1 Samuel 9

Saúlwan Samuel tinkushqan

1Benjamín trïbupitami respitashqa runa karqan Cis jutiyuq. Cispa taytanmi karqan Abiel. Abielpa taytanmi karqan Zeror. Zerorpa taytanmi karqan Becorat. Becoratpa taytanmi karqan Afía. 2Cispa tsurin Saúlmi kuyaylapaq mözu karqan. Israel runakunacho manami pipis payno kuyaylapaqqa karqantsu. Jatun kaptinmi wakin runakuna umrunyaqla karqan.

3Tsaypita juk kuticho Cispa bürrunkuna oqrakaptinmi tsurin Saúlta kayno nirqan: <<Juk ashmayta pushakurkur ayway bürruntsikunata ashimunaykipaq>>.

4Tsawraqa bürrunkunata ashinanpaq Saúl aywarqan. Efraín jalqakunapami ashir chayarqan Salisa nishqan jalqaman. Tsaychöpis mana tarirmi Saalim partipa y Benjamín trïbu runakuna tashqan partipapis ashirqan. Tsaychöpis manami tarirqantsu. 5Zuf partiman chayaykurnami ashmayninta kayno nirqan: <<Kaypita kutikushunna. Bürrukunapaq lakikunanpa trukanqa noqantsipaqnachari papänïqa lakikuykan>>.

6Tsayno niptinmi ashmaynin kayno nirqan: <<Kay markacho kanmi Tayta Diospa profëtan. Imapis pasananpaq niptinqa nishqannölami pasan. Tsaymi pïmaypitapis ali rikashqa kaykan. Pay kaqman chayaykur tapukuptintsiqa capazchari nimäshun maypa ashiq aywanantsipaqpis>>.

7Tsayno niptinmi Saúl kayno nirqan: <<Tsawraqa aku aywashun. Itsanqa mirkapakamushqantsi tantapis ushakashqanami. ¿Ima qarakuylawantaq#9.7 Wakin runakunaqa regälukunalawantaq nipäkun. payman chayashun?>>

8Tsawraqa ashmaynin kayno nirqan: <<Taksha yoraq qellaytami tsararaykä. Tsayta pägashun maypa ashiq aywanantsipaq kashqantapis wilamänantsipaq>>.

9(Unayqa profëtapaq Israel runakuna wilakuq nipäkuqmi. Tsaymi imapis kaptin Tayta Diosta tapukuyta munarqa kayno nipäkuq: <<Wilamänantsipaq wilakuqman aywashun>>.)

10Tsawraqa ashmayninta Saúl kayno nirqan: <<Jukla pay kaqman aywashun>>.

Tsayno nirmi Tayta Diospa profëtan kaqman aywapäkurqan.

11Markaman witsaykar tinkurqan yakukuq aywaykaq jipashkunawan. Tsaymi paykunata tapukurqan kayno nir: <<¿Tsaychötsuraq profëta kaykan?>>

12Jipashkunanami kayno nirqan: <<¡Aw! Tsayraqmi chayamushqa. Itsanqa warakayla aywapäkuy. Sacrificiuta rurananpaqmi runakuna qayatsishqa. Altar kaqman witsänanpaqnami kaykan. 13Tsaychömi lapan runakunawan sacrificiuta mikupäkunqa. Mikuq manaraq aywaptin jukla aywapäkuy. Pay manaraq chayaptinqa runakuna manami mikunqaraqtsu. Payraqmi runakuna mikunanpaq Tayta Diosta manakunqa. Jukla aywarqa manaraq yarquqtami taripäkunkipaq>>.

14Tsayno niptinmi markaman jukla witsaykashqancho Samuelwan tinkurqan. Payqa altar kaqman mikuqnami aywaykarqan.

15Tsay markaman Saúl chayananpaq juk junaq pishiykaptinmi Samuelta Tayta Dios kayno nirqan: 16<<Israel runakuna pasaypa nakashqanta rikarmi mandaqnin rey kananpaq manakamashqanta awnishqä. Tsaymi waray junaq kayno höra qam kaqman chayamunqa Benjamín trïbu runa. Paypa umanman aceitita winapanki kuyashqä Israel runakunapa mandaqnin rey kananpaq. Paymi Israel runakunata jorqunqa filisteo runakunapa munayninpita>>.

17Saúl chayaykuptinmi Samuelta Tayta Dios kayno nirqan: <<Taqay runa rey kananpaqmi qamta nirqä. Paymi Israel nacionpa mandaqnin rey kanqa>>.

18Tsay hörami marka yaykunacho Samuelwan tinkur Saúl kayno nirqan: <<Tayta, tapukuläshayki. ¿Mayninchötaq profëtapa wayin kaykan?>>

19Tsayno niptinmi Samuel kayno nirqan: <<Noqami kaykä ashiykashqayki profëta. Kananqa altar kaqman mikunantsipaq aywashun. Wara tutanami lapan tapukamashqaykita wilaykuptï aywakunkipaq. 20Kimsa junaqna ashiykashqayki bürruykikunapaq ama lakikuynatsu. Tsay bürruykikunataqa maynami taripäkushqa. Itsanqa kanan jukta wilashayki. Kananpitaqa Israel runakunapa lapan imaykanpis qampaq y ayluykikunapaqmi kanqa>>.

21Tsawraqa Saúl kayno nirqan: <<Noqaqa Benjamín trïbulapitami kaykä. Tsaynöpis tsay trïbuqa lapan Israel trïbukunapitapis mas walkalami kaykan. Benjamín trïbucho aylükunapis manakaqlami kaykan. Tsayno kaykaptinqa ¿imanirtaq tsayno nimanki?>>

22Tsaypitanami mikunanpaq kaq jatun cuartuman Saúlta y ashmayninta pushaykur Samuel jamatsirqan autoridäkuna jamakunanman. Tsaychömi qayatsishqan runakuna kaykarqan kimsa chunkano (30). 23Jamaykäriptinnami yanukuqta Samuel kayno nirqan: <<Churatsishqä alinnin kaq aytsata apamuy>>.

24Tsayno niptinmi jukla aparkamur yanukuq runa yanushqa chankan aytsata Saúlta churaparqan. Churaparkuptinmi Samuel kayno nirqan: <<Mikurkulay, tayta. Kay runakunata manaraq qayatsimurmi kay aytsata qampaq churatsirqä>>.

Tsayno niptinmi paykunawan Saúl mikurqan.

25Mikushqanpita wayinman kutiykurnami wayi janancho#9.25 Israel nacionchöqa wayita qatananpa trukanqa terrädu jananman tsaqlarkurmi mituwan lashtapäkuq. Tsay jananchönami awakäriq, aqakäriq y trïgutapis akrapäkuq. Saúlpaq cämata kamariparqan qorpa punukunancho. 26Tsawraqa tsay tsakay Saúl tsaycho punurqan. Waraynin#9.26 Wakin runakunaqa warantin nipäkun. tutanami qayaykur Samuel kayno nirqan: <<Sharkuyna markaykipa kutikunaykipaq>>.

Tsayno niptin Saúl jukla sharkurqan aywakunanpaq. Aywakuptinnami Samuelpis yanaqarqan markapita yarqunanyaq. 27Marka yarqunaman chayaykurna Samuel kayno nirqan: <<Tayta Dios nimashqankunata qamta wilanäpaq ashmayniki nawpakutsun>>.

Nawpakunanpaq niptinmi ashmaynin nawpakurqan.

Currently Selected:

1 Samuel 9: qvmB

Highlight

Copy

Compare