2 Samuel 9

Mefi-bosetta David shuntashqan

1Juk kutichömi yanaqaqnin runakunata David tapukurqan kayno nir: <<Saúlpa aylun kaqkuna ¿pilapis kawaykanraqtsuraq Jonatán rayku yanapanäpaq?>>#1Sam. 20.15-17.

2Tsaymi Saúlpa ashmayninkunapa capataznin Sibata qayaykatsir David tapurqan kayno nir: <<¿Qamku Siba kaykanki?>>

Tsayno tapuptin kayno nirqan: <<Aw, noqami kaykä, tayta>>.

3Tsawraqa kayno nir tapurqan: <<Tayta Diospa jutincho yanapanäpaq ¿Saúlpa aylunkuna mayqalanpis kawaykanku?>>

Tsaymi Siba kayno nirqan: <<Aw, Jonatánpa tsurin kawaykanraqmi. Itsanqa ishkan chakin weqrumi>>.#2Sam. 4.4.

4Tsayno niptinmi David kayno nirqan: <<¿Maychötaq pay taykan?>>

Tsawraqa Siba kayno nirqan: <<Lo-debar markacho Amielpa tsurin Maquirpa wayinchömi taykan>>.

5Tsayno niptinmi rey Davidqa jukla kachakurqan Mefi-bosetta pay kaqman pushananpaq. 6Saúlpa wilkan y Jonatánpa tsurin Mefi-bosetta chayaykatsiptinmi Davidpa nawpanman qonqurpakuykurqan urkunpis pampaman töpashqanyaq. Tsawraqa David kayno nirqan: <<¿Qamku Mefi-boset kaykanki?>>

Tsayno niptinmi Mefi-boset kayno nirqan: <<Aw, noqami kaykä, tayta>>.

7Tsawraqa David kayno nirqan: <<Ama mantsakamaytsu. Papäniki Jonatán raykumi yanapashayki. Tsaymi awkiluyki Saúlpa chakrankunata kutitsishunaykipaq nishaq. Noqa mikushqächömi qamqa imaypis mikunkipaq>>.

8Tsayno niptinmi Davidpa nawpanman Mefi-boset yapay qonqurpakuykur kayno nirqan: <<Awkis alquno mana väliq kaykaptïpis tsayno kuyapämashqaykipita yusulpalä, tayta>>.

9Tsaymi Saúlpa ashmaynin Sibata qayaykur David kayno nirqan: <<Saúlpa kaqtaqa lapantami imaykantapis wilkan Mefi-bosetta qoykushqä. 10Qammi tsurikikunawan y ashmaynikikunawan chakrankunata arutsipar mikuyninkunata pirwapanki Mefi-bosetpa aylunkuna mikunanpaq. Mefi-bosetmi itsanqa makïcho kar noqapa mësächo mikunqa>>.

(Sibapami tsurinkuna karqan chunka pitsqa y ashmayninkunami karqan ishkay chunka.)

11Tsaymi Davidta Siba kayno nirqan: <<Sirviqniki karmi lapan mandamashqaykita rurashaq, tayta>>.

Tsaynöpami Mefi-bosetqa tsurinnöpis David mikushqan mësacho mikurqan.

12Mefi-bosetpami wamralaraq tsurin karqan Micaía jutiyuq. Sibapa wayincho taqkunaqa lapanmi Mefi-bosetpa ashmaynin karqan. 13Mefi-bosetnami ishkan chakin weqru kaptin Jerusaléncho tar rey Davidwan juntu mikurqan.

Currently Selected:

2 Samuel 9: qvmB

Highlight

Copy

Compare