Éxodo 25

Sagrädu Tolduta ruratsinanpaq y ofrendata shuntananpaq tantiyatsishqan

Éxodo 35.4-9

1Sinaí jirkacho kaykaptinmi Moisésta Tayta Dios kayno nirqan: 2<<Israel runakunata ninki ofrendata noqapaq apapäkamunanpaq. Ofrendata churayta munaqkunaqa lapan shonqunwan apapäkamunqa 3qorita, qellayta, broncita, 4azul, granäti y puka milwa hïlukunata, llanula putskashqa lïnu hïluta y cabrapa aqtsanpita putskashqa hïlutapis. 5Tsaynöpis apapäkamunqa pukaman tinishqa uysha pirqashta, fïnu qarata, acacia qeruta, 6candelabru ratananpaq aceitita, sagrädu aceitiman y inciensuman takutsinanpaq perfümita,#Éxo. 30.23-25. 7ónice rumikunata y wakin kuyaylapaq rumikunatapis. Tsay rumikunaqa kanqa mandaq cürapa efodninta y pechëranta#Éxo. 28.6-30. adornananpaqmi.

8<<Tsay ofrendata apamushqankunawan Sagrädu Tolduta ruratsinki. Tsaynöpami paykuna tashqancho imaypis täshaqpaq. 9Tsay tänäpaq Sagrädu Tolduta y manëjunkunatapis ruratsinaykipaqmi rikatsishayki. Rikashqaykinöla lapanta ruratsinki.

Pactu Babulta ruratsinanpaq tantiyatsishqan

Éxodo 37.1-9

10<<Acacia qerupita ruratsinki juk babulta. Tsay babulpa largun kanqa juk metru chunka centïmetru. Anchun y altunpis kanqa soqta chunka pitsqa (65) centïmetru. 11Jananpa y rurinpa qoriwan enchapatsinki. Tsaynöpis intëru kuchunpa qoripita rebëtinta rurarkur jiruruq churatsinki. 12Qoripita chusku argöllata rurarkatsir churatsinki chuskun chakinkunaman, ishkayta babulpa jukaq lädunman y ishkaytana babulpa jukaq lädunman. 13Acacia qerupita ishkay largu qeruta rurarkatsir qoriwan enchapatsinki. 14Nirkur tsay qerukunata argölla uchkunpa pasatsinki babulta wintupäkunanpaq. 15Tsay qerukunata pasatsishqaykiqa jinalanchöna kakunqa. Tsaypita amana jorqutsinkitsu. 16Tsay babulmanqa churanki pactu rurashqantsita cumplinaykipaq kaq mandamientukunata.

17<<Babulpa tsapananta qori pürupita ruratsinki. Largun kanqa juk metru chunka centïmetru. Anchun kanqa soqta chunka pitsqa (65) centïmetru. 18Tsaynöla martilluwan takaylapa ishkay querubinkunata qoripita ruratsinki. Nirkurna babulpa tsapanan ishkan kuchunman churatsinki. 19Tsapananta y querubinkunataqa ruratsinki tsay piëzalatami. Jukaq querubín kanqa itsuq kaq läduncho y jukaqnami kanqa alawqa kaq läduncho. 20Tsay ishkan querubinkunami älankuna mashtashqa frenti frenti babulpa tsapananta rikarpaykanqa. Tsaynöpami ishkanpa älankuna tsapananta lantupanqa. 21Babul rurinman pactu rurashqantsi mandamientukunata churaykur tsapananwan tsapanki. 22Pactu Babulpa tsapanan janancho ishkay querubinkuna chawpinpitami qamta wilashayki Israel runakunata imata ninaykipaq kaqtapis.

Tanta churakuna mësata ruratsinanpaq tantiyatsishqan

Éxodo 37.10-16

23<<Tsaynöpis acacia qerupita mësata ruratsinki. Tsay mësapa largunmi kanqa isqun chunka (90) centïmetru. Anchunnami kanqa chusku chunka pitsqa (45) centïmetru. Altunnami kanqa soqta chunka pitsqa (65) centïmetru. 24Tsay mësapa jananta, rurinta y chakinkunatapis qoriwan enchapatsinki. Kuchunkunapapis qoripita rurashqa rebëtinta jiruruq churatsinki. 25Tsaynöpis qanchis centïmetru anchuta qeruta jiruruq churatsinki. Tsay jananmannami qoripita rurashqa juk rebëtita churatsinki. 26Tsaynöpis chusku argöllakunata qoripita rurarkatsir mësapa chuskun chakinkunaman churatsinki. 27Tsay argöllakuna churaranqa chakinpita rebëtinman tinkuraqcho. Tsay argöllakunapa ishkay largu qerukuna pasanqa mësata wintupäkunanpaq. 28Mësa wintukuna qerukunatapis acacia qerupita rurarkatsir qoriwan enchapatsinki.

29<<Tsay mësapaq qori pürupita ruratsinki plätukunata, wishlakunata, järrakunata y pucillukunata. Tsay järrakuna y pucillukunaqa vïnuta altarman winapänanpaqmi kanqa. 30Nawpächo kananpaq tsay mësaman tantata imaypis churatsinki.#Lev. 24.5-8.

Candelabruta ruratsinanpaq tantiyatsishqan

Éxodo 37.17-24

31<<Tsaynöpis candelabruta qori pürupita martilluwan takaylapa ruratsinki. Tsay candelabrupa jamakunan, chakin, cöpankuna y waytankunapis juk piëzala kanqa. 32Tsay candelabru soqta rikrayuqmi kanqa. Kimsa rikranmi jukaq lädupa kanqa y kimsa rikranmi jukaq lädupa kanqa. 33Cada rikrancho kimsa waytakunata ruratsinki. Tsay waytakuna kanqa almendrupa waytan niraq. 34Candelabrupa chakinchöpis kanqa chusku waytankuna. Tsay waytakunapis kanqa almendrupa waytan niraq. 35Cada rikran tinkuraqcho kanqa juk wayta. 36Waytankunapis y rikrankunapis tsay piëzala kanqa. Lapanpis qori pürulapita martilluwan takaylapa rurashqa kanqa.

37<<Candelabrupa qanchis mechërunkunata ruratsinki. Tsay mechërukunata candelabrupa cada puntankunaman jukta churatsinki nawpanman atsikyänanpaq.#25.37 Nawpanman atsikyarqa qori mësacho kaykaq chunka ishkay tantakunatami atsikyaparqan. Tsayta musyanaykipaq liyinki Éxo. 40.22, 24. 38Mëchapa liptanta jorqunanpaq taksha alicätikunapis y lipta shuntakunan taksha plätukunapis qori pürupita kanqa. 39Tsay candelabruta y lapan manëjunkunata ruratsinki kimsa chunka kimsa (33) kïlu qoripita.

40<<Lapanta ruratsinki kay puntacho rikatsishqätanöla.#Hech. 7.44; Heb. 8.5.

Currently Selected:

Éxodo 25: qvmB

Highlight

Copy

Compare