Jueces 10
10
Israel runakunapa jueznin Tola kashqan
1Abimelec wanuptinnami Tola jutiyuq runa Israel runakunata contrankunapita salvarqan. Tolaqa Isacar trïbu runami karqan. Payqa karqan Dodupa wilkan y Fúapa tsurinmi. Tolaqa tarqan Samir markachömi. Tsay markaqa Efraín jalqakunachömi kaykan. 2Payqa Israel runakunapa juezninmi karqan ishkay chunka kimsa (23) wata. Tola wanuykuptinmi pampapäkurqan Samir markaman.
Israel runakunapa jueznin Jair kashqan
3Tola wanuptinnami Galaadpita kaq Jairna Israel runakunapa jueznin karqan. Pay mandarqan ishkay chunka ishkay (22) watami. 4Jairpami karqan kimsa chunka (30) olqu tsurinkuna. Tsay tsurinkuna lapanpis bürrun muntashqalami puripäkuq. Paykunami Galaad particho kaykaq kimsa chunka markakunapa mandaqnin karqan. Tsay markakunatami kananyaqpis Jairpa markankuna kashqanta nipäkun. 5Jair wanuykuptinmi pampapäkurqan Camón markaman.
Israel runakunata amonita runakuna nakatsishqan
6Tsaypita Israel runakunaqa yapaymi Baal diosta y Astarot diösata adorar Tayta Diosta rabyanätsirqan. Tsaynöpis paykunaqa arameo, sidonio, moabita, amonita y filisteo runakunapa diosninkunata adorarmi Tayta Diosta mana sirvipäkurqannatsu. 7Tsayno kaptinmi Tayta Diosqa fiyupa rabyakushpan filisteo runakuna y amonita runakuna nakatsinanpaq kachariykurqan. 8Tsaymi Galaad particho taq Israel runakunata chunka pusaq wata fiyupa nakatsipäkurqan. Galaad partiqa kaykan Jordán mayu wak tsimpan amorreo runakuna tashqanchömi. 9Tsaynöpis amonita runakunaqa Jordán mayuta tsimparir atacapäkurqan Judá trïbu runakunata, Benjamín trïbu runakunata y Efraín trïbu runakunata. Tsaymi Israel runakunaqa pasaypa lakikur ima ruraytapis mana kamäpakur 10Tayta Diosta manakur kayno nipäkurqan: <<Tayta Dios, perdonaykalämay. Nishqaykita mana cäsukurmi Baal dioskunata adorar pasaypa jutsata rurapäkushqä>>.
11Tsayno manakuptinmi Tayta Dios kayno nirqan: <<Egipto runakuna, amorreo runakuna, amonita runakuna, filisteo runakuna, 12sidonio runakuna, amalecita runakuna y madianita runakuna nakatsipäkushuptikimi manakamarqayki. Tsayno manakamaptiki ¿manaku paykunapa munayninpita qamkunata jorqamushqä? 13Tsayno jorqaykämuptïpis juk dioskunata adorashpaykimi wiyakamashqankitsu. Tsaymi kananqa manana salvashaykinatsu. 14¡Tsay yärakushqayki dioskunatana manakäriy nakatsishushqaykipita salvashunaykipaq!>>
15 Tayta Dios tsayno niptinmi Israel runakuna kayno nipäkurqan: <<Qamta mana cäsukurmi jutsata rurapäkushqä, Tayta. Tsayno kaptinpis qam munashqaykino kaykulätsun. Imano kaptinpis kanan salvaykalämay>>.
16Tsayno nirmi Israel runakunaqa adorashqan ïdulunkunata ushakarkatsir Tayta Dioslatana adorapäkurqan. Tsaymi fiyupa nakapäkushqanta rikar Tayta Dios kuyaparqan.
17Tsaypitanami amonita runakuna pelyananpaq aywaykur Galaadcho campamentuta rurapäkurqan. Tsaymi Israel runakunapis juntakaykur Mizpacho campamentuta rurapäkurqan. 18Tsaychömi Galaad particho taq Israel mayor runakuna wilanakur kayno nipäkurqan: <<Amonita runakunawan pelyanantsipaq mayqantapis churashun mandamaqnintsi kananpaq>>.
Currently Selected:
Jueces 10: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
