Hechos 7

Autoridäkunapa nawpancho Esteban parlashqan

1Tsaypita mas mandaq cürami Estebanta tapurqan kayno nir: <<¿Rasunpaku kay runakuna nishqanno parlashqanki?>>

2Tsawraqa Esteban kayno nirqan: <<Wawqikuna y taytakuna, mayapäkamay. Unay ayluntsi Abraham manaraq Haránman aywakur Mesopotamiacho taykaptinshi munayniyuq Tayta Dios yuriparqan. 3Tsaycho yuriparkurshi kayno nirqan: <Markaykita y ayluykita kachaykur aywakuy rikatsinäpaq kaq partiman>.#Gén. 12.1.

4<<Tsayno niptinshi caldeo runakuna tashqanpita aywakur Harán markachöna Abraham tarqan.#Gén. 11.31. Taytan wanuykuptinnashi Tayta Dios pushamurqan kanan taykashqantsimanna.#Gén. 12.4. 5Kaycho taykaptinpis manashi juk pedäzu chakralatapis rikatsirqantsu. Mana rikatsirpis tsurin manaraq kaptinshi Tayta Dios promitirqan taykashqan nacionta payta y paypita miraqkunata qoykunanpaq.#Gén. 12.7; 13.15; 15.18; 17.8. 6Tsaynöpis payta kayno nirqan: <Qampita miraqkunami chusku pachak (400) wata juk markacho jäpa runakunapa ashmaynin kar nakapäkunqa. 7Tsayno kaptinpis tsay marka runakunatami castigashaq. Ashmay kaykashqanpita yarqamurnami kay nacioncho sirvipäkamanqa> >>.#Gén. 15.13-14.

8<<Tsayno promitishqanta mana qonqananpaqshi Abrahamwan Tayta Dios pactuta rurar nirqan cuerpunta señalakunanpaq y olqu tsurinkuna yuriptin paykunapa cuerpuntapis señalananpaq.#Gén. 17.10-14. Tsayshi tsurin Isaac yuriykuptin cuerpunta señalarqan pusaq junaqyuqla kaykaptin.#Gén. 21.2-4. Tsaynölashi Isaacpis tsurin Jacobta señalarqan y Jacobpis chunka ishkay tsurinkunata señalarqan. Tsay chunka ishkay tsurinkunapitami lapan Israel runakuna mirashqa.

9<<Jacobpa tsurinkunanashi wawqin Joséta chikir#Gén. 37.11. Egiptuman rantikurqan.#Gén. 37.28. Tsayno kaptinpis Tayta Diosshi Joséwan kar#Gén. 39.2, 21. 10tukuy desgraciapitapis salvarqan. Tantiyakuq kananpaq yanapaptinshi Egipto nacionpa mandaqnin Faraón churarqan palaciuncho aruqkunata mandananpaq y Egipto naciontapis mandäshinanpaq.#Gén. 41.39-41.

11<<Tsay witsanshi Egiptucho y Canaánchöpis fiyupa usya kaptin unay ayluntsikuna muchuycho karqan.#Gén. 42.1-2. 12Tsayshi Egiptucho trïgu kashqanta mayaykur Jacobqa tsurinkunata kacharqan trïguta rantimunanpaq. 13Trïguta rantimunanpaq yapay kutiptinnashi paykunapa wawqin kashqanta José wilarqan.#Gén. 45.1. Nirkurnashi Josépa wawqinkunata Faraónpis reqirqan.#Gén. 45.16. 14Tsaypitanashi aylunkunata y taytan Jacobta Egiptuman José qayatsirqan.#Gén. 45.9-10, 17-18. Egiptuman chayaqkuna qanchis chunka pitsqa (75) runakunashi karqan.#Gén. 46.27. 15Tsaynöpashi tsurinkunawan Egiptuman Jacob aywakärirqan.#Gén. 46.1-7. Tsaycho taykarshi paypis y tsurinkunapis wanurqan.#Gén. 49.33.

16<<Jacobpa y Josépa ayantashi tsakirkatsir Siquem markaman apapäkurqan.#Gén. 50.1-8; Éxo. 13.19; Jos. 24.32. Tsaychöshi Abraham rantishqan machayman pampapäkurqan. Tsay machaytashi Hamor runapa tsurinkunapita rantirqan.#Gén. 23.3-10; 33.19; 50.12-13; Jos. 24.32.

17<<Abrahamta promitishqanta Tayta Dios cumplinanpaq tiempu chayaptinnashi Israel runakuna Egiptucho tsaytsikaman mirashqa karqan. 18Tsay witsanshi juk runana yaykurqan Egiptucho rey kananpaq. Payqa manashi musyarqantsu José pï kashqantapis.#Éxo. 1.7-8. 19Tsayshi unay ayluntsikunata Faraónqa fiyupa nakatsishpan aläpa arutsirqan.#Éxo. 1.10-11. Ayluntsikuna mirananta mana munarshi olqu yuriq kaqtaqa yuriylanta jitarinanpaq nirqan.#Éxo. 1.22.

20<<Tsay witsanshi Moiséspis yurirqan. Payqa kuyaylapaqshi karqan. Taytan mamanshi kimsa killayuq kashqanyaq wayilancho ashmarqan.#Éxo. 2.2. 21Tsaypitanashi Faraón mandashqanta cäsukur wamra wanukunanpaq kachariykurqan. Tsaytashi Faraónpa warmi tsurin shuntarkur kikinpa wawantano ashmakurqan.#Éxo. 2.3-10. 22Tsaychöshi Moisésqa Egipto runakuna estudiashqanta yachakurqan. Shumaq yarpayniyuq karshi imatapis ali rurarqan y ali parlarqan.

23<<Chusku chunka (40) watayuq kaykarnashi Israel mayinkunaman watukuq aywayta yarparqan. 24Tsayno aywarshi juk Israel runata Egipto runa maqaykaqta tarirqan. Tsayshi Israel runapa favornin sharkur Egipto runata wanuratsirqan. 25Moisésqa yarparqan kayno nir: <Israel mayïkuna tantiyakärinqami nakarkaykashqanpita jorqunäpaq Tayta Dios kachamashqanta>. Tsayno yarpaptinpis Israel mayinkuna manashi tantiyapäkurqantsu.

26<<Egipto runata wanutsishqanpita jukaqnin junaqnashi Moisés tarirqan ishkay Israel runakuna pelyarkaykaqta. Tsayshi paykunata washashpan kayno nirqan: <Qamkuna tsay aylula kaykarqa ¿imanirtaq pelyarkaykanki?> 27Tsayshi maqaq kaq runaqa Moisésta tanqariykur kayno nirqan: <Qamta ¿pitaq churashushqanki noqakunapa mandamaqnï y jueznï kanaykipaq? 28¿Egipto runata qanyan wanutsishqaykinöku noqatapis wanutsimayta munaykanki?> 29Tsayno niptinshi Moisésqa Madián partiman qeshpirkur#Éxo. 2.11-15. qorpanöla tsaycho tarqan. Tsaychöshi ishkay olqu tsurinkuna yurirqan.#Éxo. 18.2-4.

30<<Madiáncho chusku chunka (40) wata taykarnashi aywarqan Sinaí jirka cercanman. Tsay chunyaq jirkachöshi shiraka rupaykaqcho juk ángel yuriparqan. 31Tsayta rikaykurshi fiyupa espantashqa rikakurqan. Tsayshi shumaq rikananpaq yaykuykaptin Tayta Dios kayno nirqan: 32<Unay ayluykikuna Abrahampa, Isaacpa y Jacobpa Diosninmi kaykä>. Tsayta mayarshi Moisés siksikyashpan rikäriytapis mantsakurqan. 33Tsayshi Tayta Dios kayno nirqan: <Kay ichirashqayki patsaqa sagrädumi kaykan. Tsayno kaykaptinqa lanqikita jorquy. 34Noqa rikaykämi kuyashqä runakuna Egiptucho nakarkaykaqta. Tsaycho waqarkaykashqantami mayaykä. Tsaymi paykunata jorqamunäpaq shamushqä. Tsawraqa Egiptuman qamta kanan kachashayki>.#Éxo. 3.1-10.

35<<Tsayshi rupaykaq shirakacho ángel parlapaptin Moisésta Tayta Dios Egiptuman kacharqan. Israel mayinkuna <¿pitaq churashushqanki mandamaqnï y jueznï kanaykipaq?> niykaptinshi Egiptupita jorqamunanpaq y mandaqninpis kananpaqshi tsayno kacharqan. 36Tsayshi Israel runakunata jorqamur Egiptuchöpis,#Éxo. 7.3. Puka Lamarchöpis#Éxo. 14.21. y chunyaq jirkachöpis#Núm. 14.33. chusku chunka (40) wata milagrukunata y señalkunata Moisés rurarqan.

37<<Moisésshi Israel mayinkunata kayno nirqan: <Tayta Diosmi qamkunapita juk runata churanqa noqano profëta kananpaq. [Payta cäsukärinki]>.#Deut. 18.15, 18. 38Unay ayluntsikunawan chunyaq jirkacho Sinaí jirkaman Moisés witsaptinshi juk ángel parlaparqan.#Éxo. 19.1—20.17; Deut. 5.1-33. Tsaychöshi ali kawanantsipaq yätsikuykunata ángel wilarqan noqantsipis chaskikunantsipaq.

39<<Tsayno kaykaptinpis unay ayluntsikuna manashi Moisésta cäsukurqantsu. Paypa contran sharkurshi Egiptuman kutikäriyta munarqan. 40Tsayshi Aarónta kayno nipäkurqan: <Egiptupita jorqamaqnintsi Moisésta ima pasashqantapis manami musyantsitsu. Tsayno kaykaptinqa nänicho yanapamänantsipaq dioskunata ruraykulay>.#Éxo. 32.1. 41Tsayno nirshi becërru niraq ïduluta rurarqan. Tsay rurashqanta adorar sacrificiuta rupatsirshi fiestata kushishqa rurapäkurqan.#Éxo. 32.2-6.

42<<Tsayno ruraptinshi qoylarkunata, intita y killata adorapäkunanpaq Tayta Dios paykunata kachariykurqan. Profëtakuna qelqashqanchöpis kaynömi niykan:

<< <Israel runakuna, chusku chunka (40) wata chunyaq tsaki jirkapa purir manami noqapaqtsu uywakunata y tsaki mikuykunata rupatsipäkurqayki.

43Tsaypa trukanqa Moloc diosnikipaq rurashqayki tolduntami puritsirqayki.

Refán diospa qoylarnin niraqtami adorarqayki.

Tsaykunataqa kikikikunami rurapäkurqayki diosnikikuna kananpaq.

Tsayno rurashqaykipitami Babiloniapita mas karuman qarqushayki>.#Amós 5.25-27.

44<<Chunyaq jirkachöshi unay ayluntsikuna Pactu Tolduta puritsipäkurqan. Rikatsishqantanöla tsay tolduta rurananpaqshi Tayta Dios Moisésta nirqan.#Éxo. 25.9, 40. 45Tsay tolduntintashi kay taykashqantsi nacionman paykunata Josué pushamurqan.#Jos. 3.14-17. Ayluntsikuna chaykamuptinnashi kay markakunacho taq runakunata Tayta Dios qarqurqan. Tsaynöpashi kay nación paykunapana karqan.

<<Tsay tolduqa rey David kawashqan witsanyaqshi kay markantsikunacho karqan. 46Tayta Dios yanapaptinshi Davidqa templutana sharkatsiyta munarqan Jacobpita miraqkuna#7.46 Jacobpita miraqkunaqa Israel runakunami kaykan. Tayta Diosta adorananpaq.#2Sam. 7.1-16; 1Crón. 17.1-14. 47Tsayno kaptinpis tsurin Salomónraqshi tsay templuta sharkatsirqan.#1Rey. 6.1-38; 2Crón. 3.1-17.

48<<Templuta Salomón sharkatsishqa kaptinpis lapanpaq munayniyuq Tayta Dios manami runakuna rurashqan templuchötsu tan. Profëta qelqashqanchöpis kaynömi niykan:

49<< <Jana patsaqa trönümi kaykan.

Patsapis jarukunämi kaykan.

Tsayno kaykaptinqa ¿maychöraq wayita sharkatsipämankiman?

¿Maychöraq jamaykunäpaq ruratsipämankiman?

50Ciëlutapis y patsatapis ¿manaku kikï kamashqä?> >>#Isa. 66.1-2.

51Tsayno nirkurmi Esteban kayno nirqan: <<Qamkunaqa roqu rinrimi karkaykanki. Shonquykipis señaläni#7.51 Cuerpunta señalar chiwlakunanpa punta qaranta kutsurir jorqushqannömi shonqunta señalar jutsa rurayta kacharin. kaptinmi mana cäsukuq karkaykanki. Unay ayluykikunanölami Espíritu Santupa contran imaypis karkaykanki.#Isa. 63.10. 52Lapan profëtakunatami paykunaqa nakatsipäkurqan. Jutsaynaq runa#7.52 Tsay jutsaynaq runaqa Jesucristumi kaykan. shamunanpaq kashqanta wilakäriptinpis wanutsipäkurqanmi. Qamkunapis paykunanölami salvamaqnintsi runata entregapäkushqanki wanutsishqa kananpaq. 53Leyninkunata angilkunawan Tayta Dios qomaptintsipis manami cäsukärinkitsu>>.

Estebanta wanutsishqan

54Esteban tsayno niptinmi autoridäkuna pasaypa rabyashpan kiruntapis uchupäkurqan. 55Estebanqa Espíritu Santupa munaynincho karmi jana patsata rikärishqancho rikarqan chipchipyaykaq munayniyuq Tayta Diospa alawqa kaq nawpancho Jesús kaykaqta. 56Tsayta rikaykurmi kayno nirqan: <<Jana patsa kicharaykämuqtami rikaykä. Tsaychömi Tayta Diospa alawqa kaq nawpancho Runapa Tsurin kaykämun>>.

57Tsayno niptinmi autoridäkuna qaparpashpan rinrinkunatapis tsapakurkur jinan höra Estebanta wanutsinanpaq tsaripäkurqan. 58Tsaypitanami markapita jorquykur saqmapäkurqan. Tsayno saqmananpaqmi capötinkunata jorqurir Saulo jutiyuq mözuta paytakurqan.

59Saqmarkaykaptinmi Esteban manakur kayno nirqan: <<Tayta Jesús, ¡makikimanmi almäta kachaykamü!>>#Sal. 31.5; Luc. 23.46.

60Nirkurnami qonqurpakuykur lapan kalpanwan kayno nirqan: <<¡Kay saqmaykämaq runakunata perdonaykulay, Tayta!>>

Tsayno nirkurmi wanurqan.#Luc. 23.34.

Currently Selected:

Hechos 7: qvmB

Highlight

Copy

Compare