Éxodo 28

Cürakunapa röpankunata ruratsinanpaq tantiyatsishqan

Éxodo 39.1-31

1<<Israel runakunapita wawqiki Aarónta y tsurinkuna Nadabta, Abiúta, Eleazarta y Itamarta churanki sirvimaq cürakuna kananpaq. 2Wawqiki Aarón respitädu cüra kar jatikunanpaq kuyaylapaq sagrädu röpankunata ruratsinki. 3Röpankunata ruratsinaykipaqqa yachayta qoshqä runakunata tantiyatsinki imano rurananpaqpis. Tsay röpata jatikurmi sirvimaq cüra kananpaq consagrädu kanqa. 4Wawqiki Aarón y tsurinkunapis jatikunanpaq ruratsinki pechërata, efodta, sotänata, bordashqa tünicata, görrata y wachkuta. Paykunami tsay sagrädu röpata jatiranqa akrashqä cürakuna kar sirvimänanpaq. 5Tsay röpakunata awapäkunqa qori hïlupita, azul, granäti y puka milwa hïlukunapita y llanula putskashqa lïnu hïlupita.

Efodta ruratsinanpaq tantiyatsishqan

Éxodo 39.2-7

6<<Efodta awatsinki qori hïlupita,#Éxo. 39.3. azul, granäti y puka milwa hïlukunapita y llanula putskashqa lïnu hïlupita. Tsayta awanqa shumaq awayta yachaqkunami. 7Tsaynöpis efodpa ishkan kuchuncho tirantikuna kanqa umrunman shawananpaq. 8Efodpa wachkuntapis ruratsinki qori hïlupita, azul, granäti y puka milwa hïlukunapita y llanula putskashqa lïnu hïlupita. Tsay wachkuqa efodwan juklaylanömi kanqa.

9<<Tsaynöpis ishkay ónice rumikunaman Israelpa tsurinkunapa jutinkunata qelqatsinki. 10Tsayno qelqatsinki qechpapita qalaykur hasta nunushyaq. Juknin kaq rumiman soqta jutikunata qelqatsinki y jukaq rumimanpis soqta jutikunata qelqatsinki. 11Tsay jutikunata rumipita sëlluta ruraqno alhäja ruraq runawan qelqatsinki. Tsay rumikuna mana yarqunanpaq qeshwanta qoripita ruraykatsir siguratsinki. 12Tsay ishkay rumikunata efodpa tirantinkunaman churatsinki cürapa umruncho kananpaq. Tsaynöpana nawpäman Aarón yaykamur umruncho apamunqa Israelpa tsurinkunapa jutinkunata imaypis yarparänanpaq. 13Tsay rumikunapa qeshwankunata qoripita ruratsinki. 14Rumikuna kaykashqan kuchunpa churatsinki piltashqa ishkay qori cordonta.

Pechërata ruratsinanpaq tantiyatsishqan

Éxodo 39.8-21

15<<Pëchunman churakunan pechëra kanqa imata yarpashqätapis cüra musyananpaq.#28.15 Pechëra rurinchömi Urim y Tumim nishqan rumikuna karqan. Tsay rumikunawanmi cüra suertita rikaq Tayta Dios imata munashqanta musyananpaq. Tsaypita masta musyanaykipaq liyinki Éxo. 28.30. Tsaytapis ruratsinki efodta ruratsishqaykinöla. Tsaymi kanqa qori hïlupita, azul, granäti y puka milwa hïlukunapita y llanula putskashqa lïnu hïlupita. 16Tsayno rurarkatsir doblanki bolsano cuadrädu kananpaq. Largunpis anchunpis ishkay chunka ishkay (22) centïmetru kanqa. 17Nirkur tsayman churatsinki chusku fïla kuyaylapaq rumikunata. Punta kaq fïlaman churatsinki sárdica rumita, topacio rumita y carbunclo rumita. 18Ishkay kaq fïlamanna churatsinki esmeralda rumita, zafiro rumita y diamanti rumita. 19Kimsa kaq fïlamanna churatsinki jacinto rumita, ágata rumita y amatista rumita. 20Chusku kaq fïlamanna churatsinki berilo rumita, ónice rumita y jaspe rumita. Tsay rumikuna mana yarqunanpaq qoriwan qeshwanta ruraykatsir siguratsinki. 21Tsay rumikuna kanqa chunka ishkaymi. Tsayno chunka ishkay kanqa Israelpa tsurinkuna chunka ishkay kashqanno. Cada rumiman juk trïbupa jutinta qelqatsinki rumipita rurashqa sëlluno kananpaq.

22<<Pechërapaq cordonkunata qori hïlupita piltatsinki. 23Nirkur ishkay taksha argöllakunata qoripita ruratsinki. Tsay argöllakunata tanatsinki pechërapa jana kaq ishkan esquïnanman. 24Nirkurna tsay argöllakunaman qoripita piltashqa cordonta pasatsinki. 25Cordonpa ishkan puntankunatana siguratsinki umruncho kaq qeshwankunaman. Tsayqa wataranqa pëchunchömi.

26<<Tsaynöpis ishkay taksha argöllakunata qoripita ruratsinki pechërapa ura kaq kuchunkunaman churananpaq. Tsay argöllakuna pechëra rurincho kar efod janancho kanqa. 27Tsaynöpis ishkay taksha argöllakunata qoripita ruratsinki efodpa wachkun jana lädunman churananpaq. Tsaykunami efodpa tirantinkunacho kar tinkuranqa pechërapa costüranman. 28Tsawraqa pechërapa y efodpa argöllankunata azul cordonwan watanki efodpita mana yarqunanpaq.

29<<Lugar Santuman pechëran jatishqa Aarón yaykurmi Israelpa tsurinkunapa jutinkunata pëchuncho apanqa. Pechëran jatishqa nawpächo kaptinmi paykunata y paykunapita miraqkunata imaypis yarparäshaq. 30Tsay pechëraman Urimta y Tumimta#Núm. 27.21; Esd. 2.63; Neh. 7.65. winanki pëchuncho Aarón apananpaq. Tsaynöpami Lugar Santuman yaykur noqapa nawpächo imaypis tsararanqa alipaq kaqta y mana alipaq kaqtapis Israel runakunata tantiyatsinäpaq.

Mandaq cürapa wakin röpankunata ruratsinanpaq tantiyatsishqan

Éxodo 39.22-31

31<<Efodpa rurinman jatikunanpaq azul hïlupita sotänata awatsinki. 32Uman yaykunanpaq tsay sotäna kunkayuqmi kanqa. Sotänapa kunkan mana rachinanpaq rebëtinta jirapanki. Tsay rebëtin kanqa qara casäcapa rebëtinno. 33Sotänapa ura kuchunpa granädatano bordatsinki azul, granäti y puka milwa hïlukunawan. Tsaynöpis tsay kuchunpa qoripita rurashqa campanillakunata churatsinki. 34Tsaynöpami juk qori campanilla, juk granäda, juk qori campanilla, juk granäda sotäna kuchuncho tumariq kanqa. 35Tsay sotänan jatishqami Lugar Santuman imaypis Aarón yaykunqa. Tsaymi sirvimänanpaq yaykuptinpis y yarqamuptinpis campanillan waqashqan mayakämunqa. Sotänan jatishqa yaykurqa manami wanunqatsu.

36<<Tsaynöpis qoripita vinchata ruratsinki. Nirkur tsayman qelqatsinki kayno nir: <Tayta Diospa karmi santu>. Tsayta qelqatsinki rumipita rurashqa sëlluno kananpaq. 37Tsay ruratsishqayki vinchata Aarónpa görranman azul cordonwan watapanki. 38Tsay vinchata Aarón imaypis urkuncho jatiranqa. Tsaynöpami Israel runakuna sagrädu sacrificiukunata apamuptin munashqäno mana kaptinpis perdonashaqpaq. Israel runakunapa trukan Aarónnami jutsayuq kanqapaq.

39<<Aarónpaq tünicatapis lïnu hïluwan awarkatsir shumaq bordatsinki. Görrantapis lïnu hïlupita awatsinki.#28.39 Aarónpa görranqa manami iti wamrapa görran niraqtsu karqan, sinöqa lïnu tëlapita rurashqa corönanömi. Wachkuntapis kuyaylapaqta bordatsinki.

40<<Aarónpa tsurinkuna kamaraqla kananpaq tünicakunata, wachkukunata y görrakunata ruratsinki kuyaylapaqta. 41Tsaykunata rurarkatsir wawqiki Aarónta y tsurinkunata jatipanki. Nirkur umanman sagrädu aceitita winapanki sirvimaq cürakuna kananpaq.

42<<Tsaynöpis penqayninta tsapananpaq tseqlapita qonquryaq lïnupita calzoncïllunta ruratsinki. 43Tsay calzoncïllutaqa Aarón y tsurinkuna jatikunqa Tinkunantsi Tolduman yaykunanpaq. Tsaynin jatishqami Lugar Santucho kaq altarchöpis sirvimanqa. Calzoncïlluynaq yaykurqa jutsayuq kar wanunqapaqmi. Tsay nishqäkunaqa imayyaqpis leymi kanqa Aarónpaq, tsurinkunapaq y paypita miraqkunapaqpis.

Currently Selected:

Éxodo 28: qvmB

Highlight

Copy

Compare