2 Samuel 6

Tayta Diospa babulninta Jerusalénman David apayta munashqan

1 Crónicas 13.5-14

1Tsaypitami kimsa chunka waranqa (30,000) alinnin kaq Israel soldädukunata David shuntarqan. 2Paykunawanmi Judácho kaq Baala#6.2 Judácho kaq Baala marka karqan Quiriat-jearim markapa jukaq jutinmi. Quiriat-jearimcho Tayta Diospa babulnin kashqanta musyanaykipaq liyinki 1Sam. 6.21; 7.1-2. markaman aywapäkurqan Tayta Diospa babulninta Jerusalénman apapäkunanpaq. Babul janancho ishkay querubín chawpinchömi lapanta mandaq Tayta Diospa trönun kaykan.#Éxo. 25.17-22; Núm. 7.89; 1Sam. 4.4; Sal. 80.1.

3Tayta Diospa babulnin karqan Abinadabpa wayinchömi.#1Sam. 7.1-2. Tsay wayiqa karqan juk jirkanchömi. Wayipita jorqurirmi mushuq carrëtaman babulta churarkur Abinadabpa tsurinkuna Uza y Ahío apapäkurqan. 4Carrëtapa nawpaqnintanami Ahío aywarqan. 5Babulta apaptinmi Israel runakunawan Davidpis aywarqan qatswaraykar pasaypa kushishqa. Tayta Diosta alabashpanmi arpakunata, salteriukunata, panderëtakunata, shaqshaqyaqkunata y platïllukunatapis tukaraykar aywapäkurqan.

6Nacónpa ëran kaqman chayaykur törukuna trancakar upaksaptinmi Uzaqa babul ishkinaptin tuknarqan. 7Tsayno tuknaptinmi Tayta Dios pasaypa rabyakushpan Uzata jinan höra wanutsirqan. Tsaymi Uza wanur babul nawpanman tunirqan.#Núm. 4.15.

8Uzata Tayta Dios wanutsiptinmi David pasaypa rabyakurqan. Tsaypitami tsay ërapa jutinta churaparqan Pérez-uza#6.8 Pérez-uza ninanqa Uzapa contran yarqamushqa ninanmi. jutin kananpaq. Tsay jutilami hasta kananyaqpis kaykan. 9Tsay junaqmi Tayta Diosta mantsakushpan David kayno nirqan: <<¡Kakulätsun, tayta! Tayta Diospa babulninta ¡imapaqtaq apashaqpis!>>

10Tsayno nirmi tsay babulta Davidpa Markanman mana aparqannatsu. Tsaypa trukanqa paytakurqan Gat markapita kaq Obed-edompa wayinmanmi. 11Kimsa killayaqmi babul tsaycho paytakararqan. Tsaymi Obed-edomta y aylunkunata Tayta Dios lapanchöpis yanaparqan.#1Crón. 26.4-5.

Tayta Diospa babulninta Jerusalénman David apatsishqan

1 Crónicas 15.1—16.6

12Tsaypitanami rey Davidta wilapäkurqan Tayta Diospa babulnin Obed-edompa wayincho kaptin lapanchöpis ali yanapashqanta. Tsaymi Tayta Diospa rabyaynin pasashqanta tantiyakushpan David tsayman aywaykur Tayta Diospa babulninta Jerusalénman kushishqa apatsirqan. 13Jerusalénman apapäkunanpaq yarqurkaykaptinmi Davidqa töruta y werannin carnita pishtarkur sacrificiupaq rupatsirqan. Tsayno rupatsirqan babulta apaqkuna soqta japayta japarkuptinmi. 14Davidmi lïnupita rurashqa efodnin jatishqa Tayta Diospa babulninpa puntanta kushikushpan qatswaraykar aywarqan. 15Tsaynömi Davidwan lapan Israel runakuna Jerusalénman babulta apapäkurqan. Tsaychömi kushikuypita qaparpashpan cornëtakunata tukapäkurqan.

16 Tayta Diospa babulninta Davidpa Markanman#2Sam. 5.7. yaykaykätsiptinmi wayi ventänapita watqaykur Saúlpa tsurin Mical rikarqan Davidta Tayta Diospa nawpancho qatswaraykar kushishqa aywaykaqta. Rey kaykar saltaypa saltar qatswaykaqta rikarmi shonqulancho jamurparqan.

17Markaman chayaykatsirmi Tayta Diospa babulninta churapäkurqan David sharkatsishqan toldu rurinman. Nirkurnami uywakunata David pishtarkatsir rupatsina sacrificiuta y jawka kawakuy sacrificiutapis Tayta Diospa nawpancho rupatsipäkurqan. 18Rupatsiyta usharkurmi lapanta mandaq Tayta Diosta Israel mayinkunapaq manakur Davidqa Diospa jutincho bendicionta qorqan. 19Nirkurmi olqutapis warmitapis lapan Israel runakunata aypurqan juk tantata, pedäzu aytsata y päsaslan atipay juk biscöchuta. Tsayta mikukurkurnami runakuna wayinpa kutikärirqan.

20Tsaynölami Davidpis wayinman kutikurqan aylunkunata bendicionta qonanpaq.#1Crón. 16.43. Wayinman yaykuraykaptinmi Saúlpa tsurin Mical yarqarkamur kayno nirqan: <<Israel nacionpa mandaqnin rey kaykarqa ashmay warmikunapa nawpancho shumaqmi qatswaraykar shamushqanki, ¿aw? ¡Mana tantiyakuq runanömi pasaypa penqakuypaq sikiki rikakashqanyaq qarikaypa qarikar qatswashqanki!>>

21Tsawraqa David kayno nirqan: <<Noqaqa Tayta Diospa nawpanchömi qatswashqä. Paymi Israelcho rey kanäpaq taytaykipa trukan akramashqa. Israel runakunapa mandaqnin rey karmi Tayta Diospa nawpancho imaypis tsayno qatswashaq. 22Tayta Diosta adorar qatswashqäpita jamurpämaptikipis masraqmi payta adorashaq. Imata yarpaptikipis tsay ashmay warmikunaqa respitamanqami>>.

23Davidta tsayno jamurpashqanpitami Mical qoluq rikakurqan.

Currently Selected:

2 Samuel 6: qvmB

Highlight

Copy

Compare