Levítico 26

Cäsukuqkuna bendicionta chaskinanpaq nishqan

Deuteronomio 7.12-24; 28.1-14

1<< <Noqa Tayta Diosnikimi kaykä. Tsayno kaykaptinqa ima ïdulutapis ruraykur ama adorankitsu. Wanka rumikunatapis ni dibujashqa rumikunatapis ama ichitsinkitsu adorapäkunaykipaq.#Éxo. 20.4; Lev. 19.4; Deut. 5.8; 16.21-22; 27.15. 2Jamay junaqcho respitamashpayki jamanki. Tsaynöla Sagrädu Toldutapis respitanki.#Lev. 19.30. Noqaqa Tayta Diosmi kaykä.

3<< <Leynïkunata y mandamientükunata cumpliptikiqa 4tamyatapis tiempulanchömi tamyatsimushaq. Chakracho mikuykunapis y frütakunapis alimi wayunqa. 5Trïgupis aypanqa üva poqumunanyaqmi. Üvapis aypanqa trïguta murunaykiyaqmi. Pacha junta mikushqami nacionnikichöpis ali kawapäkunkipaq.#Deut. 11.13-15.

6<< <Nacionnikicho ali kawarmi jawka punukärinki. Noqami tsapäshayki mikukuq munti uywakunapita y guërrapitapis. 7Atacashunaykipaq contrayki runakuna shamuptinpis vincishpayki qatikachankipaqmi. Paykunataqa lapantami espädaykiwan wanutsipäkunkipaq. 8Pitsqa runakunalami pachak (100) runakunata qatikachankipaq. Pachak runakunalami chunka waranqa (10,000) runakunata qatikachankipaq. Contraykikunataqa espädaykiwanmi wanutsipäkunkipaq.

9<< <Pactuta rurar promitishqänölami atskaman mirapäkunaykipaq bendicionnïta churamushaq. 10Atska wata mikunaykipaqmi maran trïgupis aypanqa. Tsayraq cosechashqaykitapis trïgu churakunaykita jäkatsirraqmi churapäkunkipaq.

11<< <Qamkunawanmi imaypis täshaqpaq. Manami imaypis kachashaykipaqtsu. 12Maypa aywaptikipis qamkunawanmi kaykäshaq. Noqami qamkunapa Diosniki imaypis kashaq. Qamkunami kuyashqä runakuna kankipaq.#2Cor. 6.16; Apoc. 21.3. 13Noqa Tayta Diosnikimi kaykä. Egiptucho ashmay karkaykaptikimi jorqamushqä. Pitapis mana mantsakuypa kawanaykipaqmi yanapashqä.

Mana cäsukuqkunata castigananpaq nishqan

Deuteronomio 28.15-68

14<< <Noqa nishqäkunata mana wiyakamaptiki, mandamientükunata mana cumpliptiki, 15leynïkunata mana cäsukur mana respitamaptiki y pactu rurashqäta mana cumpliptikiqa 16mantsariypaqmi castigashayki. Tsaymi qamkunaman kachamushaq shanapäkuy qeshyata, nawi nanayta, janjampaykachayta y wanutsikuq qeshyata. Contraykikuna shamur cosëcha shuntashqaykita apakuptin manakaqlapaqmi murushqaykipis kanqa. 17Tsaynölami qamkunapa contrayki rikakuptï chikishuqnikikuna vincishushpayki munaynincho tsararäshunkipaq. Pipis mana qatikachaykäshuptikimi qeshpipäkunkipaq.

18<< <Tsayno ruraykaptïpis mana cäsukamaptikiqa qanchis kuti masmi castigashaykipaq. 19Mana cäsukuq y orgullösu kaptikimi tamyatapis mana tamyatsimushaqtsu y murushqaykitapis mana wayutsishaqtsu. 20Chakrayki mana wayuptin manakaqlapaqmi arunkipaqpis. Tsaynölami plantashqayki frütakunapis mana wayunqapaqtsu.

21<< <Mana cäsukamar nishqäkunata manakaqman churaptikiqa jutsa rurashqaykiman tupumi qanchis kuti mas castigashaykipaq. 22Munti uywakunatami kachamushaq tsurikikunata y uywaykikunata ushananpaq. Tsaymi pipis mana kanqatsu nänipa purinalanpaqpis.

23<< <Tsayno castigaykaptïpis cäsukamänaykipa trukan nishqäkunata manakaqman churaptikiqa 24noqapis qamkunapa contrayki rikakurmi jutsa rurashqaykipita qanchis kuti mas fiyupa castigashaykipaq. 25Mana cäsukamaptikiqa pactuta rurar nishqänölami wanutsikuq runakunata kachamushaq. Markaykiman pakakuq qeshpiptikipis fiyu qeshyatami kachamushaq. Tsaynöpis contraykikuna yaykamur ushakätsishunkipaq.

26<< <Mikuynikita ushakätsiptïmi chunka warmikuna juk tulpalachöna yanukunqa. Tsaymi ichik ichikla qarashuptiki pachaykipis mana saksanqapaqtsu.

27<< <Tsayno castigaykaptïpis mana cäsukamar nishqäkunata manakaqman churaptikiqa 28rabyashpä jutsa rurashqaykipita qanchis kuti mas fiyupami castigashaykipaq. 29Pasaypa yarqanashpaykimi tsurikikunata warmitapis olqutapis mikupäkunkipaq. 30Ïdulukunata adorapäkunaykipaq sharkatsishqayki altarkunatapis juchutsirmi ushashaqpaq. Inciensuwan qoshtatsikunayki altarkunatapis talamarmi ushashaqpaq. Qamkunata wanuratsirmi ïduluykikuna jananman ayaykikunata jitarishaqpaq. Fiyupa rabyanätsimashqaykipitami tsayno ushakätsishaykipaq. 31Markaykikunatapis raqälatanami kachaykushaqpaq. Altarnikikunatapis juchutsirmi ushashaqpaq. Sacrificiuta rupatsiptikipis manami chaskishaykipaqtsu.

32<< <Kikïmi markaykikunata pasaypa ushakätsishaqpaq. Ushakätsishqäta rikarmi contraykikunapis markaykikunaman tänanpaq shamur pasaypa mantsakashqa rikakunqa. 33Wakinnikitaqa espädawan wanutsishayki y wakinnikitanami juk lädu nacionkunaman qarqushayki. Tsayno ruraptïmi nacionnikipis pasaypa chunyaq rikakunqa. Markaykikunapis mantsariypa raqälami kanqa. 34Chakraykikunata jamatsinaykipaq niykaptïpis mana jamatsiypa murushqaykipitami contraykikunapa nacionnincho kashqaykiyaq chakraykikunapis jamanqapaq. 35Tsaynöpami chakraykikuna jamakunqa mana jamatsiypa murushqaykipita.

36<< <Kawaykar quëdaqkunapis contraykikunapa nacionnincho pasaypa mantsa mantsalami kawapäkunqapaq. Tsaymi ima qashyaptilanpis espädawan runa qatikachaykäshushqaykita yarpar qeshpipäkunkipaq. Tsayno qeshpiykarmi fiyupa mantsariylawan wakinnikiqa wanupäkunkipaq. 37Pipis mana qatikachaykäshuptikimi guërrapita qeshpiykaqno takanakurraq qeshpipäkunkipaq. Manami mayqaykipis contraykita ichipayta kamäpakunkipaqtsu. 38Juk lädu nacionkunachömi wanupäkunkipaq. Tsaynöpis contraykikunapa nacionninchömi ushakankipaq. 39Mana cäsukamashqaykipitami contraykikunapa nacionnincho kawaykar quëdaq tsurikikunapis wanur ushakanqapaq.

40-41<< <Contraykikunapa nacionninman qarquptïmi tantiyakärinki kikikipis y unay ayluykikunapis conträ sharkur jutsayuq kashqaykita. Tsayno tantiyakur perdonta manakamaptikiqa 42Jacobwan,#Gén. 28.13-14. Isaacwan,#Gén. 26.3-4. Abrahamwan#Gén. 17.7-8. pactu rurashqätami yarpäshaqpaq. Tsaynölami chakraykikunapaqpis yarpäshaq. 43Chakraykikunata mana jamatsiypa murushqaykipitami juk lädu nacioncho tashqaykiyaq chakraykikuna jamanqapaq. Mana cäsukamar jutsata rurashqaykipita y leynïkunata mana cumplishqaykipitami pasaypa nakapäkunkipaq.

44<< <Tsayno kaptinpis unay ayluykikunawan pactu rurashqäta manami qonqashaqtsu. Noqa Tayta Diosniki karqa manami kachapäshaqtsu lapaykita ushakätsishunaykita. 45Tsaypa trukanqa unay ayluykikunawan pactu rurashqäta yarparmi qamkunata yanapashayki. Tsay pactuta rurarmi unay ayluykikunapa Diosnin kanäpaq wakin nación runakuna rikaykaptin Egiptupita jorqamurqä. Noqaqa Tayta Diosmi kaykä> >>.

46Tsayno nirmi leyninkunata, mandamientunkunata y yachatsikuyninkunatapis Israel runakunata Moiséswan Sinaí puntacho Tayta Dios wilakatsirqan.

Currently Selected:

Levítico 26: qvmB

Highlight

Copy

Compare