Marcos 15

Pilatuman Jesústa apatsishqan

Mateo 27.1-2, 11-14; Lucas 23.1-5; Juan 18.28-38

1Tsaypita patsa waraykaptinnami mandaq cürakuna, Israel mayor runakuna, ley yachatsiqkuna y lapan Sanedrín juezkunapis juntakaykur wilanakurqan Jesústa wanutsipäkunanpaq. Wilanakurkurnami Jesústa liyarkur Pilatuman apatsirqan. 2Chayaykatsiptinnami Pilato tapurqan kayno nir: <<¿Rasunpaku Israel runakunapa mandaqnin rey kaykanki?>>

Tsawraqa Jesús kayno nirqan: <<Rasun kaqtami niykanki>>.

3Tsaychömi mandaq cürakuna Jesúspa contran imaykatapis nipäkurqan. 4Tsawraqa Jesústa Pilato yapay tapurqan kayno nir: <<¿Manaku imatapis ninki contrayki rimapäkuptin?>>

5Tsayno niptinpis Jesús manami imatapis rimakurqantsu. Tsawraqa Pilato aläpa yarpachakurqan.

Jesústa crucificananpaq Pilato ordinta qoshqan

Mateo 27.15-26; Lucas 23.13-25; Juan 18.39—19.16

6Cada watami Pascua fiestacho runakuna manakushqan prësuta Pilato kachariq. 7Tsay watami Barrabás jutiyuq runa prësu wichqaraykarqan. Paymi autoridäkunapa contran sharkushqanpita y runata wanutsishqanpita wanutsikuq mayinkunawan carcilcho wataraykarqan. 8Tsawraqa runakuna Pilatuman aywaykur manakurqan juk prësuta tsay watapis kacharinanpaq. 9Tsawraqa Pilato tapurqan kayno nir: <<¿Qamkuna munankimanku Israel runakunapa mandaqnin reyta kacharinäta?>>

10Pilato musyarqanmi mandaq cürakuna Jesústa chikir prësu apapäkushqanta.

11Tsayno niptinmi mandaq cürakuna tsaycho kaykaq runakunata shimita jatiparqan kayno nipäkunanpaq: <<Barrabásta kachariyqa>>. 12Barrabásta kacharinanpaq niptinmi Pilato kayno nirqan: <<Israel runakunapa mandaqnin reyta ¿imatataq rurashaq?>>

13Tsayno niptinmi qayaraypa kayno nipäkurqan: <<¡Crucificay!>>

14Tsawraqa Pilato tapurqan: <<¿Ima jutsatataq rurashqa?>>

Tsayno niptinpis masraqmi kayno nipäkurqan: <<¡Crucificay!>>

15Tsawraqa runakunapita ali rikashqa kayta munashpan Barrabásta Pilato kacharirqan. Jesústanami fiyupa astarkatsir crucificananpaq soldädukunapa makinman kachaykurqan.

Jesústa soldädukuna asipashqan

Mateo 27.27-31; Juan 19.2-3

16Tsaypitanami soldädukuna Jesústa apapäkurqan Pilatupa despächunpa patiunman. Lapan tröpa#15.16 Tröpa complëtuqa soqta pachak (600) soldädukunami karqan. soldädukuna tsayman juntakaykurmi 17granäti cäpata ayluparkur kashapita awashqa corönata umanman jatiparqan. 18Tsayno jatiparkurmi asipar nipäkurqan: <<¡Alabashqa katsun Israel runakunapa mandaqnin rey!>>

19Tsaypitanami shoqushwan Jesústa umacho wirupäkurqan. Toqaparkurmi adoraq tukushpan nawpanman qonqurpakärirqan. 20Tsayno asiparkurmi granäti cäpata loqtiparir kikinpa röpantana jatiparqan. Nirkurmi crucificaq apapäkurqan.

Jesústa crucificashqan

Mateo 27.32-44; Lucas 23.26-43; Juan 19.17-27

21Jesústa crucificananpaq aparkaykaptinmi chakrapita kutiykämurqan Simón jutiyuq runa. Payqa Cirene nacionpitami y Alejandrupa y Rufupa taytanmi karqan.#Rom. 16.13. Paytami Jesús apaykashqan cruzta umrutsipäkurqan. 22Tsaypitanami Jesústa chayatsirqan Gólgota nishqanman. Gólgota ninanqa Calavëra Sitiu ninanmi. 23Tsaycho mïrrawan talushqa vïnuta uputsiyta munapäkuptinpis manami upuyta munarqantsu.#15.23 Tsayno uputsiyta munarqan aläpa nanayta Jesús mana mayananpaqmi.

24Jesústa crucificaykurnami suertita jitapäkurqan röpanta mayqanpis apakunanpaq.#Sal. 22.18. 25Crucificashqan höra karqan tuta las nuëvinömi. 26Imapita wanutsishqantapis runakuna musyananpaqmi letrërucho kayno nirqan: <<Kay runaqa Israel runakunapa mandaqnin reymi>>.

27Jesús crucificaraykashqan nawpanmanmi ishkay suwa runakunatapis crucificapäkurqan, juknin kaqta alawqa kaq nawpanman y jukaqtana itsuq kaq nawpanman. 28[Tsay suwa runakunatawan crucificarmi Tayta Diospa palabrancho kayno nishqanta cumplipäkurqan: <<Jutsayuq runatanömi rikapäkurqan>>.]#Isa. 53.12.

29Jesús crucificaraykaqta rikarmi tsaypa pasaq runakuna asiparqan. Umanta awishpanmi#Sal. 22.7; 109.25. kayno nipäkurqan: <<¡Katay! Templutapis juchurkatsir kimsa junaqlata sharkatsinaykipaq kashqanta niykarqa#Mar. 14.58; Juan 2.19. 30mä salvakur cruzpita urämuy ari>>.

31Tsaynölami mandaq cürakuna y ley yachatsiqkunapis Jesústa asipashpan kikinpura kayno nipäkurqan: <<Wakinta salvarpis kikinqa manami salvakuyta kamäpakuntsu. 32Israel runakunapa mandaqnin rey Cristo karqa mä cruzpita urämutsun. Urämuptinqa criyipäkushunmi>>.

Tsaynölami Jesúspa nawpancho crucificaraykaq runakunapis ashlipäkurqan.

Jesús wanushqan

Mateo 27.45-56; Lucas 23.44-49; Juan 19.28-30

33Pulan junaqpita malway intiyaqmi patsa tsakakurkurqan. 34Tsay hörami Jesús qayaraypa kayno nirqan: <<Eloi, Eloi, ¿lama sabactani?>>

Tsay ninanqa kaykan <<Tayta Dios, Tayta Dios, ¿imanirtaq kachariykamashqanki?>> ninanmi.#Sal. 22.1.

35Tsayno nishqanta mayarmi tsaycho kaykaq wakin runakuna kayno nipäkurqan: <<Profëta Elíastami qayakuykan>>.

36Tsayno niptinmi juk runa jukla aywaykur pochquq vïnuman esponjata ushmarkatsir shoqushpa puntanman watarqan. Tsayta Jesúspa shiminman shoqunanpaq churaparmi#Sal. 69.21. kayno nirqan: <<Mä rikashun cruzpita jorqunanpaq Elías shamunqakush>>.

37Tsaypitanami fuertipa qaparar Jesús wanurqan. 38Tsay hörami templu rurincho tsaparaq cortïna#Éxo. 26.31-33; 2Crón. 3.14. janapita urayaq rachikäkurqan. 39Jesúspa nawpancho kaykaq capitanpis Jesús [qaparashqanta mayar y] wanushqanta rikarmi kayno nirqan: <<¡Rasunpami kay runaqa Diospa Tsurin kashqa!>>

40Tsaychömi warmikunapis karulapita rikarpaykarqan. Paykunawanmi kaykarqan María Magdalena, Santiagupa y Josépa maman María y Salomépis. 41Tsay warmikunami Galileacho Jesús puriptin yanapar qatirparqan.#Luc. 8.2-3. Tsaynölami tsaycho karkaykarqan Jesúswan Jerusalénman aywaq atska warmikunapis.

Jesústa pampashqan

Mateo 27.57-61; Lucas 23.50-56; Juan 19.38-42

42Jamay junaqpaq kamarikunan junaq tardina kaptinmi#15.42 Jamay junaqpaq kamarikunan junaqqa viernismi karqan. Israel runakunapaqqa jamay junaq qalaykun viernes las seis de la tardimi. 43Arimateapita kaq José Pilato kaqman aywaykur mana mantsakuypa kayno nirqan: <<Jesúspa ayanta kachapaykalämay pampanäpaq>>.

Joséqa Israel runakunapa autoridäninmi karqan. Paypis Tayta Dios mandaykashqantami shuyaraykarqan.

44Tsayno manakuptinmi Pilato mantsakar kayno nirqan: <<¿Wanushqanatsuraq?>> Tsaymi wanushqanta musyananpaq capitanta qayatsirqan. 45Mayna wanushqanta wilaptinmi Joséta awnirqan Jesúspa ayanta pampananpaq.

46Tsaymi lïnupita rurashqa säbanasta rantiykur Jesúspa ayanta cruzpita jorqurir piturqan. Nirkurmi qaqacho uchkushqa sepultüraman tsutaykur jatunkaray rumiwan punkuta tsaparqan. 47María Magdalena y Josépa maman María mayman tsutaykushqantapis rikarqanmi.

Currently Selected:

Marcos 15: qvmB

Highlight

Copy

Compare