Éxodo 29

Cürakunata churananpaq tantiyatsishqan

Levítico 8.1-36

1<<Aarón y tsurinkuna sirvimaq cürakuna kananpaq churashpayki akranki sänu turituta y ishkay sänu carnikunata. 2Tsaynöpis ruranki alinnin harinapita levadüraynaq tantata, aceitiwan masarashqa levadüraynaq tantata y aceitiwan lushipashqa levadüraynaq lapsha tantatapis. Lapan tsay tantakunata ruranki trïgu harinapita. 3Tsay rurashqayki tantakunata canastaman winarkur apamunki. Tsaynöpis turituta y ishkan carnita Tinkunantsi Tolduman apamunki.

4<<Nirkur Aarónta y tsurinkunata Tinkunantsi Toldu patiuman pushaykamur armatsinki. 5Nirkur Aarónta jatipanki tünicata, sotänata, efodta y pechërata. Tsaykunata jatiparkur efodpa wachkunwan wachkapanki. 6Tsaynöpis umanman görrata jatiparkur sagrädu vinchata#Éxo. 28.36; 39.30. jananman churapanki. 7Tsayno jatiparkur noqata sirvimaq cüra kananpaq Aarónpa umanman sagrädu aceitita winapanki. 8Nirkur Aarónpa tsurinkunata qayaykur tünicata jatipanki. 9Aarónta wachkunwan wachkapashqaykino paykunatapis wachkapanki. Görratapis jatipanki. Tsaynöpami noqata sirvimaq cüra kapäkunanpaq churanki. Paykuna y paykunapita miraqkuna imayyaqpis sirvimaq cürakuna kanqapaq.

10<<Tsaypita turituta apamunki Tinkunantsi Toldu patiuman. Tsaychömi Aarón y tsurinkunapis turitupa umanman makinta churapäkunqa. 11Nirkurna Tinkunantsi Toldu patiucho tsay turituta nawpächo pishtanki. 12Yawarninman dëduykita töparkatsir altarpa waqrankunata lushinki. Nirkurna putsuq kaq yawarta altar chakinman talinki. 13Pacha wiranta, natincho kaykaq wiranta y ishkan rurunta wirantinta altarcho rupatsinki. 14Aytsanta, qaranta y ashashninkunataqa campamentupita juk läduman apaykur rupatsinki. Turituta altarcho rupatsishqaykiqa purificatsina sacrificiumi kanqa.

15<<Tsaypitanami jukaq carnipa umanman Aarón y tsurinkuna makinta churanqa. 16Tsaypitana pishtarkur yawarninwan altarpa chuskun lädunkunata tsaqtsupanki. 17Aytsantana cuartutsarkur aqishninta y atakshunkunatapis maylanki. Tsaypitana altarman umantinta churarkur 18lapanta rupatsinki. Tsay rupatsishqaykipa ali asyayninta#29.18 Wakin runakunaqa mushkuyninta nipäkun. mayarmi noqa Tayta Dios kushikushaqpaq.#Efe. 5.2; Fil. 4.18.

19<<Jukaq carnipa umanmanpis Aarón y tsurinkuna makinta churarkuptin 20tsay carnita pishtanki. Yawarninta shuntarkur ichiklata lushinki Aarónpa y tsurinkunapa alawqa kaq rinrinpa ura puntanta. Tsaynöpis yawarwan lushinki alawqa kaq makinpa y chakinpa maman dëduntapis. Putsuq kaq yawartana altarpa chuskun waqtankunaman tsaqtsupanki. 21Altarta tsaqtsupashqayki yawarta shuntarkur putsuq kaq aceitiwan Aarónta y röpankunatapis tsaqtsupanki. Tsaynöla tsurinkunata y röpankunatapis tsaqtsupanki. Tsaynöpami Aarón y tsurinkuna noqata sirvimaqnï cüra kananpaq consagrädu kanqa. Röpankunapis listuna kanqa jatikurkur sirvimänanpaq.

22<<Nirkurna jorqunki pishtashqayki carnipa chupa wiranta, pacha wiranta, natincho kaykaq wiranta, ishkan rurunta wirantinta y alawqa kaq chankantapis. Tsayno jorqunki Aarón y tsurinkuna cüra kananpaq pishtashqayki carni kaptinmi. 23Noqapa nawpächo kaykaq canastapita jorqunki juk jatun tantata, aceitiwan masarashqa juk tantata y juk lapsha tantatapis. Lapanpis tsay tantakunaqa levadüraynaqmi kanqa. 24Lapan tsaykunata Aarónta y tsurinkunata aptapanki noqapa nawpäman joqarir wakman kayman kuyutsinanpaq. 25Tsayno rurarkuptin tsay tantakunata shuntanki. Nirkur jukaq carnita rupatsina sacrificiupaq rupatsishqaykinöla tsaykunatapis altarcho rupatsinki. Tsay rupatsishqaykipa ali asyayninta mayarmi noqa Tayta Dios kushikushaqpaq. 26Aarónta sirvimaq cüra kananpaq churar pishtashqayki carnipa pëchuntapis noqapa nawpäman joqarir wakman kayman kuyutsinki. Tsay aytsaqa qampaqmi kanqa.

27<<Tsay joqarimushqayki pëchunta y alawqa kaq chankantaqa rakinki 28Aarónpaq y paypita miraqkunapaq. Cadala jawka kawakuy sacrificiu noqapaq kaptin tsaykunata Israel runakunapita imaypis chaskipäkunqa. Tsay nishqäkunaqa qamkunapaq imayyaqpis leymi kanqa.

29<<Aarón wanuptin sagrädu röpankuna paypita miraqkuna jatikunanpaqmi kanqa. Tsay röpakunata jatikärinqa sagrädu aceitita tsaqtsupar cüra kananpaq churashqan hörami. 30Tinkunantsi Tolduman yaykunanpaq mayqanpis Aarón aylupita cüra kananpaq churaptin qanchis junaq tsay röpata jatiranqa.

31<<Pishtashqan carnipa wakin aytsanta yanunki sagrädu lugarcho.#29.31 Tsay sagrädu lugarqa altar nawpankunami karqan. Tsayta musyanaykipaq liyinki Lev. 10.12-13. 32Tsay aytsata y canastacho putsuq tantata Aarón y tsurinkunami mikunqa Tinkunantsi Toldu patiucho. 33Cüra kananpaq churashqanpita purificatsina sacrificiu kaptinmi tsay aytsa y tantakuna paykuna mikunanpaq kanqa. Cüra mana karqa tsay sagrädu mikuykunata pipis ama mikunqatsu. 34Tantata y aytsata tsay junaq mana ushaptinqa putsuq kaqta rupatsinki. Tsaytaqa sagrädu kaptin pipis ama mikunqatsu.

35<<Aarónta y tsurinkunatapis cüra kananpaq churashpaykiqa nishqänöla lapan tsaykunata ruranki. Cüra kananpaq churapäkunki qanchis junaqyaq. 36Tsay qanchis junaqyaq waran waran juk turituta pishtarkur rupatsinki Aarón y tsurinkuna purificashqa kananpaq. Tsaynöpis tsay rupatsishqaykikunaqa altar purificashqa kananpaqmi kanqa. Nirkur altar jananman aceitita winapanki sagrädu kananpaq. 37Tsayno sacrificiuta waran waran rupatsinki qanchis junaqyaq. Tsaynöpami altar sagrädu kaptin tsayta töpaq kaqqa imapis sagrädu rikakunqa.

Altarcho waran waran rupatsinanpaq tantiyatsishqan

Números 28.1-8

38<<Mana qonqaypa waran waran juk watayuq ishkay carnishta pishtarkur altarcho rupatsipäkunki. 39Jukaq carnishta rupatsipäkunki patsa waraykaptin y jukaqtana rupatsinki patsa tsakaykaptin. 40Punta kaq carnishpa aytsanta altarcho rupatsishpayki ishkay kïlu alinnin harinata juk litru olïvupita rurashqa aceitiwan pichuykur rupatsipäkunki. Tsay jananman winapanki juk litru vïnuta. 41Tutapa rupatsishqaykinöla jukaq carnishtapis pichushqayki harinatawan altarcho tardipa rupatsipäkunki. Tsayno rupatsir vïnutapis jananman winapanki. Tsay rupatsishqaykipa ali asyayninta mayarmi noqa Tayta Dios kushikushaqpaq.

42<<Tsayno rupatsipäkushqaykiqa noqapaq rupatsina sacrificiumi kanqapaq. Tsaytaqa qamkuna y qamkunapita miraqkunapis Tinkunantsi Toldu patiuman apaykur imaypis nawpächo rupatsipäkunki. Tsaychömi imaypis tinkushun parlanantsipaq. 43Tsaychömi Israel mayikikunawanpis tinkushaq. Kikï tsaycho kaptïmi tsay patiu sagrädu kanqapaq.

44<<Tinkunantsi Toldupis y patiucho kaq altarpis sagrädumi kanqa. Aarónta y tsurinkunatapis noqami churashaq cüra kashpan sirvimänanpaq. 45Israel runakuna kashqancho tarmi paykunapa Diosnin kashaq. 46Tsaynöpami Tayta Diosnin kashqäta musyapäkunqa. Noqami Egiptupita jorqamushqä paykuna kaqcho tänäpaq. Paykunapa Tayta Diosninmi noqa kaykä.

Currently Selected:

Éxodo 29: qvmB

Highlight

Copy

Compare