2 Samuel 7

Davidta Tayta Dios promitishqan

1 Crónicas 17.1-14

1 Tayta Dios yanapaptinmi lapan contrankunata vincirkur rey David palaciuncho jawkalana täkurqan. 2Tsaymi profëta Natánta qayaykatsir kayno nirqan: <<Cedru qerupita kuyaylapaq rurashqa palaciucho taptïpis Tayta Diospa babulninqa toldu rurilanchömi kaykan>>.

3Tsayno niptinmi Natán kayno nirqan: <<Tayta Dios yanapaykäshuptikiqa alichari kanman yarpashqaykita ruraptiki>>.

4Tsay tsakaymi Natánta Tayta Dios kayno nirqan: 5<<David kaqman kutiykur kayno ninki: <Tayta Diosmi kayno nin: Noqa tänäpaq wayitaqa manami qamtsu sharkatsinki, sinöqa jukmi sharkatsinqapaq. 6Egiptupita Israel runakunata jorqamushqä junaqpita patsa hasta kananyaq manami wayichötsu tashqä. Tsaypa trukanqa juk läduman juk läduman puritsikuna toldulachömi tashqä. 7Kaytsika watana kuyashqä Israel runakunawan purirpis churapashqä autoridäninkunata manami imaypis manakushqätsu cedru qerupita wayita rurapämänanpaq>.

8<<Tsaymi sirvimaqnï Davidta kayno ninki: <Lapanta mandaq Tayta Diosmi nin: Uyshata mitsikur puriykaptiki qamta akrashqä Israel runakunapa mandaqnin rey kanaykipaq. 9Tsaymi maypa aywaptikipis qamta yanapar contraykikunatapis lapanta ushakätsishqä. Tsaynölami yanapashayki kay patsacho mas munayniyuq runakunano qampis kanaykipaq.

10<< <Kuyashqä Israel runakunatapis yanapashaq nacionnincho pitapis mana mantsakuypa jawka kawapäkunanpaqmi. Tsaycho taptinmi contrankuna unaynöqa mana atacanqanatsu ni qarqunqanatsu. 11Churashqä juezkuna mandashqan witsanpita patsami kuyashqä Israel runakunata atacarqan. Qamtami yanapashayki lapan chikishuqnikikuna achäquita mana ashipäshunaykipaq.

<< <Mastapis Tayta Dios kaynömi nin: Kanan qamta promitï qampita miraqkuna imaypis reykuna kananpaq. 12Tsaymi wanur unay ayluykikunawan tinkuq aywaptikipis juk tsurikita churashaq rey kananpaq. 13Paymi noqapaq wayita sharkatsinqa. Paypita miraqkunami imaypis reykuna kanqa. 14Noqami paypa taytan kashaq. Paynami noqapa tsurï kanqa. Imatapis lutanta ruraptinqa noqami corrigishaq tsurinta taytan corrigishqanno.#Deut. 8.5; 2Cor. 6.18; Heb. 1.5; 12.5-11. 15Tsayno corrigirpis kuyapäshaqmi. Tsaymi rey kashqanpita Saúlta jorqushqänöqa payta imaypis mana jorqushaqtsu. 16Qampita miraqkunami imayyaqpis rey kanqa> >>.#1Rey. 2.4.

Tayta Diosta David manakushqan

1 Crónicas 17.15-27

17Revelacioncho Tayta Dios tsayno nishqanta mayashqannölami Davidman aywaykur lapanta Natán wilarqan. 18Wilaptinmi Tayta Diospa nawpanman aywaykur David kayno nirqan: <<Yusulpäki, Tayta Dios. Kananyaqpis yanapamänaykipaq manami noqapis ni aylükunapis merecipäkütsu. 19Tsaynöpis nimashqanki noqapita miraqkuna imaypis reykuna kananpaq kashqanta. Tayta Dios, runakunapaq yarpashqayki tsayno kaptinmi pasaypa kushikü.

20<<Qamqa imano kashqätapis musyankimi. Tayta Dios, ¡imatanataq masta manaküman! 21Kuyamashpaykimi musyatsimashqanki lapan tsay promitimashqaykita cumplinaykipaq kashqanta.

22<<Qamlami munayniyuq Tayta Dios kaykanki. Manami pipis qamno munayniyuqqa kantsu. Tsaynöpis qampita masqa manami ima diospis kantsu. Japalayki Dios kashqaykitami unay aylükunapis wilapäkamarqan. 23Kuyashqayki Israel runakunatanöqa manami pitapis yanapashqankitsu. Israel runakunata Egiptucho ashmay kaykashqanpita jorqamushqaykinöqa manami mayqan nación runakunatapis sirvishunaykipaq jorqamushqankitsu. Kuyashqayki runakunata jorqamushpaykimi lapanpaq munayniyuq kashqaykita musyatsishqanki. Tsaynöpis munayniyuq karmi contran sharkuq nacionkunata y diosninkunata ushakätsishqanki. 24Tayta Dios, Israel runakunatami akrashqanki kuyashqayki runakuna imayyaqpis kananpaq. Tsaynöpis nishqanki paykunapa Diosnin imayyaqpis kanaykipaqmi.

25<<Tayta Dios, noqapaq y noqapita miraqkunapaq promitimashqaykikunata imaypis cumpliykulay. 26Tsayno cumpliptikimi pïmaypis alabashushpayki imayyaqpis kayno nipäkunqa: <Lapanta mandaq Tayta Diosqa Israel runakunapa Diosninmi kaykan>. Tsaynömi noqapita miraqkuna qampa nawpaykicho imaypis rey kanqa.

27<<Lapanta mandaq Tayta Dios, qammi tantiyatsimashqanki noqapita miraqkuna imaypis reykuna kananpaq kashqanta. Tsayno kaptinmi sirvishuqniki kar tsay promitimashqaykita cumplinaykipaq mana mantsakuypa qamta manakamü. 28Tayta Dios, qampita mas juk Dios manami kantsu. Lapan nishqaykikunapis rasun kaqmi kaykan. Tsaymi musyä tsay promitimashqaykikunata cumplinaykipaq kashqanta. 29Sirviqniki kaykaptïqa noqapita miraqkuna imaypis sirvishunaykipaq bendicionnikita qoykulay. Tsayno bendicionta qonaykipaqmi promitirqayki, Tayta Dios. Promitishqaykita cumpliptikimi noqapita miraqkuna imaypis bendicionta chaskipäkunqa>>.

Currently Selected:

2 Samuel 7: qvmB

Highlight

Copy

Compare