2 Samuel 16

Sibawan David parlashqan

1Tsaypita aywar Olivos jirkanta David tumarkuptinmi Mefi-bosetpa ashmaynin Siba#2Sam. 9.9-10. tariparqan ishkay silla bürrunkuna qatishqa. Tsay bürrukunaman cargakurkurmi Davidpaq aparqan ishkay pachak (200) tantakunata, päsaslan atipay pachak (100) tantakunata, pachak (100) frütakunata y vïnu puritsikuna qarawan vïnuta. 2Paywan tinkurmi rey David kayno tapurqan: <<¿Imapaqtaq kaykunata apamushqanki?>>

Tsawraqa Siba kayno nirqan: <<Bürrukunata qatimushqä qam y qamwan aywaykaq ayluykikuna muntakunaykipaqmi, tayta. Tantakunata frütakunata apamushqä soldäduykikuna mikunanpaqmi. Vïnutanami apamushqä chunyaq jirkapa aywar utikaqkuna upupäkunanpaq>>.

3Tsawraqa David kayno tapurqan: <<¿Maytaq patronnikipa wilkan Mefi-bosetqa?>>

Tsayno niptin Siba kayno nirqan: <<Jerusalénchömi kaykan. Payqa niykan awkilun Saúlta rey kananpaq Israel runakuna churapäkushqanno paytapis kanan junaq churapäkunanpaq kashqantami. Tsayta yarparmi Jerusaléncho quëdakamushqa>>.

4Tsayno niptin David kayno nirqan: <<Tsayno kaptinqa qampana katsun Mefi-bosetpa lapan imaykankunapis>>.

Niptinnami Davidpa nawpanman qonqurpakuykushpan Siba kayno nirqan: <<Tayta rey, qampa makiki chakikichömi kaykälä>>.

Davidta Simei qayapashqan

5Tsaypitanami Bahurim markaman David chayaptin Saúl aylu runa Gerapa tsurin Simei yarqurqan Davidpa contran rimashpan. 6Alinnin kaq soldädunkunapa chawpincho rey David aywaykaptinmi Simeiqa paykunata saqmar 7kayno nir qayaparqan: <<¡Runa mayinta wanutsiq! ¡Imatataq kaycho ashinki, fiyu runa kaykarqa! Qamtaqa rikaytapis manami munapäkütsu. ¡Kaypita aywakuy! 8¡Qammi rey kanaykipaq Saúlta y aylunkunata wanutsishqanki! ¡Tsaypitami Tayta Dios castigashushpayki tsuriki Absalóntana rey kananpaq churashqa! ¡Tsaykuna pasashunaykipaq kikikimi jutsayuq kaykanki, mana penqakuypa runa mayinta wanutsiq!>>

9Tsayno niptinmi Sarviapa wawan Abisai rey Davidta kayno nirqan: <<Tayta, ¿imanirtaq taqay mana väliq alqu tsayjinanpa qayapaykäshunki? ¡Noqata kachapaykamay kanan höra tsimparir umanta roqumunäpaq!>>

10Niptinnami Abisaita y Joabta rey David kayno nirqan: <<Sarviapa wawankuna, ¿imanirtaq qamkuna rayan wishlaykita jatiykämunki? Kikin Tayta Dios munaptinchari tsayno qayapaykäman. Tsayno kaykaptinqa ¿imapaqtaq michäshun?>>

11Nirkurnami Abisaita y lapan yanapaqninkunata kayno nirqan: <<Kikïpa tsurïpis wanutsimayta yarpaykaptinqa rasuntanachari kay Benjamín trïbu runaqa qayapaykäman. Tayta Dios munaptinqa jina tsaynöpis qayapämätsun. 12Capazchari lakikushqäta rikar Tayta Dios kuyapämashpan runakuna qayapämashqanpita bendicionninta qomanqa>>.

13Tsayno nishpanmi yanapaqninkunawan David aywakurqan. Simeinami wak tsimpanpa aywarqan ashliraykar, saqmaraykar y alpatapis altupa matsiraykar. 14Jordán mayu kuchunman chayaykurmi utikashpan Davidqa yanapaqninkunawan jamaparqan.

Jerusalénman Absalón chayashqan

15Absalónnami lapan Israel runakunawan y Ahitofelwanpis Jerusalénman chayapäkurqan. 16Tsaymi Davidpa amïgun Husai jukla aywarqan chaskikunanpaq. Tinkurmi kayno nirqan: <<¡Viva rey Absalón! ¡Viva rey Absalón!>>

17Tsayno niptinmi Absalón kayno nirqan: <<Kananqa ¿amïguyki Davidpa contrannaku kaykanki? ¿Tsaynöku ali amïgu kay? ¿Imanirtaq paywanqa mana aywashqankitsu?>>

18Niptinnami Husai kayno nirqan: <<Tayta Dios y Israel runakuna akrashqan kaq reytami noqa yanapashaq, tayta. 19Pitapis yanaparqa amïgüpa tsurintami yanapashaq. Taytaykita yanapashqänömi qamtapis yanapashayki>>.

20Tsaypitanami Ahitofelta Absalón tapurqan kayno nir: <<Kanan ¿imata ruranäpaqtaq yätsimanki?>>

21Tsayno niptin Ahitofel kayno nirqan: <<Palaciuta täpananpaq taytayki churashqan concubïna warminkunawan punuy. Tsaynöpami lapan Israel runakuna tantiyapäkunqa taytayki pasaypa rabyakur imaypis manana chaskishunaykipaq kashqanta. Tsayta tantiyarqa yanapashuqnikikuna masraqmi favorniki sharkunqa>>.

22Tsayno niptinmi lapan Israel runakuna rikananpaq palaciu janancho juk tolduta Absalónpaq rurapäkurqan. Tsaychömi taytan Davidpa concubïna warminkunawan Absalón punurqan.#2Sam. 12.11-12.

23Tsay witsanqa lapan runakuna yarpapäkurqan Ahitofel imatapis yätsishqanqa kikin Tayta Dios yätsiykaqno kashqantami. Tsaymi Ahitofel yätsishqanta David rurashqanno Absalónpis Ahitofel yätsishqanta rurarqan.

Currently Selected:

2 Samuel 16: qvmB

Highlight

Copy

Compare