Gálatas 3

Pablo lakikushqan

1¡Mana tantiyakuq Galacia runakuna! Noqantsi rayku Jesucristo cruzcho wanushqanta shumaqmi tantiyapäkurqayki. Tsayno tantiyarkaykaptikiqa ¿pitaq kuchipa tulunta amupäshushqanki [lutan yachatsikuyta chaskikärinaykipaq]? 2Kanan mä wilapäkamay. ¿Qamkunaqa Moisés qelqashqan leykunata cumplirku o Jesucristupa wilakuyninta mayar payman yärakurku Espíritu Santuta chaskikärishqanki? 3¿Pasaypa mana tantiyakuqnaku karkaykanki? Espíritu Santu yanapashuptikimi Tayta Dios munashqanno kawayta qalaykärishqanki. Tsayno kaykaptinqa ¿imanirtaq Espíritu Santuta mana cäsur Moisés qelqashqan leykunata cumpliyta munarkaykanki? 4Tsayno karqa ¿manakaqlapaqtsuraq Jesucristuta chaskikärishqaykipita nakapäkushqanki? Manachi manakaqlapaqqa nakankimantsu karqan.

5¿Tsay leykunata cumplishqaykipitatsuraq Tayta Dios Espíritu Santuta qoshushqanki? Tsaynöpis ¿leykunata cumplishqaykipitatsuraq qamkunacho milagrukunata ruran? Manami tsaypitatsu, sinöqa Jesucristupa ali wilakuyninta mayar payman yärakärishqaykipitami.

Abrahamno yärakur salvashqa kashqantsi

6Yärakuptinmi Abrahamtapis jutsaynaqtana Tayta Dios chaskirqan.#Gén. 15.6; Rom. 4.3. 7Shumaq tantiyakäriy. Tayta Diosman noqantsipis yärakurqa mayqan aylu karpis Abrahampa aylunmi kaykantsi.#Rom. 4.16.

8Tayta Diospa palabranmi niykan mana Israel runakunatapis payman yärakushqanpita Tayta Dios perdonananpaq kashqanta. Tsaymi ali wilakuyninta Abrahamta wilapar Tayta Dios kayno nirqan: <<Qam yärakamashqaykipitami lapan casta runakunapis bendicionnïta chaskipäkunqa>>.#Gén. 12.3.

9Tsaymi Tayta Diosman yärakur Abraham bendicionta chaskishqanno noqantsipis bendicionta chaskiykantsi.#3.9 Tsay bendicionqa salvacionmi kaykan (Hech. 3.26).

10 Moisés qelqashqan leykunata cumplishqanpita salvashqa kashqanta yarpaqkunaqa lapanpis maldicionädumi kaykan. Tayta Diospa palabranchöpis kaynömi qelqaraykan: <<Qelqaraykaq leykunata lapanta mana cumpliq kaqqa maldicionashqami kanqa>>.#Deut. 27.26.

11Tsayno kaykaptinqa Moisés qelqashqan leykunawanqa manami mayqanpis salvakunqatsu. Tsaypa trukanqa Tayta Diospa palabrancho kaynömi niykan: <<Munashqäno kawaq runaqa noqaman yärakamarmi kawanqa>>.#Hab. 2.4; Rom. 1.17.

12Moisés qelqashqan leykunaqa manami Diosman yärakur salvakunantsipaqtsu niykan, sinöqa kaynömi niykan: <<Leynïkunata cumpliq kaq runaqa lapantami cumplinman>>.#Lev. 18.5; Rom. 10.5.

13Itsanqa tsay leykunata cumpliyta mana kamäpakurmi maldicionädu karqantsi. Tsaymi noqantsipa trukantsi maldicionädu runano wanur Jesucristo salvamashqantsi. Tayta Diospa palabranchöpis kaynömi qelqaraykan: <<Pï runapa ayanpis qerucho warkaraptin maldicionashqami kanqa>>.#Deut. 21.23.

14Jesucristupis tsayno wanurqan Abrahamta Tayta Dios promitishqan bendicionta mana Israel runakunapis chaskikärinanpaqmi. Tsaymi Jesucristuman yärakur Tayta Dios promitishqan Espíritu Santuta chaskikuntsi.

Abrahamta Tayta Dios promitishqan

15Wawqi panikuna, kananqa runakuna rurashqan testamentuman tinkutsiypami tantiyatsishayki. Musyashqantsinöpis testamentuta rurar firmaptinqa manami pipis manakaqman churannatsu ni imatapis tsayman yapantsu. Tsaynölami Tayta Dios promitishqanpis kaykan.

16Pay promitishqanqa Abrahampaq y paypita miraqpaqmi kaykan. Manami Abrahampita lapan miraqkunapaq kashqantatsu Tayta Dios nirqan, sinöqa paypita miraq juklaylapaq kashqantami.#3.16 Tsayno niykan Gén. 12.7 versïculuchömi. Hebreo y griego idiömachöqa atska miraqkuna nishqan y juklayla miraq nishqanpis tsay palabralami kaykan. Tsayno nir Jesucristupaqmi parlarqan.

17Tsaymi kayno nï: Abrahamwan pactuta [Cristucho] rurashqanpita chusku pachak kimsa chunka (430) watataraqmi Tayta Dios leyninkunata Moisésta entregarqan.#Éxo. 12.40. Qepataraq shamushqa karmi Abrahamta promitishqanta mana anulashqatsu. 18Tsaymi Moisés qelqashqan leykunata cumplishqantsipitatsu salvacionta chaskintsi, sinöqa Abrahamta promitishqanta Tayta Dios cumpliptinmi. Moisés qelqashqan leykunata cumplishqantsipita salvakunantsipaq kaptinqa Tayta Dios promitishqanpis manakaqlapaqmi kanman karqan.#Rom. 4.14.

Moisés qelqashqan leykuna imapaq kashqanpis

19Tsayno kaptinqa ¿imapaqtaq tsay leykuna kaykan? Tsay leykunata Moisésta entregarqan runakuna jutsayuq kashqanta tantiyakärinanpaqmi.#Rom. 3.20; 7.7. Tsaynöpis tsay leykuna karqan Jesucristo shamushqanyaqlami. Paymi kaykan Abrahamta Tayta Dios promitishqan runa.

Tsaynöpis Tayta Dios leyninkunata angilkunawanmi Moisésta entregatsirqan.#Hech. 7.38, 53; Heb. 2.2. Moisésnami tsay leykunata runakunata yachatsirqan. 20Abrahamta promitirmi itsanqa jukwan wilakatsinanpa trukanqa kikin Tayta Dios nirqan.

21Tsayno kaykaptinqa ¿Tayta Diospa leyninkuna salvamänantsipaqtsuraq kaykan? ¡Manami! Tsay leykuna salvamänantsipaq kaptinqa promitishqanta Tayta Dios manakaqmanmi churanman karqan. Tsaynöpis salvamänantsipaq kaptinqa leyninkunata cumplirmi salvakushwan karqan. 22Itsanqa Tayta Diospa palabran niykan lapantsipis jutsayuq kashqantsitami. Jesucristuman yärakurraqmi Tayta Dios promitishqanta chaskikur salvakuntsi.

23Jesucristuman manaraq yärakuptintsimi Moisés qelqashqan leykunaqa munaynincho tsararämarqantsi. Tsayno tsararämarqantsi Jesucristo shamushqanyaqmi. 24Tsurinta rïcu runa ashmayninpa makinman churashqannömi noqantsitapis tsay leykunapa munayninman Tayta Dios churamarqantsi. Tsayno churamarqantsi Jesucristo shamuptin payman yärakur salvakunantsipaqmi. 25Wamra shaksharkur ashmaqninpa makincho manana kashqannömi Jesucristuman yärakur Moisés qelqashqan leykunapa munayninchönatsu kaykantsi.

Tayta Diospa wamranna kashqantsi

26Wawqi panikuna, Jesucristuman yärakurmi kananqa Tayta Diospa wamrankunana kaykantsi. 27Tsaynöpis bautizakushpantsimi Jesucristuwan juklaylano kar paypa makinchöna kaykantsi. 28Tsaymi Israel runa karpis mana Israel runa karpis, ashmay karpis mana ashmay karpis, olqu karpis warmi karpis Jesucristucho karqa Tayta Diospa wamranna karkaykantsi. 29Tsaynöpis Jesucristuta chaskikur Abrahampita miraqnami kaykantsi. Tsaynöpami Abrahamta Tayta Dios promitishqanta noqantsipis chaskintsi.#Rom. 4.13.

Currently Selected:

Gálatas 3: qvmB

Highlight

Copy

Compare