Josué 7

Jutsata Acán rurashqan

1Judá trïbupitami karqan Acán jutiyuq runa. Paymi karqan Carmipa tsurin, Zabdipa wilkan y Zerapa wilkanpa tsurin. Acánqa Jericó markacho kaqta lapanta rupatsipäkunanpaq Josué niykaptinpis alinnin kaqtami pakaylapa kikinpaq apakurqan. Tsayno apakuptinmi Tayta Dios fiyupa rabyakur Israel runakunapa contran rikakurqan.

2Jericó markapitami runakunata Josué kacharqan Hai markata rikapakamunanpaq. Hai markaqa Bet-elpita inti jeqamunan kaq lädupa y Bet-avén marka cercanchömi karqan. Tsaymi paykunaqa Hai markata rikapakamurqan. 3Kutiykamurmi Josuéta kayno nir wilarqan: <<Lapantsiqa ama aywashuntsu. Ishkay waranqa (2,000) o kimsa waranqa (3,000) runakunalawanmi Hai runakunata ushakätsishun. Tsay markachöqa walkalami runakuna tarkaykan>>.

4Tsayno niptinmi markata ushakätsinanpaq Josué kacharqan kimsa waranqatano (3,000) runakunata. Tsayno kaptinpis Haicho taq runakunaqa paykunata vincishpanmi qatikacharqan. 5Hai markapa punkunpita hasta rumita jorqukuna partiyaq qatikacharmi uraypa qeshpiptin kimsa chunka soqta (36) runakunata wanutsipäkurqan. Tsaymi Israel runakuna mantsakur mana almitirqannatsu pelyayta.

6Tsayno vinciykuptinmi Josué y mayor runakuna lakikushpan röpanta rachipäkurqan y alpatapis umankunaman matsipäkurqan. Nirkurnami patsa tsakashqanyaq Tayta Diospa babulnin nawpanman lätakuykurqan. 7Tsaychömi Josué kayno nirqan: <<Tayta Dios, kay markakunacho taq amorreo runakuna wanutsimänanpaqqa ¿imapaqraq Jordán mayutapis pasatsipäkamarqayki? Tsaypa trukanqa kachaykamankiman karqan Jordán mayupa wak tsimpalacho. 8Tayta Dios, conträkuna vinciykämaptinqa kanan ¿imataraq Israel mayïkunata nishaq? 9Kananqa tsayta mayaykur kay particho taq cananeo runakuna shuntakaykur chipyaqchari asulapäkamanqa. Tsayno asulapäkamaptinqa ¿imanöparaq runakuna musyanqa lapanpaq munayniyuq kashqaykita?>>

10Tsawraqa Tayta Dios kayno nirqan: <<¿Imanirtaq lätaraykanki? ¡Sharkuy! 11Nishqäta mana cäsukamarmi Israel runakuna jutsayuq karkaykan. Jericó markacho lapanta rupatsinanpaq niykaptïpis#Deut. 13.16; Jos. 6.17-19. suwarkurmi toldunkunacho pakarpaykätsin. Tsayno rurapäkushqa jutsata ruraykashqanta musyaykarmi. Tsaynöpami paykunawan pactu rurashqäta manakaqman churapäkushqa. 12Tsaymi contraykikunawan pelyayta mana kamäpakur qeshpirkaykanki. Jutsayuq runata manaraq wanutsiptikiqa qamkunata yanapanäpa trukan ushakätsishaykimi.

13<<Jukla aywaykur runakunata wilay kanan junaq purificakur wara junaq nawpäman shamunanpaq. Qamkunapa Diosniki karmi noqa kayno nï: <Lapanta rupatsinaykipaq niykaptïpis wayikipa apakurmi jutsayuq karkaykanki. Jutsayuq runata manaraq wanutsirqa manami contraykikunatapis ushakätsiyta kamäpakunkipaqtsu>.

14<<Wara tuta trïbunpa trïbunpa Israel runakuna nawpäman shapäkamutsun mayqan trïbupis jutsayuq kashqanta ninäpaq. Tsaynölami tsay trïbu runakuna aylunpa aylunpa nawpäman shapäkamunqa mayqan aylupis jutsayuq kashqanta ninäpaq. Nirkurnami tsay aylu runakuna castanpa castanpa nawpäman shapäkamunqa mayqan castanpis jutsayuq kashqanta ninäpaq. Tsay casta runakunanami cada ünun nawpäman shamunqa mayqanpis jutsayuq kashqanta ninäpaq. 15Jutsayuq runa mayqan kashqanta niptï wayinta, tsurinkunata y lapan imaykankunatapis rupatsipäkunki. Tsay runa pasaypa mana alita rurarmi Israel runakunawan pactu rurashqäta manakaqman churashqa>>.

Acánta wanutsipäkushqan

16Tsayno niptinmi waraynin#7.16a Wakin runakunaqa warantin nipäkun. junaq tsaka tsakala lapan runakunata shuntaykur Josué nirqan trïbunpa trïbunpa Diospa nawpanman#7.16b Tayta Diospa nawpanman nirqa Tinkuna Tolducho kaykaq altarpa nawpanmanmi niykan. shamunanpaq. Tsayno shamuptinmi Tayta Dios nirqan Judá trïbu jutsayuq kashqanta. 17Judá trïbutanami Josué nirqan aylunpa aylunpa Diospa nawpanman shamunanpaq. Tsaymi Tayta Dios nirqan Zera aylu jutsayuq kashqanta. Zera aylu shamuptinnami nirqan Zabdi casta jutsayuq kashqanta. 18Zabdi castacho olqu kaqkuna shapäkamuptinnami Tayta Dios nirqan Acán runa jutsayuq kashqanta. Payqa karqan Carmipa tsurinmi. Tsaynöpis karqan Zabdipa wilkan y Zerapa wilkanpa tsurinmi. Paykunaqa karqan Judá trïbupitami.

19Tsaymi Acánta Josué kayno nirqan: <<Tayta Diospa nawpancho mana lulakuylapa rasun kaqlata wilamay, hïju>>.

20Tsawraqa Acán kayno nirqan: <<Tayta Diosta mana cäsukurmi jutsata ruraykushqä. 21Jericó markaman yaykurmi rikarqä Babiloniacho awashqa kuyaylapaq jakuta, ishkay pachak (200) qellayta y juk taksha bärra qorita. Tsay qoriqa mediu kïlunömi lasan. Tsaykunata munaparmi pakaylapa aparkur toldü rurinman pampaykushqä. Qellay kaqtaqa mas rurinmanmi pampaykushqä>>.

22Tsayno niptinmi Acánpa toldunman runakunata Josué kacharqan. Tsaychömi taripäkamurqan lapan pakashqankunata y qellaytapis mas rurincho kaykaqta. 23Tsaykunata jorqurkurmi Israel runakuna juntakashqanman aywaykur Josuéta entregarqan. Tsayta chaskirkurnami Tayta Diospa nawpanman churaykurqan.

24Nirkurnami lapan Israel runakunawan Acor Pampaman apapäkurqan Acánta, suwashqan qellayta, qorita, jakuta, warmi tsurinkunata y olqu tsurinkunatapis. Tsaynölami paypa kaqtaqa lapanta apapäkurqan wäkankunata, uyshankunata, cabrankunata, bürrunkunata y tolduntapis. 25Tsayman pushaykurmi Josué kayno nirqan: <<¿Imanirtaq noqakunata kay desgraciaman churaykamashqanki? Kananqa kikikitami Tayta Dios desgraciaman churashunkipaq>>.

Tsayno niptinmi Israel runakunaqa Acánta, tsurinkunata y lapan uywankunatapis saqmaypa wanuratsir rupatsipäkurqan. 26Tsaypitanami rupatsishqan jananman tsaytsika rumikunata qotupäkurqan. Tsay rumikunaqa kananyaqmi tsaycho qoturaykan. Tsay wanutsishqan junaqpita patsami tsay pampapa jutin Acor Pampa#7.26 Acor Pampa ninanqa Desgracia Pampa ninanmi. kaykan. Acánta wanurkatsiptinraqmi Tayta Diospa rabyanaynin pasarqan.

Currently Selected:

Josué 7: qvmB

Highlight

Copy

Compare