Mateo 15
15
Runakuna lutankunata yarpar impüru rikakushqan
Marcos 7.1-23
1Tsaypitanami fariseukuna y ley yachatsiqkuna Jerusalénpita chayaykur Jesústa tapupäkurqan kayno nir: 2<<¿Imanirtaq discïpuluykikuna unay ayluntsikunapa costumbrinkunata mana cumplishpan mikunanpaq makinkunata awikärintsu?>>
3Tsayno niptinmi Jesús kayno nirqan: <<Qamkunapis ¿imanirtaq Tayta Diospa mandamientunta cumplinaykipa trukan costumbrikikunalata rurarkaykanki? 4Tayta Diospa mandamientun kaynömi niykan: <Mamaykita y taytaykita respitanki>.#Éxo. 20.12; Deut. 5.16. Tsaynöpis kayno niykan: <Pipis mamanta o taytanta mana respitaq kaqqa wanutsishqa katsun>.#Éxo. 21.17; Lev. 20.9.
5<<Tsayno niykaptinmi qamkunaqa yachaykätsinki kayno nir: <Imaykipis Tayta Dioslapaq kashqanta niykarqa tsaykunata mananami yatankimantsu mamaykita ni taytaykita yanapanaykipaq>. 6Mamanta y taytanta manana yanapananpaq yachatsirqa Tayta Diospa palabranta manakaqmanmi churarkaykanki. 7¡Ishkay cära runakuna! Rasuntachari Isaías qamkunapaq kayno qelqarqan:
8<< <Kay runakunaqa shimilanwanmi respitapäkaman.
Shonqunchöqa manami yarpaylapis yarpämantsu.
9Nishqäta yachatsinanpa trukanqa runakuna nishqalantami yachatsipäkun.
Tsaymi manakaqlapaq adorapäkamanpis> >>.#Isa. 29.13.
10Tsayno nirkushpanmi runakunata qayaykur Jesús kayno nirqan: <<Kay nishqäkunata shumaq tantiyakäriy. 11Manami imatapis mikushqanpitatsu pipis impüru rikakun, sinöqa lutankunata parlashqanpitami>>.
12Tsaymi discïpulunkuna Jesústa kayno nirqan: <<¿Tantiyankiku tsayno niptiki fariseukuna rabyakärishqanta?>>
13Tsayno niptinmi Jesús kayno nirqan: <<Jana patsacho kaykaq Taytä mana plantashqan yöra karmi paykunaqa chakrapita lukirishqa kanqa. 14Paykunata ama cäsupaytsu. Paykunaqa qaprapura pushanakuqnömi karkaykan. Qaprapura pushanakurqa ishkanmi pözuman jeqanqa>>.#Luc. 6.39.
15Tsayno niptinmi Pedro kayno nirqan: <<Mikuyman tinkutsiypa yachatsishqaykita tantiyatsipäkamay, tayta>>.#Mat. 15.11.
16Tsawraqa Jesús kayno nirqan: <<¿Qamkunapis manaku tantiyapäkunki? 17Manami mikuyta mikushqanpitatsu runa impüru rikakun. Mikushqanqa pachanpita pasakunmi. 18Shonquncho mana alita yarpashqanta parlarmi itsanqa impüru rikakun.#Mat. 12.34. 19Runakunaqa shonquncho mana alikunata yarparmi runa mayinta wanutsipäkun, majanta jarukärin y fornicación jutsata rurapäkun. Tsaynöpis suwakärin, lulakärin y runa mayinta ashlipäkun. 20Tsaykunata rurarmi runaqa impüru rikakun. Manami makinta mana awikuylapa mikurtsu impüru rikakun, sinöqa shonquncho mana alikunata yarparmi>>.
Mana Israel warmi Jesúsman yärakushqan
Marcos 7.24-30
21Tsaypitanami Jesús aywarqan Tiro y Sidón markakuna lädupa. 22Tsay markakunachömi cananeo nishqan mana Israel runakuna tarkaykan. Tsaymi juk cananea warmi Jesús kaqman aywaykur fuertipa ruwakur kayno nirqan: <<¡Davidpa Tsurin Jesús, kuyapaykalämay! Warmi wawätami supay löcayätsir fiyupa nakaykätsin>>.
23Tsayno niptin Jesús manami imatapis parlakurqantsu. Tsaymi discïpulunkuna Jesústa kayno nirqan: <<Pasaypa qapararmi taqay warmi qatiraykämantsi. Aywakunanpaq niykuy, tayta>>.
24Tsayno niptinmi tsay warmita Jesús kayno nirqan: <<Oqrakashqa uyshano kaykaq Israel runakunalamanmi Tayta Dios kachamashqa>>.
25Tsawraqa Jesúspa nawpanman qonqurpakuykur tsay warmi kayno nirqan: <<¡Yanapaykalämay, tayta!>>
26Tsayno ruwakuptinmi Jesús kayno nirqan: <<Qamta yanaparqa wamrakunapa tantanta qechurir alqukunata jitapaykuqnöchari kashaq>>.
27Tsayno niptinmi warmi kayno nirqan: <<Aw, tayta. Itsanqa mësapita shikwapakushqantami alqukunapis mikupäkun>>.
28Tsawraqa Jesús kayno nirqan: <<Rasunpami yärakamanki. Ruwakamashqaykinömi kanqa>>.
Tsay hörami tsay warmipa wawan aliyarqan.
Qeshyaqkunata Jesús aliyätsishqan
29Tsaypita aywakurnami Galilea qocha kuchunpa Jesús pasarqan. Nirkurnami juk jirkanman witsarkur tsaycho jamakurqan. 30Tsaymanmi atska runakuna apapäkurqan weqrukunata, qaprakunata, makllukunata, shimin watakashkunata y wakin qeshyawan qeshyaqkunatapis. Tsaychömi lapan qeshyaqkunata Jesús aliyätsirqan. 31Tsaymi runakuna pasaypa kushikurqan upakuna parlarkaykaqta mayar, makllukuna aliyashqana karkaykaqta rikar, weqrukuna purirkaykaqta rikar y qaprakuna rikarkaykaqta rikar. Tsayno kushikurmi Tayta Diosta alabapäkurqan.
Chusku waranqa runakuna mikunanpaq milagruta Jesús rurashqan
Marcos 8.1-10
32Tsaypitanami discïpulunkunata qayaykur Jesús kayno nirqan: <<Kay runakunata pasaypami kuyapä. Kimsa junaqnami mikuytapis mana yawaypa noqantsiwan karkaykan. Mikünilata aywakärinanpaq niptïqa wayinkunamanpis manaraq chayaptinchari nänikunacho bëta tsarinqa>>.
33Tsayno niptinmi discïpulunkuna kayno nipäkurqan: <<Kay chunyaq jirkachöqa ¿maychöraq mikuyta tariykushun kaytsika runakunapaq?>>
34Niptinmi Jesús kayno tapurqan: <<¿Aykalataq tantayki kaykan?>>
Niptinnami kayno nipäkurqan: <<Qanchis tantawan juk ishkay pescädulami, tayta>>.
35Tsawraqa runakuna jamakärinanpaq Jesús nirqan. 36Jamaykäriptinnami pescäduta y qanchis tantata aptarkur Tayta Diosta manakur yusulpalä nirqan. Nirkurnami tantata pakirir discïpulunkunata makyarqan aypukärinanpaq. 37Tsawraqa lapan mikupäkurqan saksashqanyaq. Putsushqankunatanami discïpulunkuna shuntapäkurqan qanchis canasta juntata. 38Tsaycho mikuqkuna karqan chusku waranqano (4,000), warmikunata y wamrakunata mana yupaylapami.
39Runakunata despacharkurnami büquiman witsarkur discïpulunkunawan Jesús aywakurqan Magdala partiman.
Currently Selected:
Mateo 15: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
Mateo 15
15
Runakuna lutankunata yarpar impüru rikakushqan
Marcos 7.1-23
1Tsaypitanami fariseukuna y ley yachatsiqkuna Jerusalénpita chayaykur Jesústa tapupäkurqan kayno nir: 2<<¿Imanirtaq discïpuluykikuna unay ayluntsikunapa costumbrinkunata mana cumplishpan mikunanpaq makinkunata awikärintsu?>>
3Tsayno niptinmi Jesús kayno nirqan: <<Qamkunapis ¿imanirtaq Tayta Diospa mandamientunta cumplinaykipa trukan costumbrikikunalata rurarkaykanki? 4Tayta Diospa mandamientun kaynömi niykan: <Mamaykita y taytaykita respitanki>.#Éxo. 20.12; Deut. 5.16. Tsaynöpis kayno niykan: <Pipis mamanta o taytanta mana respitaq kaqqa wanutsishqa katsun>.#Éxo. 21.17; Lev. 20.9.
5<<Tsayno niykaptinmi qamkunaqa yachaykätsinki kayno nir: <Imaykipis Tayta Dioslapaq kashqanta niykarqa tsaykunata mananami yatankimantsu mamaykita ni taytaykita yanapanaykipaq>. 6Mamanta y taytanta manana yanapananpaq yachatsirqa Tayta Diospa palabranta manakaqmanmi churarkaykanki. 7¡Ishkay cära runakuna! Rasuntachari Isaías qamkunapaq kayno qelqarqan:
8<< <Kay runakunaqa shimilanwanmi respitapäkaman.
Shonqunchöqa manami yarpaylapis yarpämantsu.
9Nishqäta yachatsinanpa trukanqa runakuna nishqalantami yachatsipäkun.
Tsaymi manakaqlapaq adorapäkamanpis> >>.#Isa. 29.13.
10Tsayno nirkushpanmi runakunata qayaykur Jesús kayno nirqan: <<Kay nishqäkunata shumaq tantiyakäriy. 11Manami imatapis mikushqanpitatsu pipis impüru rikakun, sinöqa lutankunata parlashqanpitami>>.
12Tsaymi discïpulunkuna Jesústa kayno nirqan: <<¿Tantiyankiku tsayno niptiki fariseukuna rabyakärishqanta?>>
13Tsayno niptinmi Jesús kayno nirqan: <<Jana patsacho kaykaq Taytä mana plantashqan yöra karmi paykunaqa chakrapita lukirishqa kanqa. 14Paykunata ama cäsupaytsu. Paykunaqa qaprapura pushanakuqnömi karkaykan. Qaprapura pushanakurqa ishkanmi pözuman jeqanqa>>.#Luc. 6.39.
15Tsayno niptinmi Pedro kayno nirqan: <<Mikuyman tinkutsiypa yachatsishqaykita tantiyatsipäkamay, tayta>>.#Mat. 15.11.
16Tsawraqa Jesús kayno nirqan: <<¿Qamkunapis manaku tantiyapäkunki? 17Manami mikuyta mikushqanpitatsu runa impüru rikakun. Mikushqanqa pachanpita pasakunmi. 18Shonquncho mana alita yarpashqanta parlarmi itsanqa impüru rikakun.#Mat. 12.34. 19Runakunaqa shonquncho mana alikunata yarparmi runa mayinta wanutsipäkun, majanta jarukärin y fornicación jutsata rurapäkun. Tsaynöpis suwakärin, lulakärin y runa mayinta ashlipäkun. 20Tsaykunata rurarmi runaqa impüru rikakun. Manami makinta mana awikuylapa mikurtsu impüru rikakun, sinöqa shonquncho mana alikunata yarparmi>>.
Mana Israel warmi Jesúsman yärakushqan
Marcos 7.24-30
21Tsaypitanami Jesús aywarqan Tiro y Sidón markakuna lädupa. 22Tsay markakunachömi cananeo nishqan mana Israel runakuna tarkaykan. Tsaymi juk cananea warmi Jesús kaqman aywaykur fuertipa ruwakur kayno nirqan: <<¡Davidpa Tsurin Jesús, kuyapaykalämay! Warmi wawätami supay löcayätsir fiyupa nakaykätsin>>.
23Tsayno niptin Jesús manami imatapis parlakurqantsu. Tsaymi discïpulunkuna Jesústa kayno nirqan: <<Pasaypa qapararmi taqay warmi qatiraykämantsi. Aywakunanpaq niykuy, tayta>>.
24Tsayno niptinmi tsay warmita Jesús kayno nirqan: <<Oqrakashqa uyshano kaykaq Israel runakunalamanmi Tayta Dios kachamashqa>>.
25Tsawraqa Jesúspa nawpanman qonqurpakuykur tsay warmi kayno nirqan: <<¡Yanapaykalämay, tayta!>>
26Tsayno ruwakuptinmi Jesús kayno nirqan: <<Qamta yanaparqa wamrakunapa tantanta qechurir alqukunata jitapaykuqnöchari kashaq>>.
27Tsayno niptinmi warmi kayno nirqan: <<Aw, tayta. Itsanqa mësapita shikwapakushqantami alqukunapis mikupäkun>>.
28Tsawraqa Jesús kayno nirqan: <<Rasunpami yärakamanki. Ruwakamashqaykinömi kanqa>>.
Tsay hörami tsay warmipa wawan aliyarqan.
Qeshyaqkunata Jesús aliyätsishqan
29Tsaypita aywakurnami Galilea qocha kuchunpa Jesús pasarqan. Nirkurnami juk jirkanman witsarkur tsaycho jamakurqan. 30Tsaymanmi atska runakuna apapäkurqan weqrukunata, qaprakunata, makllukunata, shimin watakashkunata y wakin qeshyawan qeshyaqkunatapis. Tsaychömi lapan qeshyaqkunata Jesús aliyätsirqan. 31Tsaymi runakuna pasaypa kushikurqan upakuna parlarkaykaqta mayar, makllukuna aliyashqana karkaykaqta rikar, weqrukuna purirkaykaqta rikar y qaprakuna rikarkaykaqta rikar. Tsayno kushikurmi Tayta Diosta alabapäkurqan.
Chusku waranqa runakuna mikunanpaq milagruta Jesús rurashqan
Marcos 8.1-10
32Tsaypitanami discïpulunkunata qayaykur Jesús kayno nirqan: <<Kay runakunata pasaypami kuyapä. Kimsa junaqnami mikuytapis mana yawaypa noqantsiwan karkaykan. Mikünilata aywakärinanpaq niptïqa wayinkunamanpis manaraq chayaptinchari nänikunacho bëta tsarinqa>>.
33Tsayno niptinmi discïpulunkuna kayno nipäkurqan: <<Kay chunyaq jirkachöqa ¿maychöraq mikuyta tariykushun kaytsika runakunapaq?>>
34Niptinmi Jesús kayno tapurqan: <<¿Aykalataq tantayki kaykan?>>
Niptinnami kayno nipäkurqan: <<Qanchis tantawan juk ishkay pescädulami, tayta>>.
35Tsawraqa runakuna jamakärinanpaq Jesús nirqan. 36Jamaykäriptinnami pescäduta y qanchis tantata aptarkur Tayta Diosta manakur yusulpalä nirqan. Nirkurnami tantata pakirir discïpulunkunata makyarqan aypukärinanpaq. 37Tsawraqa lapan mikupäkurqan saksashqanyaq. Putsushqankunatanami discïpulunkuna shuntapäkurqan qanchis canasta juntata. 38Tsaycho mikuqkuna karqan chusku waranqano (4,000), warmikunata y wamrakunata mana yupaylapami.
39Runakunata despacharkurnami büquiman witsarkur discïpulunkunawan Jesús aywakurqan Magdala partiman.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.