Hechos 24

Félixpa nawpancho Pablo parlashqan

1Tsaypita pitsqa junaqtanami juk ishkay Israel mayor runakuna y Tértulo jutiyuq abogädun pushashqa mas mandaq cüra Ananías Cesareaman chayarqan. Pablupa contran parlananpaqmi Félixpa despächunman aywapäkurqan. 2Despächuman Pabluta chayatsiptinnami Tértulo kayno nirqan: <<Tayta Félix, qam ali mandaq kaptikimi noqakuna jawka kawapäkü. Tsaynöpis shumaq tantiyakur kay nacioncho ali kaqkunatami ruratsishqanki. 3Tsayta rikarmi maytsaychöpis kushishqa agradëcikärï.

4<<Tiempuykita aläpa mana perditsinäpaq rätula mayarkamänaykipaq ruwakushayki. 5Kay prësu apamushqan runaqa joqukuq qeshyanömi kaykan. Payqa Nazareno sectapa mandaqnin karmi maytsaychöpis Israel runakunata chikinakaykätsin. 6Jerusaléncho templutapis manakaqmanmi churayta munashqa. Tsawraqa prësu tsarirkur [leynïkuna nishqanno arreglayta munashqä. 7Prësuraykätsiptïmi Lisias chaykamur maqa maqarkur qechumashqa. 8Nirkurmi nimashqa qampa nawpaykichöraq ima jutsan kashqantapis shimpinäpaq kashqanta.] Lapan nishqäkuna rasun kaq kashqanta musyanaykipaq kanan kikiki tapuykulay>>.

9Tértulo nishqannölami paywan kaykaq Israel runakunapis nirqan.

10Tsawraqa parlamunanpaq Félix sëñaptin Pablo kayno nirqan: <<Tayta Félix, atska watanami kay nacioncho runakuna quejakushqanta arreglashqanki. Tsaymi manakaqkunapita conträ sharkushqanta mana mantsakuypa wilapäshayki. 11Tayta Diosta adoranäpaq Jerusalénman chayashqä tsayraqmi chunka ishkay junaq. Tapukuptikiqa pïmaypis nishqänölami wilashunkipaq. 12Templuchöpis ni sinagögakunachöpis ni markachöpis manami piwanpis rimanakuykaqtatsu ni pitapis rabyaykätsiqtatsu taripäkamashqa. 13Tumpamashqanno lutanta rurashqa kaptïqa kanan mayqanpis careamätsun.

14<<Itsanqa Diospa Nänin#24.14 Diospa Näninpaq parlarqa Jesucristupa wilakuyninpaqmi parlaykan. nishqannölami unay aylükuna adorashqan Tayta Diosta sirvï. Diospa Nänin juk secta kashqanta paykuna niptinpis Moisés qelqashqan leykunaman y profëtakuna qelqashqanmanmi noqa criyï. 15Ali runakunatapis y mana ali runakunatapis Tayta Dios kawaritsimunanpaq kashqanta paykuna criyishqannömi noqapis criyï. 16Tsaymi Tayta Diospa nawpancho y runakunapa nawpancho imaypis alikunalata rurayta munä.

17<<Atska watatami qellayta apar Jerusalénman kutishqä muchuqkunata yanapanäpaq y Tayta Diospaq sacrificiuta rupatsinäpaq. 18Sacrificiukunata cürakunaman templucho entregaykaptïmi [Asia provinciapita shamuq Israel runakuna] templucho purificakushqa kaykaqta taripäkamashqa. Manami atska runakunatawantsu ni pitapis pichumientuta ruraykätsiqtatsu taripäkamashqa.#Hech. 21.17-28. 19Imatapis manakaqkunata rurashqa kaptïqa nawpaykicho careamänanpaq tsay runakuna shamunmanmi karqan. 20Sanedrín juezkunapis manami ima jutsä kashqantapis taripäkushqatsu. Tapuptiki kay runakunapis tsayno kashqantami nipäkushunki. 21Tsay autoridäkunapa nawpancho kaynömi nirqä: <Wanushkunata Tayta Dios kawaritsimunanpaq kashqanta criyiptïmi juzgarkaykämanki>.#Hech. 23.6. Tsay imachari jutsä kaykan>>.

22Tsayno niptinmi Félix kayno nirqan: <<Comandanti Lisias shamur wilamaptinraqmi arreglashayki>>.

Félixqa shumaqmi tantiyarqan Diospa Näninta qatiraqkuna#24.22 Diospa Näninta qatiraqkunapaq parlarqa Jesucristuman yärakuqkunapaqmi parlaykan. imata criyishqantapis.

23Nirkurmi Pabluta cuidaq capitanta kayno nirqan: <<Carcilman Pabluta kutitsiy. Imalatapis aparkur pipis watukuq shamuptinqa ama michankitsu>>.

24Tsaypita warantinkunanami warmin Drusilawan despächunman Félix kutiykur Pabluta qayatsirqan. Drusilaqa Israel warmimi karqan. Pablo chayaykurmi paykunata parlaparqan Jesucristuman yärakunanpaq. 25Tsaynöpis tantiyatsirqan Dios munashqanno kawananpaq, jutsata mana rurananpaq y juiciu finalcho Tayta Dios juzgananpaq kashqanta. Tsayno tantiyatsiptinmi Félix mantsakashpan kayno nirqan: <<Wichqarashqaykiman kutikuyna. Tiempü kashqan hörami yapay qayatsimushayki>>.

26Jatipänanta munarmi Félixqa Pabluta atska kuti qayatsir paywan parlarqan. 27Tsaypita ishkay watatanami Félixpa trukan gobernador jukna yaykurqan. Paypa jutinmi karqan Porcio Festo. Ali autoridä kashqanta Israel runakuna yarpänanta munarmi carcilpita Pabluta Félix mana kacharirqantsu.

Currently Selected:

Hechos 24: qvmB

Highlight

Copy

Compare