Mateo 22

Casarakuy fiestaman tinkutsiypa Jesús yachatsishqan

Lucas 14.15-24

1Mastapis tinkutsiypa yachatsirmi Jesús kayno nirqan: 2<<Tayta Dios mandaykashqanqa casaray fiestanömi kaykan. Juk reyshi olqu tsurin casaraptin fiestata rurarqan. 3Tsayshi ashmayninkunata kacharqan invitashqan runakunata qayamunanpaq. Qayatsiptinpis manashi aywayta munarqantsu. 4Tsaypitashi wakin ashmayninkunatana kachar kayno nirqan: <Törükunata y werannin turitukunata pishtarkatsir mikuyta maynami yanukatsishqä. Lapanpis kamarishqanami kaykan. Invitashqä runakuna shamutsunna>. 5Tsayno nir qayatsiptinpis manashi mayqanpis fiestaman aywarqantsu. Wakinshi chakran aruq aywakurqan. Wakinshi negociun rantikuq aywakurqan. 6Wakinnashi reypa ashmayninkunata maqaykashqalancho wanutsirqan.

7<<Tsayshi reyqa fiyupa rabyakur soldädunkunata kacharqan. Chayaykurshi ashmaynin wanutsiq runakunata wanurkatsir markantapis rupatsipäkurqan. 8Tsaypitanashi ashmayninkunata kayno nirqan: <Tsurï casarananpaq lapanpis kamarishqanami kaykan. Tsayno kaptinpis invitashqä runakuna manakaqman churamarmi shamushqatsu. 9Kananqa nänikunapa ayway tarishqayki runakunata qayapäkamuy casaray fiestaman shapäkamunanpaq>.

10<<Tsayno niptinshi ashmayninkuna nänikunapa yarqur lapan tarishqan runakunata wilapäkurqan. Tsayshi ali runapis y fiyu runapis wayiman juntaqpaq fiestaman chayarqan. 11Invitashqan runakunata rikaq yaykurshi tsay rey rikarqan juk runa trukaküni kaykaqta. 12Tsayshi tsay runata kayno nir tapurqan: <Amïgu, casarakuy fiestaman invitaykaptïqa ¿imanirtaq mana trukakuylapa shamushqanki?> Tsayno tapuptinshi tsay runa ima niytapis mana kamäpakurqantsu. 13Tsayshi ashmayninkunata rey kayno nirqan: <Kay runata chakinpita y makinpita matwarkur yanawyaykaq tsakayman jitarpamuy. Tsaychömi fiyupa waqar kiruntapis uchunqa> >>.#Mat. 8.12; 25.30; Luc. 13.28.

14Tsayno wilaparkurmi Jesús kayno nirqan: <<Atskaqtami Tayta Dios qayashqa. Itsanqa walkaqlatami akrashqa>>.

Impuestuta pägananpaq Jesústa tapushqan

Marcos 12.13-17; Lucas 20.20-26

15Tsaypitanami fariseukuna templupita yarqurkur wilanakurqan Jesústa imanöpapis lutanta parlatsinanpaq. 16Tsaymi shumaq yacharkatsir fariseukuna kacharqan discïpulunkunata y Herodespa favornin sharkuq runakunata. Paykunami Jesústa kayno nirqan: <<Rabí, noqakuna musyapäkümi rasun kaqlata yachatsishqaykita. Manami runakuna alabashunaykita munartsu yachatsinki, sinöqa Tayta Dios munashqannölami. 17Kanan tantiyaykatsilämay. Romacho mandaq Césarpaq ¿impuestuta pägashwanku o manaku?>>#22.17 Israel runakuna nirqan Romapaq impuestuta pägar Tayta Diospa contran kaykashqantami. Tsaymi: <<Impuestuta pägashun>> niptinqa Diospa contran Jesús parlashqanta nipäkunman karqan. <<Ama pägashuntsu>> niptinqa Roma autoridäkuna rabyapäkunmanmi karqan.

18Lutanta parlatsinanpaq tapushqanta tantiyarmi Jesús kayno nirqan: <<¡Ishkay cära runakuna! ¿Imanirtaq lutanta parlatsimayta munapäkunki? 19Mä impuestu pägana qellayta rikatsimay>>.

Tsawraqa tsararashqan qellayta Jesústa aptaparqan. 20Tsayta rikaykurmi Jesús tapurqan kayno nir: <<Kay qellaycho ¿pipa reträtuntaq kaykan? Tsaynöpis ¿pipa jutintaq qelqaraykan?>>

21Tsaymi kayno nipäkurqan: <<Mandaq Césarpami>>.

Tsawraqa Jesús kayno nirqan: <<Césarpa kaqtaqa Césarta qoykuy. Tayta Diospa kaqtaqa Tayta Diosta qoykuy>>.#22.21 Tayta Diospa kaqqa kawaynintsimi kaykan.

22Tsayno niptinmi tsay runakuna espantashqa aywakärirqan.

Wanushkuna kawarimunanpaq kashqanta Jesústa tapushqan

Marcos 12.18-27; Lucas 20.27-40

23Tsay junaqlami saduceukuna Jesústa tapuq aywapäkurqan. Paykunaqa manami criyipäkuntsu wanuqkuna kawarimunanpaq kashqanta.#Hech. 23.8. 24Tsaymi Jesústa tapur kayno nipäkurqan: <<Rabí, Moisés qelqashqancho kaynömi niykan: <Warmiyuq runa tsuriynaq wanuptin wawqinmi cuñädan viüdawan tanqa. Tsaynöpami wamrankuna kaptin tsay wanuq wawqinpa tsurinkunano kanqa>.#Deut. 25.5. 25Kanan nishayki. Juk kutishi qanchis wawqikuna karqan. Qechpa kaqshi warmita ashirqan. Payshi manaraq tsurin kaptin wanurqan. Tsayshi shulka kaq wawqinna tsay viüdawan tarqan. 26Paypis tsurin manaraq kaptinshi wanukurqan. Tsaypita mas shulkan kaqnashi tsay viüdawan tarqan. Paypis tsurin manaraq kaptinshi wanukurqan. Tsaynölashi lapan wawqinkuna tsay viüdawan tarqan. Tsurin manaraq kaptinshi lapanpis wanukurqan. 27Tsaypitanashi tsay viüdapis wanukurqan. 28Wanushkuna kawarimunan junaqqa ¿mayqanpa warmintaq kanqa, qanchis wawqiwan tashqa kaykarqa?>>

29Tsayno niptinmi Jesús kayno nirqan: <<Qamkunaqa lutantami yarparkaykanki. Manami Tayta Diospa palabrantapis ni Tayta Dios munayniyuq kashqantapis tantiyapäkunkitsu. 30Kawarimurqa mananami pipis warmiyuqtsu ni runayuqtsu kanqa, sinöqa jana patsacho [Tayta Diospa] angilninkunanölanami kanqa. 31Wanushkuna kawarimunanpaq kashqanta ¿manaku Tayta Dios nishushqaykita liyipäkushqanki? Palabrancho kaynömi nin: 32<Noqaqa Abrahampa, Isaacpa y Jacobpa Diosninmi kaykä>.#Éxo. 3.6. Tayta Diosqa manami wanushkunapa Diosnintsu kaykan, sinöqa kawaykaqkunapa Diosninmi>>.

33Tsayno yachatsishqanta mayaykurmi runakuna pasaypa kushikärirqan.

Mas cäsukunantsipaq kaq mandamientu

Marcos 12.28-34; Lucas 10.25-28

34 Saduceukunata upälatsishqanta musyaykurmi fariseukuna juntakaykur Jesús kaqman aywapäkurqan. 35Tsaychömi ley yachatsiq juk fariseo runa Jesús yachashqanta o mana yachashqantapis musyayta munar tapurqan kayno nir: 36<<Rabí, ¿mayqan mandamientutataq mas cäsukushwan?>>

37Tsawraqa Jesús kayno nirqan: << <Tayta Diosta kuyanki lapan shonquykiwan, lapan voluntänikiwan y lapan yarpaynikiwan>.#Deut. 6.5. 38Kay mandamientumi lapan mandamientupitapis mas cäsukunantsipaq kaykan. 39Tsaynölami jukaq mandamientupis kayno niykan: <Kikiki kuyakushqaykino runa mayikita kuyanki>.#Lev. 19.18. 40Tsay ishkan mandamientuta cumplirqa Moisés qelqashqan lapan mandamientukunata y profëtakuna wilakushqantapis cumplirkaykankimi>>.#Luc. 10.25-28.

Davidpitapis Cristo mas mandaq kashqan

Marcos 12.35-37; Lucas 20.41-44

41 Fariseukuna tsaycho juntakashqa kaykaptinmi Jesús tapurqan: 42<<Cristo ¿pï kashqantataq yarpapäkunki? ¿Pipa Tsurintaq kaykan?>>

Tsayno tapuptinmi kayno nipäkurqan: <<Davidpa Tsurinmi, tayta>>.#22.42 Cristupaqqa David aylu kaptinmi runakuna nipäkurqan Davidpa Tsurin kashqanta. Tsayno nipäkurqan rey Davidpita miraq imayyaqpis mandananpaq Tayta Dios promitishqa kaptinmi. Tsaypita masta musyanaykipaq liyinki 2Sam. 7.10-16; Sal. 89.1-4, 19-37; 132.11-12.

43Tsawraqa Jesús kayno nirqan: <<Davidpa Tsurin kaptinqa ¿imanirtaq Espíritu Santu tantiyatsiptin kikin Davidpis nirqan mandaqnin rey kashqanta? Pay nishqanqa kayno nirmi qelqaraykan:

44<< <Mandamaqnïtami Tayta Dios kayno nirqan:

<<Alawqa kaq nawpäman jamakamuy lapan chikishuqnikikunata munaynikiman churanäyaq>> >.#Sal. 110.1.

45Kikin Davidpis mandaqnin rey kashqanta niykaptinqa ¿imanöpataq Cristuqa Davidpa Tsurin kanman?>>#22.45 Jesucristuqa manami David aylu kashqanta ñëgarqantsu, sinöqa Davidpita mas munayniyuq kashqantami nirqan.

46Tsayno niptin manami pipis ima niytapis kamäpakurqantsu. Tsay junaqpita patsa manami pipis Jesústa tapupayta almitirqannatsu.

Currently Selected:

Mateo 22: qvmB

Highlight

Copy

Compare