Ezequiel 37

Tsakishqa tulukuna kawarimushqan

1Juk junaqmi atska tulukuna mashtaraykashqan pampaman Tayta Diospa Espïritun apamarqan. 2Tsayman chayaykatsimar kuchu kuchu puritsimaptinmi tsaytsika tulukuna pampa junta mashtaraykaqta rikarqä. Tsay tulukuna pasaypa yoraqashqami karqan. 3Tsawraqa kayno nimarqan: <<Runapa tsurin, ¿kay tulukuna kawarimunqatsuraq?>>

Tsayno nimaptinmi kayno nirqä: <<Tayta Dios, qamlami tsayta musyanki>>.

4Tsawraqa kayno nimarqan: <<Tsay tulukunata kayno wilanki: <Yoraqashqa kaykaq tulukuna, Tayta Dios nishqanta mayapäkuy. 5Tayta Diosmi kayno nin: Jämaynikita#37.5 Wakin runakunaqa jupaynikita nipäkun. Tsaynölami kaykan 37.7-10 versïculukunachöpis. qamkunaman kutitsimuptïmi kawaripäkamunkipaq. 6Anku ankuykita yuritsimurmi aytsaykitapis juntatsishaq. Nirkurmi qaraykitapis yurirkatsir jämaynikita kutitsiptï kawaripäkamunkipaq. Tsayraqmi Tayta Dios kashqäta musyapäkunkipaq> >>.

7Tsawraqa Tayta Dios nimashqannölami wilakurqä. Wilakuykaptï räyu pashtaptinmi patsa siksikyayta qalakuykurqan. Tsaymi tulukuna cuerpunman lapan juntakarqan. 8Rikaraykaptïmi tulukuna jananpa anku ankunkuna yurirqan. Aytsankuna juntaptinmi qaranpis yurirqan. Jämayninmi itsanqa mana karqanraqtsu.

9Tsawraqa Tayta Dios kayno nimarqan: <<Runapa tsurin, jämaynin shamunanpaq noqapa jutïcho qayakushpayki kayno niy: <Tayta Diosmi kayno nin: Kawatsikuq jämay, chuskun lädupita shamur kay wanushqa jitarpaykaqkuna kawarinanpaq yaykapäkuy> >>.

10Tayta Dios nimashqannöla wilakuykaptïmi jämaynin yaykuptin kawarirkamur ichipäkurqan.#Apoc. 11.11. Yupaytapis mana atipaypaq tsaytsika soldädukunanöraqmi karqan.

11Tsawraqa Tayta Dios yapay kayno nimarqan: <<Runapa tsurin, kay tulukunanömi Israel runakuna kaykan. Paykunami kayno nirkaykan: <Tsakishqa tuluno kashpantsi tsaynölanachari imaypis kawashun. Tsayno kashpantsi mananami ima ruraytapis kamäpakuntsinatsu. Chipyaq ushakashqanönami kaykantsi>.

12<<Tsayno niptinpis Israel runakunata kayno ninki: <Tayta Diosmi kayno nin: Kuyashqä runakuna, juk lädu nacioncho kashpayki panteoncho yoraqashqa tuluno kaptikipis qamkunata jorqamurmi Israel nacionman kutitsipäkamushayki. Wanushkunata kawaritsimuqnömi ali kawanaykipaq yanapashaykipaq. 13Tsayno ruraptïmi Tayta Dios kashqäta musyapäkunkipaq.

14<< <Wanushqano kaptikipis Espïritüta qamkunaman churamur kawarirkatsimurmi markaykikunaman kutitsimushayki. Tsaymi musyapäkunkipaq Tayta Dios kar nishqäta rasunpa cumplishqäta>. Tayta Diosmi tsayno nin>>.

Judáta y Israelta juklatsananpaq nishqan

15 Tayta Diosmi kayno nimarqan: 16<<Runapa tsurin, juk qeruman qelqay <Judápita kaq Israel runakuna> nir. Juk qerumanna qelqay <Efraínpita kaq Israel runakuna> nir. 17Nirkur juklatsakashqa kananpaq ishkanta choqparkuy. Tsaynöpami ishkan juklaylanöna kanqa.

18<<Imapaq tsayta rurashqaykitapis tapushuptiki 19kayno ninki: <Tayta Diosmi kayno nin: Efraínpita kaq y Judápita kaq Israel runakunatami juklatsashaq. Tsaynöpami ishkanpis makïcho kanqapaq>.

20<<Tsay qelqashqayki qerukunata Israel runakuna rikananpaq ishkanta choqparkur aptaranki. 21Nirkur kayno ninki: <Tayta Diosmi kayno nin: May nacioncho kaptinpis Israel runakunata jorqarkamurmi kikinkunapa nacionninman pushashaq. 22Juk nacionlana kananpaqmi paykunata Israelcho juklatsashaq. Paykunapa mandaqnin reypis juklaylanami kanqa. Mananami imaypis ishkay nacionman rakikanqanatsu. 23Melanashqä ïdulukunatapis manami adoranqanatsu ni jutsatapis ruranqanatsu. Conträ sharkushqa kaptinpis perdonashpämi salvashaq. Paykunami kuyashqä runakuna kanqa y noqanami paykunapa Diosnin kashaq.

24<< <Sirvimaqnï Davidmi mandaqnin rey kanqa. Pay japalanmi mitsiqnin kanqa.#Eze. 34.24. Tsaymi nishqäkunata cäsukamashpan leynïkunata y yachatsishqäkunatapis cumplinqa. 25Sirvimaqnï Jacob tashqan y paykunapa unay aylunkuna tashqan nacionchömi tanqa. Tsurinkunapis y paykunapita miraqkunapis tsaychömi imayyaqpis tanqa. Sirvimaqnï Davidmi imayyaqpis paykunapa mandaqnin rey kanqa.

26<< <Paykunawanmi jawka kawananpaq pactuta rurashaq. Tsay pactu rurashqäqa manami imaypis ushakanqatsu. Atskaman mirananpaqmi kamakätsishaq. Imaypis paykunawan kanäpaqmi templütapis paykuna tashqancho ruratsishaq. 27Tsaynöpami paykunawan täshaq. Noqami Diosnin kashaq. Paykunanami kuyashqä runakuna kanqa.#2Cor. 6.16; Apoc. 21.3. 28Templü paykunacho imayyaqpis kaptinmi maytsay nación runakuna musyanqa Israel runakunata kuyaq Tayta Dios kashqäta. Paykunata akrashqä santu kananpaqmi> >>.

Currently Selected:

Ezequiel 37: qvmB

Highlight

Copy

Compare