Deuteronomio 2

Chunyaq jirkapa Israel runakuna atska wata purishqan

1<<Tsaypita Tayta Dios nimashqanno Puka Lamarpa aywaq nänipa#Núm. 21.4. chunyaq jirkaman aywapäkurqantsi. Seir jalqakuna kinraypa atska watami puripäkurqantsi. 2Tsayno puriptintsimi Tayta Dios kayno nimarqan: 3<Aläpanami kay jalqakunapa purirkaykanki. Kananqa norti kaq lädupana aywapäkuy. 4Tsawraqa Israel mayikikunata kayno ninki: <<Seir jalqakunapita yarqunantsipaq Jacobpa wawqin Esaúpita miraq runakuna tashqanpanami pasashun.#Gén. 36.8; Núm. 20.14-21. Paykuna pasaypa mantsakamaptintsipis alcäbula pasashun. 5Esaúpita miraqkunatana Seir jalqakunata qoykushqa kaykaptïqa paykunawan ama pelyapäkuytsu. Paykunapa nacionnincho kaykaq chakrantaqa manami ni juk pedäzulatapis qoykushaykipaqtsu. 6Paykunapataqa mikuynintapis qellaywan rantipäkunki. Yakuntapis upunaykipaq pägapäkunki>> >.

7<<Lapan rurashqantsichömi Tayta Dios bendicionta qomashqantsi. Tsaymi chusku chunka (40) wata chunyaq jirkapa puriptintsi imapis mana pishïmarqantsitsu. 8Tsayno kaptinmi Jacobpa wawqin Esaúpita miraqkuna taykashqan Seir jalqakunapa mana pasarqantsitsu. Tsaypa pasar Arabá pampapa aywaq nänipa pasanantsipa trukanqa Moab chunyaq jirkapa aywaq nänipana aywarqantsi. (Arabá pampaqa Elat y Ezión-geber markakunapitami qalaykun.) 9Moabpa pasaptintsi Tayta Dios kayno nimarqan: <Lotpita#Gén. 19.37; Núm. 21.10-20. miraq moabita runakunata achäquita ama ashipaytsu ni paykunawan ama pelyaytsu. Paykunatami Ar partikunata qoykushqä. Tsaymi paykunapa nacionninta ni takshannin chakralatapis mana qoykushaykipaqtsu> >>.

10(Moabita runakuna nacionninman manaraq chayaptinqa emita runakuna tsay partikunacho tarkaykarqan. Paykunapa markankunaqa atskami karqan. Anacpita miraq runakunanömi paykunapis jatusaq karqan. 11Tsay runakunata refaíta jutiwan wakin runakuna reqiptinpis moabita runakunami emita jutiwan reqipäkurqan. 12Tsaynöpis Seir particho horeo runakunami unayqa tarqan. Paykunataqa Esaúpita miraqkunami ushakarkatsir tsaycho tarkaykan. Tsaynölami Israel runakunapis Tayta Dios qoykushqan nacionpita cananeo runakunata qarqupäkurqan.)

13<<Tsaypitami Tayta Dios kayno nimarqan: <Kaypita aywakärishpayki Zered mayuta päsay>. Tsaymi Zered mayuta tsimpapäkurqantsi. 14Cades-barneapita yarqamushqantsi junaqpita Zered mayuta pasamushqantsi junaqyaq kimsa chunka pusaq (38) watami karqan. Tsayyaqmi guërraman aywananpaq kaq censashqan runakuna Tayta Dios nishqanno lapanpis chunyaq jirkacho ushakarqan.#Núm. 14.28-35. 15Tayta Diosmi paykunata castigashpan lapanta ushakätsirqan.

16<<Lapan wanur ushakarkuptinnami 17Tayta Dios kayno nimarqan: 18<Moab nacionpa lindërunta pasashpayki kanan Ar marka läduman aywapäkuy. 19Amonita runakunaman chayashpayki achäquita ama ashipankitsu ni paykunawan ama pelyankitsu. Lotpita#Gén. 19.36-37; Núm. 21.10-20. miraqkuna kaptinmi amonita runakunata tsay partikunata qoykushqä. Tsaymi paykuna tashqan naciontaqa mana qoykushaykipaqtsu> >>.

20(Unayqa tsay nacioncho refaíta runakunami tarqan. Paykunatami amonita runakuna nirqan zomzomeo runakuna kashqanta. 21Refaíta runakunapa markankunaqa atskami karqan. Tsaynöpis Anacpita miraq runakunanömi jatusaq karqan. Tsayno kaptinpis amonita runakunatami Tayta Dios yanaparqan tsay runakunata ushakarkatsir tsaycho tänanpaq. 22Tsaynölami Esaúpita miraqkunatapis Tayta Dios yanaparqan Seircho taq horeo runakunata ushakarkatsir tsaycho tänanpaq. 23Caftorpita#2.23 Caftorqa karqan Creta islapa unay jutinmi. Caftor runakunatami Canaánman chayaptin filisteo jutiwan reqipäkurqan. shamuq runakunami Gaza nawpankunapa taksha markakunacho taq aveo runakunata ushakarkatsir tsaycho tarqan.)

24<<Tsaymi Tayta Dios kayno nimarqan: <Arnón mayuta jukla pasapäkuy. Noqami qamkunapa munaynikiman churashaq amorreo runakunapa mandaqnin rey Sehónta y nacionnintapis. Payqa Hesbón markachömi taykan. Paykunata atacashpayki nacionninman yaykapäkuy. 25Kananpitaqa maytsaycho taq runakunapa shonqunmanmi fiyupa mantsakuyta churashaq mantsakärishunaykipaq. Tsaymi qamkunapaq parlaqta mayashpan pasaypa mantsakushpan siksikyanqa>.

Rey Sehónta vincipäkushqan

Números 21.21-30

26<<Cademot chunyaq jirkapita patsami kachakunata Hesbón markacho taykaq rey Sehónman kacharqä ali shimilanpa kayno nir ruwakamunanpaq: 27<Nacionnikipa pasaq nänilaykipachari pasakuykuläshaq, tayta. Maypapis mana jeqaykachaypa jatun nänilapa pasakäriläshaq. 28Mikuynikita mikushqäpita y yakuykita upushqäpitapis pägapäkushaykimi. Tsaymi ruwakü nacionnilaykipa pasakärinäpaq. 29Seircho taq Esaúpita miraq runakuna y Archo taq moabita runakunapis nacionninpa pasakärinäpaq kachapämashqami. Tsaynöla qampis kachapaykalämay, tayta. Tayta Diosnï promitipäkamashqan posisiontaqa Jordán mayu wak tsimpanchöraqmi chaskipäkushaq>.

30<<Tsayno nir ruwakuptintsipis rey Sehón manami munarqantsu nacionninpa pasamunantsita. Tsayno mana munananpaqqa Tayta Diosmi shonqunta chukruyätsirqan. Tsaymi soldädunkunawan atacamaptintsi Tayta Dios yanapamarqantsi vincikur kananyaqpis makintsicho tsararänantsipaq.

31<<Tsawraqa Tayta Dios kayno nimarqan: <Kananpitaqa Sehónta nacionnintinta ushakätsinaykipaqmi makikiman churaykämü. Nacionninman yaykuykur posisionniki kananpaq tsarikäriy>.

32<<Nacionninpa pasamunantsita mana munarmi Sehónqa soldädunkunawan shamurqan Jahazacho noqantsiwan pelyananpaq. 33Tsayno kaptinpis Sehónta, tsurinkunata y soldädunkunatapis makintsimanmi Tayta Diosnintsi churamurqan lapanta ushakätsinantsipaq. 34Tsaymi lapan markankunaman yaykuykur runatapis, warmitapis y wamratapis lapanta ushakätsirqantsi. Kawaykaqtaqa manami juklaylatapis kachaykurqantsitsu. 35Uywankunata y imaykankunatapis väliq kaqlatami apakamurqantsi. 36Arnón mayu nawpancho kaykaq Aroer markapita y mas uraqancho kaykaq markapita qalaykur Galaad partiyaq manami mayqan markacho taqkunapis ichipämarqantsitsu. Tayta Diosnintsi poderninwan yanapamaptintsimi lapanta ushakätsirqantsi. 37Amonita runakuna tashqanmanmi itsanqa mana yaykurqantsitsu. Tsaymi Jaboc mayuta mana pasarqantsitsu y jalqakunacho kaq markakunamanpis mana yaykurqantsitsu. Maymanpis mana yaykunantsipaq Tayta Diosnintsi nimaptintsiqa manami yaykurqantsitsu.

Currently Selected:

Deuteronomio 2: qvmB

Highlight

Copy

Compare