Josué 24
24
Josué despidikushqan
1Nirkurnami mayor runakunata, mandaq runakunata, juezkunata, autoridäkunata y lapan trïbu Israel runakunata Siquem markaman Josué qayatsiptin Tayta Diospa nawpancho#24.1 Tayta Diospa nawpancho nirqa Tinkuna Tolducho kaykaq altarpa nawpanchömi niykan. lapan juntakarqan. 2Tsaychömi Josué kayno nirqan: <<Tayta Diosmi kayno nin: <Unay ayluyki Taréqa#Gén. 11.27. tsurin Abrahamwan y Nacorwan Éufrates mayu wak tsimpanchömi tarqan. Tsaycho tarmi paykunaqa juk dioskunata adorapäkurqan. 3Tsaycho taykaptinmi Abrahamta pushamurqä Canaánman#Gén. 12.1-9.. Tsaychömi tsurin Isaac yurirqan. Atskaman mirapäkunanpaqmi Isaacpita miraqkunata ali rikashqä.#Gén. 21.1-3. 4Isaacpa tsurinkunami karqan Jacob y Esaú.#Gén. 25.24-26. Esaúpita miraqkuna tänanpaqmi rikatsirqä Seir jalqakunata.#Gén. 36.8; Deut. 2.5. Jacobnami tsurinkunawan Egiptuman aywakurqan tsaycho tänanpaq.#Gén. 46.1-7.
5<< <Unay ayluykikuna Egiptucho taykaptinmi paykunata jorqamunanpaq Moisésta y Aarónta kacharqä. Kachapämuyta mana munaptinmi Egipto runakunata fiyupa castigarqä.#Éxo. 3.1—12.42. 6Tsaynöparaqmi ayluykikunata kachapämurqan. Aywarkaykämuptinmi Egipto soldädukuna carrëtankunawan y cawallunkunawan Puka Lamaryaq qatipämurqan. 7Ayluykikuna mantsakur manakamaptinmi Egipto runakuna mana rikapäkunanpaq yanawyayparaq tsakätsirqä. Nirkur lamar yakucho Egipto runakuna shenqaypa wanunanpaqpis talpukätsirqä. Egiptucho tsaykunata rurashqäta rikapäkushqankimi. Tsaypita yarqamurmi atska wata chunyaq jirkacho qamkuna tashqanki.
8<< <Nirkurmi pushamurqä Jordán mayu tsimpan amorreo runakuna taykashqanman. Amorreo runakuna contrayki sharkur atacashuptikipis qamkunata yanaparqä paykunata ushakätsir nacionnintapis qechunaykipaq.#Núm. 21.21-35. 9Nirkurnami Ziporpa tsurin Balac qamkunawan pelyananpaq kamarikurqan. Paymi moabita runakunapa mandaqnin rey kashpan Beorpa tsurin Balaamta qayatsirqan qamkunata maldicionashunaykipaq. 10Tsayno kaptinpis Balaam maldicionashunaykita manami kachaparqätsu. Tsaymi maldicionashunaykipa trukanqa bendicionta chaskipäkunaykipaq Balaam nirqan. Tsaynömi qamkunata salvarqä.#Núm. 22.1—24.25.
11<< <Tsaypitanami Jordán mayuta tsimpamur#Jos. 3.14-17. Jericóman chayapäkamurqayki. Jericócho taq runakuna qamkunawan pelyaptinpis paykunata vincinaykipaqmi yanaparqä.#Jos. 6.1-21. Tsaynömi amorreo runakunata, ferezeo runakunata, cananeo runakunata, heteo runakunata, gergeseo runakunata, heveo runakunata y jebuseo runakunata ushakätsinaykipaq yanaparqä. 12Amorreo runakunapa ishkay mandaqnin reykunatapis manami espädayki ni flëchayki kashqanpitatsu ushakätsirqayki, sinöqa kikïmi yanaparqä ushakätsinaykipaq. 13Tsaynölami chakrata y wayita qamkunata listulatana qoykurqä. Tsaymi tsay wayikunachöna tarkaykanki y juk plantashqan üvakunata y aceitünaskunata mikurkaykanki> >>.#Deut. 6.10-11.
14Nirkurnami Josué mastapis kayno nirqan: <<Kananqa Tayta Diosta mantsakur pay munashqanno imaypis kawapäkunki. Éufrates mayu wak tsimpancho tashpan y Egiptucho tashpan unay ayluntsikuna adorashqan dioskunata ama adorapäkunkitsu. Tsaypa trukanqa Tayta Dioslata adorar pay japalanta sirvipäkunki. 15Tayta Diosta sirviyta mana munarqa kanan akrapäkuy pita sirvipäkunaykipaqpis. Éufrates mayu wak tsimpancho unay ayluntsikuna sirvishqan dioskunata o kaycho taq amorreo runakuna sirvipäkushqan dioskunata sirvipäkuptikipis noqaqa wayïcho taqkunawan Tayta Dioslatami imayyaqpis sirvipäkushaq>>.
16Tsayno niptinmi Israel runakuna kayno nipäkurqan: <<Noqakunaqa Tayta Dioslatami imaypis sirvipäkushaq. Juk dioskunataqa manami sirvipäkushaqtsu. 17Kikin Tayta Diosnintsimi unay ayluntsikunata y noqantsitapis Egiptucho ashmay kaykaptintsi jorqamarqantsi. Kikintsimi rikashqantsi tukuy niraq milagrukunata rurashqanta. Wakin markakunata pasamunantsipaqpis paymi imapitapis tsapämashqantsi. 18Kanan taykashqantsi markakunacho taq amorreo runakunata y wakin runakunatapis Tayta Diosnintsimi qarqur ushakätsishqa. Tsayno yanapamashqantsipitami payta imaypis sirvishun. Pay japalanmi Tayta Dios kaykan>>.
19Tsayno niptinmi Josué kayno nirqan: <<Sasaraqmi kaykan Tayta Diosta sirvipäkunaykipaqqa. Payqa santu y castigakuq kar jutsa ruraqkunata manami jananpantsu. 20Tayta Diosta sirviykashqaykicho juk dioskunata adoraptikiqa yanapakuq karpis castigar ushakätsishunkipaqmi>>.
21Tsayno niptinmi Israel runakuna Josuéta kayno nirqan: <<Noqakunaqa Tayta Dioslatami imaypis sirvipäkushaq>>.
22Tsawraqa Josué kayno nirqan: <<Kikikikunami nirkaykanki Tayta Dioslata imaypis sirvipäkunaykipaq>>.
Tsayno niptinmi paykunaqa nipäkurqan: <<Awmi, tayta>>.
23Tsayno nipäkuptinmi Josué kayno nirqan: <<Tsawraqa tsarararkaykashqayki ïdulukunata talamar ushapäkuy. Nirkur Tayta Dioslatana lapan shonquykiwan imaypis adorapäkuy>>.
24Tsayno niptinmi Israel runakuna kayno nipäkurqan: <<Noqakunaqa Tayta Diosnilantsitami imaypis sirvipäkushaq. Pay nishqalantami cäsukärishaq>>.
25Tsayno nipäkuptinmi tsay junaq Siquem markacho Israel runakunawan pactuta rurar Josué yätsirqan Tayta Diospa estatütunkunata y leyninkunata imaypis cumplipäkunanpaq. 26Lapan yätsishqankunatami Josué qelqarqan Tayta Diospa leyninkunata qelqashqan libruman. Tayta Diosta imaypis sirvinanpaq parlakushqanta yarpänanpaqmi jatun wankata ichitsirqan encina yöra sikinman. Tsay yöra nawpanchömi Tayta Diospa Sagrädu Toldun karqan.
27Nirkurnami runakunata Josué kayno nirqan: <<Kay wankami testïgu kaykan Tayta Diosnintsi imata nimashqantsita y payta imaypis sirvipäkunaykipaq awnipäkushqaykita. Mana cumpliptikiqa kay wankami careashunki Tayta Dios castigashunaykipaq>>.
28Tsayno tantiyarkatsirmi markankunapa kutikärinanpaq runakunata Josué nirqan.
Josué wanushqan
Jueces 2.6-10
29Tsaypita manaraqpis aykälatanami pachak chunka (110) watayuq kaykar Tayta Diospa sirviqnin Josué wanurqan. 30Wanuykuptinmi Timnat-seracho kikinpa chakranman pampapäkurqan.#Jos. 19.49-50. Tsayqa karqan Gaas jirka norti kaq lädupa y Efraín jalqakunachömi.
31Josué y Egiptupita wakin yarqamuqkunapis rikapäkurqan Israel runakunata yanapar milagrukunata Tayta Dios rurashqanta. Tsaymi paykuna kawashqanyaq Israel runakuna Tayta Dios munashqanno kawapäkurqan.
Josépa tulunkunata Israel runakuna pampashqan
32Israel runakunaqa Josépa tulunkunata Egiptupita apapäkamushqanta#Gén. 50.24-25; Éxo. 13.19. Siquem markaman apaykur chakranman pampapäkurqan. Tsay chakrataqa Josépa papänin Jacobmi rantirqan pachak (100) qellaywan Hamorpa tsurinkunapita.#Gén. 33.19; Juan 4.5; Hech. 7.16. Hamorqa Siquempa taytanmi karqan. Tsay chakratami Josépa tsurinkunapita miraqkunapa herencian kananpaq qoykurqan.
Eleazar wanushqan
33Aarónpa tsurin Eleazar wanuykuptinnami tsurin Fineespa chakranman pampapäkurqan. Tsayqa kaykan Efraín jalqakunacho kaykaq Gibeachömi.
Currently Selected:
Josué 24: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
