciapitami karqan. 27Tsayno ruwakuptinmi Jesús kayno nirqan: <<Puntataqa yanapashaq Israel mayïkunataraqmi. Qamta yanaparqa wamrakunapa tantanta qechurir alqukunata jitapaykuqnöchari kashaq>>.

28Tsaymi warmi kayno nirqan: <<Aw, tayta. Tsayno kaptinpis wamrakuna shikwapakushqantami alqukunapis mikupäkun>>.

29Tsayno niptinmi Jesús kayno nirqan: <<Alitami nishqanki. Wawaykita nakatsiq supay yarqushqanami kaykan. Kananqa wayikipa kutikuy>>.

30Tsayno niptin wayinman kutirmi wawanta tarirqan aliyashqana cämancho kaykaqta. Tsayno aliyarqan supay yarqukushqana kaptinmi.

Upa runata Jesús aliyätsishqan

31Tiro markapita aywakurnami Sidón marka kaq lädupa tumamur Jesús chayarqan Decápolis provinciaman. Tsaypitanami chayarqan Galilea qocha kuchunman. 32Tsaycho kaykaptinmi payman pusharqan upa runata. Chayaykatsirmi Jesústa ruwakurqan jananman makinta churaykur aliyätsinanpaq. 33Tsaymi kikilanta juk läduman pushaykur upapa rinrinman dëdunta Jesús jatirqan. Toqayninwan dëdunta ushmarkatsirmi upapa qalluntapis yatarqan. 34Tsayno rurarkurmi jämayninta kachaykur jana patsata rikärishpan: <<¡Efata!>> nirqan. (Efata ninanqa kichakay ninanmi.) 35Tsayno niptinmi jinan höra rinrin kichakarqan y shiminpis pashtarqanna.

36Tsayno aliyarkatsirmi tsaycho kaykaq runakunata Jesús nirqan aliyätsishqanta pitapis mana wilananpaq. Yaparir yaparir tsayno niykaptinpis mana upälakuypami pïmaytapis wilaparqan. 37Aliyätsishqanta rikarmi runakuna pasaypa kushikur kayno nipäkurqan: <<¡Lapantapis alitami ruran! ¡Aliyätsiptinmi upakunapis mayapäkun y mana parlaqkunapis parlapäkun!>>

Currently Selected:

Marcos 7: qvmB

Highlight

Copy

Compare