Daniel 9
9
Jerusalénpaq Tayta Diosta Daniel manakushqan
1Media nacionpita kaq Asuerupa tsurin Darío Babilonia#9.1 Hebreo idiömachöqa Caldea ninmi. Caldeaqa Babiloniapa jukaq jutinmi kaykan. nacionpa mandaqnin rey juk watana kaykaptinmi 2noqa Daniel liyiykarqä Tayta Diospa wilakuyninta profëta Jeremías qelqashqanta.#Jer. 25.11; 29.10. Tsayta liyirmi tantiyashqä qanchis chunka (70) watayaq Jerusalén marka raqäla kananpaq kashqanta. 3Tsawraqa qachqa röpata jatikurkur y uchpaman jamaykur ayunashpä Tayta Diosta manakurqä. 4Manakurmi kayno nirqä:
<<Tayta Dios, lapanpaq munayniyuq y mantsakuypaqmi kanki. Kuyashushpayki mandamientuykikunata cumpliqkunapaqqa pactu rurashqaykita imaypis cumplinkimi. 5Noqakunaqa jutsata rurarmi mana alikunata rurapäkushqä. Mana wiyakuqmi kapäkushqä. Mandamientuykikunata y leynikikunata manami cäsukärishqätsu. 6Reykunata, autoridäkunata, unay aylükunata y lapan runakunatapis sirvishuqniki profëtakuna qampa jutikicho wilakuynikita yachatsiptinpis manami cäsukärishqätsu.
7<<Tayta Dios, imaypis alilatami ruranki. Noqakunami itsanqa lutankunata rurar pasaypa penqakuypaq karkaykä. Lapanïmi Israel runakuna tsayno karkaykä Jerusaléncho tarpis, Judá particho tarpis, Israel nacionpa cercancho tarpis o karu nacioncho tarpis. Qam nishqaykita mana cäsukärishqäpitami maytsay nacionkunamanpis qarqapäkamashqanki. 8Tayta Dios, mandamaqnï reykunapis, autoridänïkunapis, unay aylükunapis y kikïkunapis qamta mana cäsukuypami jutsata rurapäkushqä. Tsaymi pasaypa penqakuypaq karkaykä. 9Noqakuna mana cäsukuq kaptïpis qamqa kuyapäkuq y perdonakuq Tayta Diosnïmi kaykanki.
10<<Tayta Diosnilä, sirvishuqniki profëtakuna yachatsipäkamashqan leynikikunatapis manami cäsukärishqätsu. 11Leynikikunata mana cäsukurmi lapanï lutanta rurapäkushqä. Tsaymi sirvishuqniki Moisés qelqashqan leykunacho nishqanno noqakunaman maldición chayamushqa. 12Castigapäkamänaykipaq nishqaykinömi noqakunata y autoridänïkunata mantsakuypaq castïguwan ushakätsimashqanki. Jerusalénta castigashqaykinöqa manami imaypis kay patsacho may markatapis castigashqankitsu.
13<<Tayta Diosnilä, kay nakaykunaqa Moisés qelqashqan leykunacho nishqannömi noqakunaman chayamushqa. Tsayno nakapäkurpis manami perdonamänaykipaq ruwakärimushqätsu. Jutsa ruraytapis manami noqakuna kacharishqätsu. Ni leynikikunatapis manami cäsukärishqätsu. 14Tsaymi alilata ruraq kar mantsakuypaq castïguta kachamushqanki. Tsayno castigaykämaptikipis manami cäsukärishqätsu.
15<<Tayta Diosnilä, munaynikiwanmi kuyashqayki Israel runakunata Egiptupita jorqamurqayki. Tsaypita patsami kananyaqpis maytsaycho musyakaykan munayniyuq kashqayki. Tsayta musyaykarmi jutsata rurapäkushqä.
16<<Tayta, kuyapäkuq kaykarqa sagrädu jirkannikicho kaykaq Jerusalénta tsayjinanpa ama castigaykulaynatsu. Unay aylükunapis y kikïkunapis jutsata rurapäkuptïqa Jerusalén markata y kuyashqayki runakunata lapan nacionkunacho taq runakuna manakaqmanmi churapäkaman.
17<<Tayta Diosnilä, kanan manakamur ruwakamushqäta mayaykalämay. Jutiki raykulapis juchutsishqa kaykaq templuykita kuyapaykulay. 18Tayta Dios, manakamushqäta mayaykalämay. Ushakashqa kaykaq Jerusalén markaykita kuyapaykulay. Tsayno manakamü manami jutsaynaq kartsu, sinöqa kuyapäkuq kashqaykita musyarmi.
19<<Tayta Dios, ¡manakamushqäta mayaykalämay! ¡Jutsa rurapäkushqäta perdonaykalämay! ¡Yanapaykalämay, Tayta! ¡Jutiki rayku y akrashqayki marka rayku jukla salvaykalämay!>>
Qanchis chunka semänapita tantiyatsishqan
20Tsayno nirmi jutsata rurashqäpita y Israel mayïkuna jutsata rurashqanpita Tayta Diosta ruwakur perdonta manakurqä. Tsaynöpis akrashqan sagrädu jirkanpaq ruwakurqä. 21Tsayno manakuykaptïmi sacrificiuta templucho tardipa rupatsinan höra ángel Gabriel päriypa nawpäman chayamurqan. Paytami nawpa kaq revelacionchöpis rikarqä.
22Paymi tantiyatsimar kayno nimarqan: <<Daniel, noqa shamushqä lapan rikashqaykita shumaq tantiyatsinäpaqmi. 23Manakuyta qalaykuykaptilaykimi ruwakushqaykita Tayta Dios awnishqa. Tsaymi pasaypa kuyashushpayki wilanäpaq kachamashqa. Tayta Diospa wilakuyninta tantiyatsiptï kanan shumaq mayamay.
24<<Qanchis chunka (70) semänami#9.24a Kay versïculukunacho semänapaq parlarqa manami qanchis junaqpaqtsu parlaykan, sinöqa qanchis watakunapaqmi. Tsaymi qanchis chunka semänapita parlar chusku pachak isqun chunka (490) watakunapitami parlaykan. destinashqa kaykan Israel mayikikuna y Tayta Dios akrashqan sagrädu markacho taqkuna mana cäsukuq kashqanta, jutsa rurashqanta y lutan rurashqanta kacharinanpaq. Tsay tiempu kaykan Tayta Dios munashqanno runa mayinwan ali kawapäkunanpaq, profëtakuna wilakushqankuna cumplikänanpaq y mas sagrädu kaqta#9.24bMas sagrädu kaq nishqanpaqmi wakinkuna yarpan Lugar Santïsimu kashqanta, wakinkuna yarpan templu o templucho kaykaq altar kashqanta, wakinkuna yarpan mandaq cüra kashqanta y wakinkunanami yarpan kikin Jesucristo kashqanta. dedicapäkunanpaqmi.
25<<Kay nishqäta shumaq tantiyakuy. Jerusalén markata yapay sharkatsinanpaq ordenashqan junaqpita Tayta Dios akrashqan mandaq shamunanyaq qanchis semänami pasanqa y tsay jananmanmi soqta chunka ishkay (62) semäna pasanqa.#9.25 Cada semäna qanchis wata kaptinmi qanchis semäna chusku isqun (49) wata kanqa y soqta chunka ishkay (62) semäna chusku pachak kimsa chunka chusku (434) wata kanqa. Pasaypa nakaykuna kaptinpis Jerusalén markapa cällinkunata y murällankunatapis altsapäkunqami.
26<<Soqta chunka ishkay semänakuna pasarkuptinnami Dios akrashqan runata ushakätsinqa. Juk mandaq runa soldädunkunawan shamurnami Jerusalén markata y santu templuta chipyaq juchutsir ushakätsinqa. Löcu tamya elaqpita shamur imaykatapis ushashqannömi elaqpita kikinpis ushakanqapaq. Tsay tiempu ushakänanyaqmi Tayta Dios destinashqanno guërrapis y wanutsinakuypis kanqa.
27<<Juk semäna masmi tsay mandaq runa atska runakunawan pactuta ruranqa. Nirkurmi pulan tsay semänacho#9.27 Cada semäna qanchis wata kaptinmi pulan semäna kanqa kimsa wata pulan. mana kachapanqatsu sacrificiukunata y tsaki mikuy ofrendakunata altarcho rupatsipäkunanpaq. Nirkurmi altarpa nawpanman Tayta Dios mana munashqan kaqta churanqapaq.#Mat. 24.15; Mar. 13.14. Tsayno kanqa hasta Tayta Dios destinashqan tiempu cumplikänanyaqmi>>.
Currently Selected:
Daniel 9: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
