Deuteronomio 5

Chunka mandamientukuna

Éxodo 20.1-17

1Tsaypitanami Israel runakunata qayaykatsir Moisés kayno nirqan: <<Israel runakuna, kanan wilanäpaq kaq estatütukunata y mandamientukunata shumaq chaskikäriy. Nishqanno kawapäkunaykipaq mana qonqaypa shumaq yachakäriy.

2<<Tayta Diosnintsimi Horeb puntacho noqantsiwan pactuta rurarqan. 3Manami unay ayluntsikunawantsu tsay pactuta rurarqan, sinöqa noqantsiwanmi. 4Horeb puntacho nina rataykaqpitami kikin Tayta Dios parlapämarqantsi. 5Tsay rupaykaq puntaman witsayta mantsakäriptikimi noqalana witsarqä Tayta Dioswan parlamunäpaq. Kutiykamurmi qamkunata wilarqä imata nimashqantapis. Tsay puntachömi kayno nimarqan:

6<< <Noqaqa Tayta Diosnikimi kaykä. Egiptucho ashmay kashqaykipitami jorqamushqä.

7<< <Juk dioskunamanqa ama yärakunkitsu.

8<< <Ima ïdulutapis ama rurankitsu jana patsacho kaykaq niraqta, kay patsacho kaykaq niraqta ni lamar rurincho kaykaq niraqtapis. 9Tsaykunamanqa ama qonqurpakunkitsu ni adorankitsu.#Lev. 26.1; Deut. 4.15-18; 27.15. Noqalami [munayniyuq] Tayta Diosniki kaykä. Noqalata adoramänaykitami munä. Tsaymi mana cäsukamar ïdulukunata adoraqkunataqa castigashaq kikinta, tsurinta, wilkanta y wilkanpa tsurintapis. 10Noqata kuyamar mandamientükunata cumpliqkunatami itsanqa waranqa (1,000) generación kashqanyaq kuyapar yanapashaq.#Éxo. 34.6-7; Núm. 14.18; Deut. 7.9-10.

11<< <Tayta Diosnikipa jutinta lutalaqa ama joqarinkitsu.#Lev. 19.12. Jutinta lutala joqariq kaqtaqa castiganqami.

12<< <Tayta Diosniki nishushqaykinöla jamay junaq sagrädu kashqanta ama qonqankitsu.#Éxo. 16.23-30; 31.12-14. 13Semänacho soqta junaq arushpayki lapan ruranaykipaq kaqkunata ruranki. 14Qanchis kaq junaqchöqa Tayta Diosnikita adorashpayki ama arunkitsu.#Éxo. 23.12; 31.15; 34.21; 35.2; Lev. 23.3. Tsaynöpis ama arutsinkitsu tsurikikunata olqutapis warmitapis, ashmaynikikunata olqutapis warmitapis, töruykita, bürruykita ni ima uywaykitapis ni nacionnikicho jäpa runakunatapis. Tsaynöpami olqupis warmipis ashmayniki qamkunawan iwal jamanqa. 15Yarpay Egiptucho ashmay kashqaykita. Tsayno kaykaqtami Tayta Diosniki munayninwan jorqamushurqayki. Nirkurmi nishurqayki jamay junaqcho adorar jamanaykipaq.

16<< <Tayta Diosniki nishushqaykinöla mamaykita y taytaykita respitanki.#Deut. 27.16; Mat. 15.4; 19.19; Mar. 7.10; 10.19; Luc. 18.20; Efe. 6.2. Tsaynöpami qoykushunaykipaq kaq nacioncho atska wata ali kawankipaq.#Efe. 6.3.

17<< <Runa mayikita ama wanutsinkitsu.#Gén. 9.6; Lev. 24.17; Mat. 5.21; 19.18; Mar. 10.19; Luc. 18.20; Rom. 13.9; Stg. 2.11.

18<< <Majaykita ama jarukunkitsu.#Lev. 20.10; Mat. 5.27; 19.18; Mar. 10.19; Luc. 18.20; Rom. 13.9; Stg. 2.11.

19<< <Ama suwakunkitsu.#Lev. 19.11; Mat. 19.18; Mar. 10.19; Luc. 18.20; Rom. 13.9.

20<< <Manakaqtaqa pitapis ama tumpankitsu.#Éxo. 23.1; Mat. 19.18; Mar. 10.19; Luc. 18.20.

21<< <Runa mayikipa warminta ama munapankitsu.#Rom. 7.7; 13.9. Tsaynöpis wayinta, chakranta, warmi ashmayninta, olqu ashmayninta, törunta, bürrunta ni imaykankunatapis duëñu tukunaykipaq ama yarpaylapis yarpankitsu> >>.

Israel runakuna mantsakur Moisésta ruwakärishqan

Éxodo 20.18-26

22<<Jirka chakincho juntaraykaptiki y puntacho kaykaptïmi tsay mandamientunkunata Tayta Dios rupaykaq nina chawpinpita y yanawyaykaq pukutaypita fuertipa nimurqan. Tsaypitaqa tsay junaq manami mas imatapis rimamurqannatsu. Nirkurmi ishkay läja rumiman qelqarkur entregamarqan.

23<<Yanawyaykaq tsakaypita parlamushqanta mayarmi y puntacho nina rupaykaqta rikarmi cada trïbupa mandaqninkuna y mayor runakuna shamurkur 24kayno nimarqan: <Tayta Diosnintsiqa nina rataykaqpita rimamurmi musyatsimashqantsi pasaypa munayniyuq kashqanta. Tsayno parlamuptinpis manami wanurqantsitsu. 25Tsayno kaptinpis mantsakümi. Kayjinanpa nina rupaykarqa noqakunatapis ushapäkamanqachari. Tayta Diosnintsi parlamushqanta yapay mayapäkushpäqa wanupäkushaqpaqchari. 26Kanan mayaykashqantsino nina rataykaqpita imayyaqpis kawaq Tayta Dios parlamuqta mayarqa manami pipis kawanqatsu.#Heb. 12.18-19. 27Tayta Diosnintsi imata nishqantapis mayanaykipaq mejor kikilayki aywaykulay. Pay nishushqaykita wilamaptiki lapantami cäsukur cumplipäkushaq, tayta>.#Éxo. 19.8; 24.3.

28<<Tsayno nimashqaykita mayarmi Tayta Dios kayno nimarqan: <Kay runakuna nishushqaykita mayashqämi. Nishqäkunata cäsukur cumplipäkunanpaq yarpashqanqa alimi kaykan. 29Alimi kanman kanan yarpashqannöla imayyaqpis mantsakamar mandamientükunata waran waran cumplipäkuptin. Tsawraqa kikinkunapis tsurinkunapis kushishqami kawapäkunqa. 30Kay puntapita kutiykur paykunata wilanki toldunkunaman kutikärinanpaq. 31Qammi itsanqa kayman yapay kutimunki lapan mandamientükunata, estatütükunata y leynïkunata wilanäpaq. Tsaykunatami yachatsinki qoykunäpaq kaykaq nacionman chayaykur cäsukärinanpaq> >>.

32 Tayta Dios tsayno nishqanta yarparkatsirmi Israel runakunata Moisés kayno nirqan: <<Kananqa Tayta Diosnintsi nishushqaykita lapanta cäsukäriy. 33Pay nishushqaykinöla lapanta cäsukäriy. Cäsukushpaykiqa qoykushunaykipaq kaq nacioncho awkinyashqaykiyaq alimi kawapäkunkipaq>>.

Currently Selected:

Deuteronomio 5: qvmB

Highlight

Copy

Compare