Deuteronomio 3

Mandaq rey Ogta Israel runakuna vincishqan

Números 21.31-35

1<<Tsaypitanami Basán nacionman aywaq nänipa aywarqantsi. Tsayta musyaykurmi Basán nacionpa mandaqnin rey Og lapan soldädunkunawan Edreiman shamurqan atacamänantsipaq.

2<<Tsaymi Tayta Dios kayno nimarqan: <Tsay runakunataqa ama mantsakuytsu. Noqami yanapashayki lapan soldäduntinta vincir nacionnintapis munaynikiman churapäkunaykipaq. Hesbóncho taq amorreo runakunapa mandaqnin rey Sehónta ushakätsishqaykinömi paykunatapis ushakätsinkipaq>.

3<<Tsaynöpami Tayta Diosnintsi makintsiman churamurqan Basán nacionpa mandaqnin rey Ogta y lapan nacionninta. Lapan soldädunkunata ushakätsiptintsi manami juklaylapis kawaykar qeshpirqantsu. 4Tsaymi nacionnincho kaykaq lapan markakunata ni juktapis mana kachaypa qechurqantsi. Tsay markakunaqa Argob particho soqta chunkami (60) karqan. 5Lapan markakunapis altuyaq murallashqami karqan. Yaykuna punkunkunapis shumaq sigurashqami karqan. Tsaynölami muralläni atska markakunatapis qechurqantsi. 6Tsay markakunata ushakätsirmi runatapis, warmitapis y wamratapis lapanta wanutsirqantsi. Hesbón markacho taq rey Sehónta y nacionninta ushakätsishqantsinömi paykunatapis ushakätsirqantsi. 7Paykunapa uywankunata y imaykankunatapis väliq kaqkunalatami apakurqantsi.

8<<Tsaynöpami Jordán mayu tsimpan inti jeqamunan kaq läducho amorreo runakunapa ishkay mandaqnin reykunata vincirkur nacionninkunata qechurqantsi. Tsay qechushqantsikuna kaykan Arnón mayupita patsa hasta Hermón puntayaqmi. 9(Hermón puntatami Sidón runakunaqa Sirión nipäkurqan. Amorreo runakunanami Senir nipäkurqan.) 10Tsaynöpis qechurqantsi pampacho kaykaq markakunata, Galaad partita y lapan Basán nacionta Salca markapita qalaykur hasta Edrei markayaq. Tsaycho kaq markakunataqa rey Og munayninchömi tsarararqan. Tsay markakunata lapantami qechurqantsi>>.

11Basán nacionpa mandaqnin rey Ogqa jatunkaray refaíta runami karqan. Payta wanutsiptintsi manami mas refaíta runakuna karqannatsu. Paypa catrin fiërrupitami karqan. Catrinpa largun karqan chusku metru y anchunnami karqan ishkay metruno. Amonita runakuna taykashqan Rabá markachömi kananyaqpis catrin kaykan.

Rubén trïbu, Gad trïbu y pulan Manasés trïbu runakuna posisionta chaskishqan

Números 32.1-42

12<<Qechushqantsi markakunata chakrantintami Rubén trïbu runakunata y Gad trïbu runakunata rikatsirqä. Tsay markakuna kaykan Arnón mayu nawpan Aroer markapita qalaykur hasta pulan Galaad jalqakunayaqmi.

13<<Tsaypita aywaraq Galaad jalqakunata y Og mandashqan Basán naciontami pulan Manasés trïbu runakunata rikatsirqä. Basáncho kaykaq Argob partiqa refaíta runakunapami karqan. 14Argob partitaqa Manasés trïbu Jair jutiyuq runami qechurqan hasta Gesurpa y Maacapa lindërunyaq. Qechurkurnami tsay partita kikinpa jutinta churaparqan Havot-jair#3.14 Havot-jair ninanqa Jair sharkatsishqan markakuna ninanmi. jutin kananpaq. Kananyaqpis tsay jutilami kaykan. 15Galaad partitanami Maquir aylu runakunata rikatsirqä.

16<<Rubén trïbu runakunata y Gad trïbu runakunatami rikatsirqä pulan Galaad partipita hasta Arnón mayuyaq. Tsaymi lindërun kaykan Arnón mayupita hasta Jaboc mayuyaq. Jaboc mayupitanami amonita runakuna tashqan parti qalaykun. 17Tsaynöpis Arabá pampata paykunata rikatsirqä Cineret qochapita#3.17 Cineret qochaqa Galilea qochami kaykan. hasta Arabá Lamaryaq. Arabá Lamarqa Kachi Lamarmi kaykan. Inti jeqanan kaq lädupami lindërun kaykan Jordán mayu. Inti jeqamunan kaq lädupanami Pisga nishqan punta kaykan.

18<<Tsay witsanmi Rubén trïbu, Gad trïbu y pulan Manasés trïbu runakunata kayno nirqä: <Tayta Diosnintsi kay partikunata qoykushuptikipis armaykita apakurkur Israel mayikikunata pelyäshinaykipaq puntanta aywapäkuy. 19Noqa musyämi tsaytsika uywaykikuna kashqanta. Tsaymi rikatsishqä markakunacho warmiki y tsurikikuna uywaykikunata rikar quëdapäkunqa. 20Markaykikunaman ama kutimunkiraqtsu Israel mayikikunata Jordán mayu tsimpancho posisionninta Tayta Diosnintsi manaraq qoptinqa. Qamkunata posisionta Tayta Dios qoshushqaykino paykunatapis posisionta qoptinraq kutipäkamunki>.#Jos. 1.12-15.

21<<Josuétapis kaynömi nirqä: <Rikashqankimi Tayta Diosnintsi tsay ishkay reykunata imano ushakätsishqantapis. Tsaynölami ushakätsinqa yaykunaykipaq kaq nacionkunacho taq runakunatapis. 22Tayta Diosnintsimi qamkunapa favorniki pelyanqa. Tsayno kaykaptinqa ama mantsakäriytsu>.

Canaánman Moisés mana yaykunanpaq tantiyatsishqan

23<<Tsaypitami Tayta Diosta manakur kayno nirqä: 24<Tayta Dios, munayniyuq kashqaykitami tantiyaykätsimanki. Qampita mas munayniyuqqa jana patsachöpis ni kay patsachöpis manami ima diospis kantsu. Qam rurashqaykino ima milagrutapis rurananpaq manami mayqan diospis kantsu. 25Kananqa ruwakushayki, Tayta. Kuyaylapaq jalqakunata y Líbanutapis rikaykunäpaq Jordán mayuta tsimpaykatsilämay>.

26<<Tsayno ruwakuptïpis Tayta Diosta rabyanätsishqaykipitami aywanäta mana munar kayno nimarqan: <Tsaytaqa ama manakamaynatsu. 27Tsaypa trukanqa Pisga nishqan puntaman witsarkur intërupa rikachakunki. Jordán mayutami itsanqa mana tsimpankipaqtsu.#Núm. 27.12-14; Deut. 32.48-52. 28Tsay rikanaykipaq kaq nacionmanqa Josuénami Israel runakunata pushanqapaq. Tsayno kaykaptinqa payta shakyätsinki tsay nacionta aypunanpaq>. 29Tsayno nimaptinmi Bet-peor tsimpan pampacho quëdakurqantsi>>.

Currently Selected:

Deuteronomio 3: qvmB

Highlight

Copy

Compare