1 Samuel 8

Reyta churapänanpaq Israel runakuna munashqan

1Samuel awkinna karmi tsurinkunata Israel runakunapa jueznin kananpaq churarqan. 2Qechpa tsurinpa jutinmi karqan Joel y shulka tsurinpa jutinmi karqan Abías. Paykunami Beerseba markacho juez karqan. 3Paykuna manami papäninnötsu ali juez karqan. Ali arreglananpa trukanqa codiciösu karmi jutsa ruraqkunapa favornin sharkunanpaq chaskipakuq.

4Tsayno kaptinmi Israel mayor runakuna Ramáman aywaykur Samuelta 5kayno nirqan: <<Qam awkinnami kanki y tsurikikunaqa manami kikikinötsu runakuna quejakushqanta arreglapäkun. Tsayno kaykaptinqa wakin nacionkunacho rey kashqanno nacionnintsichöpis rey kananpaq churapaykalämay>>.#Deut. 17.14.

6Tsayno niptinmi Samuelqa lakikushpan Tayta Diosta manakurqan paykuna nishqanta rurananpaq o mana rurananpaq kashqantapis tantiyatsinanpaq. 7Tsaymi Samuelta Tayta Dios kayno nirqan: <<Paykuna manakuykäshuptikiqa reyta churapay. Imano kaptinpis ama jaqayaytsu manakaqman churaykäshushqaykita yarpar. Juk reyta manakushushpaykiqa noqatami manakaqman churaykäman. 8Paykunaqa Egiptupita jorqamushqä junaqpita patsami juk dioskunata adorar rabyanätsimashqa. Tsaynölami qamtapis rabyanaykätsishunki. 9Paykuna manakushushqaykinöla reyta churapay. Itsanqa shumaq tantiyatsinki churapashqayki rey paykunata nakatsinanpaq kashqanta>>.

10 Tayta Dios tsayno nishqankunatami Israel runakunata Samuel wilapar 11kayno nirqan: <<Tsay reymi tsurikikunata churanqa guërra carrëtawan pelyaq aywananpaq, cawallun muntashqa guërraman aywananpaq y paypa carrëtanpa puntanta cörrila aywananpaq. 12Tsaynöpis wakin tsurikikunata churanqa waranqa (1,000) soldädukunata mandananpaq y wakintana churanqa pitsqa chunka (50) soldädukunata mandananpaq. Wakintana churanqa chakranta arupänanpaq y wakintana cosëchata shuntapänanpaq. Wakintana churanqa armata rurananpaq y wakintana churanqa guërra carrëtankunata rurananpaq. 13Warmi tsurikikunatana churanqa perfümikunata rurananpaq, yanukunanpaq y tantata masarananpaq. 14Churashqayki reymi qechushunki üva plantaraykaq chakraykikunata, olïvu plantaraykaq chakraykikunata y wakin alinnin kaq chakraykikunata. Nirkurnami yanapaqninkunata aypunqa. 15Tsaynöpis mandäshiqninkunata aypunanpaqmi cosëchata shuntashqaykipita tsaki mikuy kaptinpis üva kaptinpis cada chunka tupupita juk tuputa apapänaykipaq nishunki. 16Tsaynöpis paylapaq arutsinan kashqami qechushunki ashmaynikikunata warmitapis olqutapis. Tsaynölami qechushunkipaq alinnin wäkaykikunata y alinnin bürruykikunata. 17Tsaynöpis cada chunka uyshaykikunapitami jukta apakunqapaq. Kikikikunatapis churashunki mandu ruraq kanaykipaqmi. 18Mandaqniki rey tsayno nakatsishuptiki fiyupa lakikuptikipis Tayta Dios manami mayashunkipaqtsu>>.

19Samuel tsayno niptinpis runakunaqa manami chaskikärirqantsu. Tsaypa trukanqa kayno nipäkurqan: <<Imano kaptinpis reyta churapamänaykitami munapäkü. 20Wakin nacionkunapa mandaqnin rey kashqanno kanantami noqakunapis munapäkü. Paypa munayninchömi noqakuna kashaqpaq. Paymi guërraman aywapäkuptï puntäkunata aywanqapaq>>.

21Runakuna tsayno nishqanta Tayta Diosta Samuel wilaptinmi 22Tayta Dios kayno nirqan: <<Paykuna manakushqanno mandaqnin reyta churapay>>.

Tsayno niptinmi runakunata Samuel wilarqan Tayta Dios awnishqanta. Nirkurmi markankunapa kutikärinanpaq Samuel nirqan.

Currently Selected:

1 Samuel 8: qvmB

Highlight

Copy

Compare