2 Samuel 21

Gabaón runakuna Saúlpa aylunkunata wanutsishqan

1David rey kashqan witsanmi kimsa wata muchuy karqan. Muchuy imanir kashqanta musyananpaq David manakuptinmi Tayta Dios kayno nirqan: <<Kay muchuyqa kaykan Saúl y aylunkuna Gabaón runakunata mana kuyapaypa wanutsishqanpitami>>.

2Tsaymi Gabaón runakunata rey David qayatsirqan paykunawan parlananpaq. Paykunaqa manami Israel runakunatsu karqan, sinöqa amorreo runakunapita miraq runakunami. Paykunapa unay aylunkunatami Israel runakuna promitipäkurqan Gabaón runakunata mana wanutsipäkunanpaq.#Jos. 9.3-15. Tsayno kaptinpis Gabaón runakuna tashqan markakunata Israel runakunapa y Judá runakunapa kananpaq shuntayta munarmi tsaycho taq atska runakunata Saúl wanutsirqan.

3Tsaypitanami Gabaón runakunata David kayno tapurqan: <<Ayluykikunata Saúl wanutsishqanpita ¿imatataq ruräman? Tsaynöpis ¿imatataq ruräman noqakunapaq Tayta Diosta manakärinaykipaq?>>

4Tsayno niptinmi Gabaón runakuna kayno nipäkurqan: <<Saúlpa aylunkunapita manami qellaytatsu ni qoritatsu munapäkü. Tsaynöla manami munayniyuqtsu karkaykä kikïkunapa yarpayniläpita Israel runata wanutsipäkunäpaq>>.

Tsayno niptin David kayno nirqan: <<Tsawraqa ¿imata ruranätataq munarkaykanki?>>

5Tsawraqa kayno nipäkurqan: <<Saúlmi Israel nacioncho tänäta mana munashpan lapanïta ushakätsimayta munarqan. 6Tsayno ruramashqanpita Saúlpa tsurinkunata karpis o wilkankunata karpis qanchis runakunata apapäkamuy wanutsipäkunäpaq. Paykunatami Tayta Diospa nawpancho#21.6 Tayta Diospa nawpancho wanutsinanpaq nirqa Gabaacho kaq altarpa nawpancho wanutsinanpaqmi niykan. wanurkatsir qerukunacho warkarätsishaq. Tsayno wanutsipäkushaq Tayta Dios akrashqan Saúlpa markan Gabaachömi>>.

Tsawraqa rey David kayno nirqan: <<Tsayno kaptinqa wanutsipäkunaykipaq apapämushayki>>.

7 Tayta Diospa jutincho Jonatánwan pactu rurashqanta#1Sam. 20.14-17. cumplirmi Jonatánpa tsurin y Saúlpa wilkan Mefi-bosetta Gabaón runakuna wanutsinanta David mana munarqantsu. 8Saúlpa tsurin kaq Mefi-bosetta y wawqin Armonitami itsanqa apaparqan wanutsipäkunanpaq. Paykunapa mamanqa karqan Ajapa tsurin Rizpa. Tsaynöpis apaparqan Saúlpa warmi tsurin Merabpa#1Sam. 18.19. pitsqa wawankunata wanutsipäkunanpaq. Paykunapa taytanqa Barzilaipa tsurin Adrielmi karqan. Adrielqa Mehola markapitami karqan. 9Tsay qanchis runakunata Gabaón runakunaman apapaptinmi Tayta Diosta adorakuna jirkancho wanurkatsir qerukunapa puntancho warkarätsirqan. Tsay qanchis runakunata wanutsipäkurqan cebäda cosëcha qalaykunanpaqna kaykaptinmi.

10Tsawraqa ayakuna warkaraykashqanman Ajapa tsurin Rizpa aywaykurmi jatun rumi jananman cotenciata qeshtarqan. Tsayman jamaykurmi wiskulkuna y munti uywakuna mana mikunanpaq paqaspa junaqpa washäkurqan. Tsayno washäkurqan cebäda cosëcha qalaykushqanpita tamya killa chayamushqanyaqmi.

11Saúlpa concubïna warmin Rizpa tsayno täparaykashqanta Davidta wilaptinmi 12Galaad particho kaykaq Jabes markaman aywaykur Saúlpa y tsurin Jonatánpa tulunkunata shuntamurqan.

Nawpatami filisteo runakuna Saúlta y Jonatánta Gilboacho wanurkatsir Bet-sán pläzacho ayankunata warkupäkurqan. Tsaypitami Jabes runakuna suwarkur markanman apapäkurqan pampapäkunanpaq.#1Sam. 31.8-13. 13Tsaypitami Saúlpa y tsurin Jonatánpa tulunkunata Jabes markapita David shuntatsimurqan. Tsaynölami Gabaón runakuna wanutsishqan qanchis runakunapa tulunkunatapis shuntatsimurqan. 14Shuntarkatsimurmi Saúlpa y tsurin Jonatánpa tulunkunata churapäkurqan Saúlpa taytan Cispa tulunkuna churarashqan sepultüraman. Tsay sepultüraqa karqan Benjamín trïbu runakuna tashqan Zela markachömi. Rey David nishqannöla lapanta rurapäkuptinmi Israel runakunata Tayta Dios yanaparqan mikuyninkuna alina wayunanpaq.

Chusku jatusaq runakunata wanutsipäkushqan

1 Crónicas 20.4-8

15Filisteo runakuna Israel runakunata yapay atacaptinmi soldädunkunawan David aywarqan pelyapäkunanpaq. Pelyaykashqancho David pasaypa utikaptinmi 16Isbi-benob jatusaq casta runa Davidta qatipaykarqan wanutsiyta munar. Tsay runapa lanzanmi lasarqan kimsa kïlupita masraq. Espädanpis mushuqlami karqan. 17Davidta tsarinanpaq kaykaptinmi Sarviapa wawan Abisai cörriyla aywaykur filisteo runata wanutsirqan. Tsaypitami soldädunkuna Davidta kayno nipäkurqan: <<Kananpitaqa amana noqakunawan guërraman aywaynatsu, tayta. Pelyacho wanutsishuptikiqa Israel nacioncho atskiynaqnöchari rikakärishaqpaq>>.

18Tsaypita Gob partichönami filisteo runakunawan yapay guërrata rurapäkurqan. Tsaychömi jatusaq casta Saf jutiyuq runata Sibecai wanutsirqan. Sibecaiqa Husa markapitami karqan.

19Tsaypita yapaymi Gobcho filisteo runakunawan guërrata rurapäkurqan. Tsaychömi Belénpita kaq Jaare-oregimpa tsurin Elhanán wanutsirqan Gat markapita kaq Goliatta. Goliatpa lanzanpis telar qeruno rakumi karqan.

20Gat markacho yapay guërra kaptinmi jatusaq casta filisteo runa yarqamurqan Israel runakunawan pelyananpaq. Paypa cada makincho y cada chakincho soqta dëdun kaptinmi ishkay chunka chusku (24) dëdunkuna karqan. 21Paytami Israel runakunata achäquita ashipaykaptin Davidpa wawqin Simeapa#21.21 Simeapa jukaq jutinmi karqan Sama. Tsaypita musyanaykipaq liyinki 1Sam. 16.9; 17.13. tsurin Jonatán wanutsirqan.

22Tsay chusku jatusaq filisteo runakunami karqan Gat markapita Refa aylu runakuna. Paykunatami David y soldädunkuna wanutsipäkurqan.

Currently Selected:

2 Samuel 21: qvmB

Highlight

Copy

Compare