2 Samuel 15

Taytan Davidpa contran Absalón sharkushqan

1Tsaypitanami carrëtata y cawallukunata kamarikurkur pitsqa chunka (50) soldädukunata puntanta cörrinanpaq Absalón akrarqan. 2Waran waranmi tsaka tsakala marka yaykuna punkuman Absalón aywaq. Tsaychömi David kaqman quejakuq aywaqkunata qayaykur mayqan trïbupita kashqantapis tapupaq. Wilaptinmi 3Absalón kayno niq: <<Rasun kaqtami qamqa quejakuq aywaykanki. Tsayno kaptinpis reypa yanapaqninkuna manami pipis kantsu quejakushqaykita arreglashunaykipaq>>.

4Tsaynöpis kayno niq: <<¡Imanöparaq Israel nacionpa jueznin kayküman lapan quejakuqkunata shumaq arreglanäpaq!>>

5Tsaynölami nawpanman pipis qonqurpakuptin makipita jukla sharkarkatsir makalarkur mutsarkuq. 6Davidman quejakuq aywaq runakunata tsayno rurarmi lapan Israel runakunapita Absalón kuyatsikurqan.

7Chusku wata pasarkuptinnami rey Davidta Absalón kayno nirqan: <<Tayta Diosta promitishqäta cumplir sacrificiuta rupatsinäpaqmi Hebrón markapa aywayta munaykä, papä. 8Siriacho kaykaq Gesur markacho kaykarmi Tayta Diosta promitirqä kayno nir: <Tayta Dios, Jerusalénman kutitsimaptikiqa sacrificiuta rupatsirmi qamta adorashaykipaq> >>.

9Tsayno niptinmi rey David kayno nirqan: <<Tsayno promitiykarqa ayway, hïju>>.

Tsawraqa Absalón aywarqan Hebrón markaman. 10Chayaykurmi wilakuqninkunata Absalón kacharqan Israel nación markakunaman kayno nir wilakunanpaq: <<Cornëtata tukamushqanta mayapäkushpayki lapayki kayno nipäkunki: <¡Absalónmi Hebróncho mandamaqnintsi rey!> >>

11Jerusalénpita Hebrónman aywarmi ishkay pachak (200) runakunata Absalón pusharqan. Tsay runakuna Absalónwan aywashpan manami musyarqantsu rey kayta munashqanta. 12Tayta Diosta adorar sacrificiukunata rupaykätsishqan hörami Absalón qayatsirqan Gilo markacho taq Ahitofelta. Ahitofelqa karqan Davidpa yätsiqninmi. Ahitofelpis Absalónpa favornin sharkushqanta rikarmi mas atska runakuna Absalónpa favornin sharkurqan.

Jerusalénpita David qeshpishqan

13Tsaymi David kaqman aywaykur wilakuq runa kayno nirqan: <<Absalón rey kananpaq lapan Israel runakunami favornin sharkuykan>>.

14Tsawraqa Jerusaléncho kaykaq yanapaqninkunata qayaykatsir David kayno nirqan: <<¡Jerusalénpita jukla aywakushun! Kaycho tarimashpantsiqa noqantsita y Jerusaléncho taq lapan runakunatami espädawan wanutsimäshun. Absalón chayamuptinqa manami mayqantsipis qeshpiyta kamäpakushunpaqtsu>>.

15Tsayno niptinmi yanapaqninkuna kayno nipäkurqan: <<Noqakunaqa listumi kaykä nimashqaykita rurapäkunäpaq, tayta>>.

16Tsaymi rey Davidqa lapan aylunkunata y palaciuncho wakin taqkunatapis pushakurkur qeshpirqan. Chunka concubïna warmilankunatami kachaykurqan palaciunta täpananpaq.

17Lapan yanapaqninkunawan aywarmi rey David ichikuykurqan marka yarqunacho. 18Capitanninkunawan tsaycho ichiraykaptinmi cereteo soldädukuna y peleteo soldädukuna nawpanpa pasapäkurqan. Tsaynöpis pasarqan soqta pachak (600) Gat runakuna. Tsay runakunaqa Gat markapita aywapäkurqan Davidta yanapananpaqmi.

19Nirkurmi Gat markapita capitán Itaita rey David kayno nirqan: <<Mana Israel runa kaykarqa noqawan ama aywaytsu. Mas alimi kanqa Jerusalénman kutiykur rey Absalón kaqcho quëdakuptiki. 20Qanyankunaraq chayamushqa kaykarqa noqakunawan ama aywaytsu. Kikïpis manami musyätsu mayman aywanäpaq kashqantapis. Tsayno kaptinqa mas alimi kanman marka mayikikunata pushakurkur Jerusalénman kutikuptiki. Tayta Dios imaypis yanapaykuläshunki>>.

21Tsawraqa Itai kayno nirqan: <<Mandamaqnï rey kaykaptikiqa maypa aywaptikipis wanuy kawaymi yanapashayki, tayta. Imaypis qamta yanapanäpaqmi Tayta Diospa jutincho qamta promitï>>.

22Tsayno niptin David kayno nirqan: <<Tsayno nimaptikiqa aywashun>>.

Tsaynöpami Gat markapita kaq Itai, paywan aywaq runakuna y paykunapa aylunkunapis Davidwan aywapäkurqan.

23Nänipa aywaykaqta rikarmi runakuna pasaypa lakikur waqapäkurqan. Cedrón raqrata pasarmi rey David y paywan aywaq runakuna chunyaq jirkaman aywaq nänilapa aywapäkurqan.

24Sadoc cürapis y Tayta Diospa Pactu Babulninta apaq levitakunapis Davidwanmi aywapäkurqan. Markapita yarqurirmi tsay babulta Abiatar cürapa nawpanman churapäkurqan lapan runakuna yarqushqanyaq. 25Sadoc cüratami David kayno nirqan: <<Tayta Diospa babulninta markaman kutitsiy. Tayta Dios yanapamaptinqa kutimur babulta y tolduntapis rikashaqraqmi. 26Rey kanäta mana munaptinqa alfin imanäshaqtaq. Pay munashqannöchari lapanpis kanqa>>.

27Mastapis Sadoc cürata rey David kayno nirqan: <<Qamqa tantiyakuq runami kaykanki. Tsayno kaykarqa cüra Abiatarwan, tsuriki Ahimaaswan y Abiatarpa tsurin Jonatánwan Jerusalénman kutipäkuy.#15.27 Imapaq kutinanpaq nishqantapis musyanaykipaq liyinki 2Sam. 17.15, 17. 28Paykunawan wilakatsimushqaykiyaqmi Jordán mayu väducho shuyaräshayki>>.

29Tsayno niptinmi Tayta Diospa babulninta apakurkur Sadoc y Abiatar Jerusalénman kutipäkurqan.

30Davidnami fiyupa lakikushpan uman shukutashqa y qara chakila Olivos jirkanpa waqaraykar witsarqan. Tsaynölami paywan aywaqkunapis uman shukutashqa waqaraykar witsäpäkurqan. 31Tsayno aywaykaptinmi Davidta wilapäkurqan yätsiqnin Ahitofelpis Absalónta yanapaykashqanta. Tsawraqa Tayta Diosta manakur David kayno nirqan: <<Tayta Dios, Ahitofelpa yarpayninta pantaykatsilay Absalónta yätsirpis lutanta yätsinanpaq>>.

32Olivos jirkanman jeqarkurmi David chayarqan Tayta Diosta adorakunan kaqman. Tsaychömi tinkurqan Aracpita kaq Husaiwan. Paypis lakikushpan röpan rachishqa y umanman alpa winakushqami kaykarqan. 33Paywan tinkurmi David kayno nirqan: <<Noqawan aywarqa afannïpaqmi aywanki. 34Tsaypa trukanqa Jerusalénman kutiykur Absalónta kayno ninki: <Papänikita yanapashqänölami kananqa qamtapis yanapashayki, tayta>. Tsayno niptikiqa capazchari chaskishunki yätsiqnin kanaykipaq. Churashuptiki Ahitofel yätsishqanta mana chaskipänanpaq shimita jatipanki. 35Tsaychömi kaykanqa Sadoc y Abiatar cürakunapis. Palaciucho Absalón yanapaqninkunawan imata wilanakushqantapis paykunata jukla wilanki. 36Sadocpa tsurin Ahimaas y Abiatarpa tsurin Jonatánpis tsaychömi kaykanqa. Paykunawan wilakatsimanki tsaycho ima pasashqantapis>>.

37Tsayno niptinmi Davidpa amïgun Husai Jerusalénman kutikurqan. Chayaykashqan hörami Absalónpis Jerusalénman chayarqan.

Currently Selected:

2 Samuel 15: qvmB

Highlight

Copy

Compare