Jueces 1
1
Judá y Simeón trïbu runakuna Adoni-bezecta prësu tsarishqan
1Josué wanuptinnami Israel runakuna Tayta Diosta tapukurqan kayno nir: <<¿Mayqan trïbu runakunataq cananeo runakunawan pelyaq puntata aywanqa, Tayta?>>
2Tsawraqa Tayta Dios kayno nirqan: <<Judá trïbu runakunami puntata aywapäkunqa. Cananeo runakuna tashqan markakunata paykunatami qoykushaq>>.
3Tsaymi Judá trïbu runakuna Simeón trïbu runakunata kayno nirqan: <<Noqakunata aypumashqan particho kaykaq cananeo runakunawan pelyaykäshilämay. Tsaynölami noqakunapis pelyäshishaykipaq qamkunata töcashushqayki particho>>.
Tsayno niptinmi paykunawan Simeón trïbu runakuna aywarqan pelyäshinanpaq.
4Bezecman yaykur cananeo y ferezeo runakunawan pelyaptinmi Tayta Dios yanaparqan ushakätsinanpaq. Tsaymi chunka waranqa (10,000) runakunata wanutsipäkurqan. 5Tsaycho taq cananeo y ferezeo runakunapa mandaqnin rey karqan Adoni-bezec. Payta y paywan kaykaq runakunatapis lapantami vincipäkurqan. 6Qeshpiykaqta taripaykurmi Adoni-bezecta prësu tsariykur makinpa y chakinpa maman dëdunta roqurqan. 7Tsawraqa rey Adoni-bezec kayno nirqan: <<Noqapis qanchis chunka (70) reykunapa chakinpa y makinpa maman dëduntami roqurqä. Paykunami mësäpita shikwashqa mikuyta mikur kawapäkurqan. Tsayno rurashqäpitami noqatapis Tayta Dios kanan castigaykäman>>.
Tsaypitanami rey Adoni-bezecqa Jerusalénman apaykuptin tsaycho wanurqan.
Hebrónman y Jerusalénman Judá trïbu runakuna yaykushqan
8Jerusalénman pelyaq aywarmi tsaycho taq runakunata Judá trïbu runakuna lapanta espädawan wanurkatsir wayinkunatapis rupatsipäkurqan. 9Tsaypitanami Neguevcho, jalqakunacho y Sefelacho taq cananeo runakunawan pelyaq aywapäkurqan.#Jos. 10.40; 11.21. 10Nirkurnami aywapäkurqan Hebrón markacho taq cananeo runakunawan pelyapäkunanpaq.#Jos. 10.36-37. Tsay markapa unay jutinmi karqan Quiriat-arba. Tsaychömi wanutsirqan Sesai runakunata, Ahimán runakunata y Talmai runakunata.
Debir markata Otoniel vincirkur qechushqan
Josué 15.15-19
11Tsaypitanami Debircho taq runakunata atacananpaqna yaykapäkurqan. Tsay markapa unay jutinmi karqan Quiriat-sefer. 12Tsaymi Caleb kayno nirqan: <<Pipis tsay markaman pelyaq yaykuykur vinciq kaqtami warmi tsurï Acsawan tätsishaq>>.
13Tsayno niptinmi Cenazpa tsurin Otoniel tsay markaman yaykuykur tsaycho taqkunata vincirqan. Paykunata vincirkuptinnami Calebqa tsurin Acsawan tätsirqan. Otonielqa karqan Calebpa shulka wawqinpa tsurinmi.
14Papäninpa wayinpita yarquykashqanchönami Otonielqa warmin Acsata kayno nirqan: <<Papänikita ruwakamuy chakrata rikatsimänantsipaq>>.
Tsawraqa bürrunpita Acsa urarpuptin papänin Caleb kayno tapurqan: <<¿Imatataq munaykanki, hïja?>>
15Tsaymi Acsaqa kayno nirqan: <<Ruwakuläshayki, papä. Neguevcho chakrata rikatsimashqaykinöla pukyuyuq chakrakunatapis rikaykatsilämay>>.
Tsayno niptinmi papänin rikatsirqan jana läducho y ura läducho pukyuyuq chakrakunata.
Judá y Benjamín trïbu runakuna cananeo runakunata vincishqan
16Ceneo runakunami Moiséspa suedrun Hobabpita miraq runakuna karqan. Paykunami Judá trïbuman talukaykur Palmëra Markapita aywapäkurqan Judá trïbu runakuna chaskishqan chunyaq jirkaman. Tsayqa Neguevcho kaykaq Arad cercanchömi karqan. Tsaychömi Judá runakunawan talukashqa tarqan.
17Tsaypitanami Judá trïbu runakuna Simeón trïbu runakunawan Sefatcho taykaq cananeo runakunata atacar chipyaq asulapäkurqan. Tsaymi tsay markapa jutinta churaparqan Horma#1.17 Horma ninanqa ushakashqa ninanmi. jutin kanananpaq. 18Tsaynölami Gazacho, Ascalóncho y Ecróncho taq runakunata vincirkur chakrankunatapis qechupäkurqan.
19 Tayta Dios yanapaptinmi Judá trïbu runakunaqa jalqakunacho taq runakunata wanutsipäkurqan. Costacho taq runakunatami itsanqa wanutsiyta mana kamäpakurqantsu, fiërrupita rurashqa guërra carrëtankuna kaptin. 20Moisés nishqannölami Hebrón partita Calebta qoykurqan. Tsayman chayaykurmi Anacpa kimsa tsurinkunapita miraqkunata qarqurqan.
21Benjamín trïbu runakunaqa Jerusaléncho taq jebuseo runakunata qarquyta manami kamäpakurqantsu. Tsaymi jebuseo runakunaqa kananyaqpis Benjamín trïbu runakunawan Jerusaléncho tarkaykan.
Manasés y Efraín trïbu runakuna Bet-el markaman yaykushqan
22 Tayta Dios yanapaptinmi Josépita miraq runakuna#1.22 Josépita miraq runakunaqa Manasés trïbu y Efraín trïbu runakunami karqan. Bet-el markacho taq runakunata atacar vincipäkurqan. 23Manaraq atacarmi tsay markaman runakunata kacharqan imano kashqantapis rikapakamunanpaq. Nawpataqa tsay markapa jutin karqan Luz. 24Rikapakuqkuna chayaykurmi tsay markapita yarqaykämuq runawan tinkur kayno nipäkurqan: <<Markaman maypa yaykapäkunäpaq rikatsimaptikiqa manami wanutsishaykitsu>>.
25Tsayno niptinmi mayninpa yaykunanpaqpis rikatsirqan. Tsaymi rikapakuqkuna kutiykur wilaptin Israel runakuna yaykuykur tsaycho taqkunata espädanwan lapanta wanutsipäkurqan. Markaman imano yaykunanpaq rikatsiq runata y aylunkunatami itsanqa promitishqanno mana wanutsirqantsu. 26Tsay runa heteo runakuna tashqan kaqman aywakurmi markata sharkarkatsir jutinta churaparqan Luz jutin kananpaq. Kananyaqpis tsay markapa jutin tsaylami kaykan.
Mayqan mayqan markakunata mana qechushqan
27Manasés trïbu runakuna manami qarquyta kamäpakurqantsu Bet-seán, Taanac, Dor, Ibleam y Meguido markakunacho taq runakunata y tsay markakunapa nawpankunacho taq runakunatapis. Tsaymi cananeo runakunaqa jinala tsay markakunacho tarkaykan. 28Tsaypita Israel runakuna atskaman mirarmi cananeo runakunata ashmaytano arutsir munaynincho tsarararqan. Paykunata qarquytami itsanqa mana kamäpakurqantsu.
29Efraín trïbu runakunapis manami qarquyta kamäpakurqantsu Gezercho taq cananeo runakunata. Tsaymi tsay cananeo runakuna Efraín trïbu runakunawan talukashqa tarkaykan.
30Zabulón trïbu runakunapis Quitrón y Naalal markakunacho taq cananeo runakunata qarquyta mana kamäpakurmi ashmaytano arutsir munaynincho tsarararqan. Tsaymi cananeo runakuna Zabulón trïbu runakunawan talukashqa tarkaykan.
31Aser trïbu runakunapis Aco, Sidón, Ahlab, Aczib, Helba, Afec y Rehob markakunacho taq runakunata manami qarquyta kamäpakurqantsu. 32Tsaymi cananeo runakunawan talukashqa tarqan.
33Neftalí trïbu runakunapis Bet-semes y Bet-anat markakunacho taq cananeo runakunata qarquyta mana kamäpakurmi munaynincho tsararar arutsirqan. Tsaymi cananeo runakuna Neftalí trïbu runakunawan talukashqa tarkaykan.
34Dan trïbu runakunataqa amorreo runakuna manami kachaparqantsu costacho kaykaq posisionninman yaykunanta. Tsaymi jalqaman kutipäkurqan tsaycho tänanpaq. 35Tsaynöpami amorreo runakunaqa tarqan Heres, Ajalón y Saalbim markakunacho. Qepataraqmi Josépita miraq Efraín y Manasés trïbu runakuna munayniyuq rikakur tsaycho taykaq amorreo runakunata munaynincho tsararar arutsirqan. 36Amorreo runakunapa lindërunqa aywararqan Acrabimpita qalaykur hasta Selapita mas janaqanyaqmi.
Currently Selected:
Jueces 1: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
