1 Samuel 3
3
Samuelta Tayta Dios qayashqan
1Samuelqa Elí tantiyatsishqannömi Tayta Diosta sirvirqan. Tsay witsan Tayta Diospa wilakuyninta wilakuqkuna juk ishkayla karqan. Tsaynöpis aybësislami pitapis Tayta Dios revelaq.
2Elíqa pasaypa awkinna karmi mana reqikur cuartuncho punuykarqan 3y Samuelnami Tinkuna Toldu rurincho punuykarqan. Tsaychömi Tayta Diospa babulnin kaykarqan y candelabrupis rataykarqan. 4Samuel tsaycho punuykaptinmi Tayta Dios qayakurqan kayno nir: <<¡Samuel!>>
Qayakuptinmi Samuel kayno nirqan: <<¿Imalataq kaykan, tayta?>>
5Tsayno nirmi Elí kashqan kaqman warakayla aywaykur kayno nirqan: <<Kaychömi kaykä, tayta. ¿Imapaqtaq qayaykämanki?>>
Tsayno niptin Elí kayno nirqan: <<Qamta manami qayashqätsu. Cämaykiman kutikuy>>.
Tsawraqa Samuel kutiykur cämanman punukuykurqan.
6Kutiykur punuraykaptinmi Tayta Dios yapay qayakurqan kayno nir: <<¡Samuel!>>
Tsayno qayaptinmi Samuel yapay sharkurkur Elí kaqman aywaykur kayno nirqan: <<Kaychömi kaykä, tayta. ¿Imapaqtaq qayaykämanki?>>
Tsayno niptin Elí kayno nirqan: <<Qamta manami qayashqätsu. Cämaykiman kutikuy>>.
7 Tayta Dios imaypis manaraq parlapashqa kaptinmi qayaykashqanta Samuelqa tantiyarqantsu. 8Tsaypita yapaymi Samuelta Tayta Dios qayarqan. Tsayno qayaptin cämanpita sharkurkur yapay Elí kaykashqan kaqman aywaykur kayno nirqan: <<Kaychömi kaykä, tayta. ¿Imapaqtaq qayaykämanki?>>
Kimsa kutina kutiptinmi Elí tantiyarqan Samuelta Tayta Dios qayaykashqanta. 9Tsawraqa kayno nirqan: <<Kutikuy cämaykiman. Yapay qayashuptikiqa kayno ninki: <Mayaykämi, Tayta. ¿Imalataq nimänaykipaq kaykan?> >>
Tsayno yätsirkuptinmi Samuel yapay kutikurqan cämanman.
10Cämancho kaykaptinmi Tayta Dios shamur nawpata qayashqannöla yapay qayakurqan kayno nir: <<¡Samuel! ¡Samuel!>>
Tsayno qayaptin Samuel kayno nirqan: <<Mayaykämi, Tayta. ¿Imalataq nimänaykipaq kaykan?>>
11Tsawraqa Tayta Dios kayno nirqan: <<Israel runakunaqa imaypis mana rikashqanta ruraptïmi pasaypa lakikärinqa. 12Elípa y tsurinkunapa contran rikakunäpaq nishqäkunataqa tsay junaqmi lapanta cumplishaq. 13Tsurinkuna noqata rabyanätsimar conträ rurashqanta musyarpis Elíqa manami olqüpashqatsu. Tsaymi musyatsishqä paypita miraqkunata ushakätsinäpaq kashqanta. 14Tsaymi jurar kayno nishqä: Elípita miraqkunataqa sacrificiuta altarcho rupatsiptinpis ni ofrendata apamuptinpis manami imaypis perdonashaqtsu>>.
Tayta Dios nishqanta Elíta Samuel wilapashqan
15Tsaypitanami Samuelqa patsa warashqanyaq punukurqan. Patsa wararkuptinnami imaypis rurashqanno Tayta Diospa wayinpa punkunta kicharqan. Tayta Dios nishqankunatami itsanqa Elíta wilapayta mantsakurqan. 16Tsayno yarpachakuykaptinmi Samuelta Elí qayarqan: <<Shamuy, hïju>>.
Tsaymi Samuelqa aywaykur kayno nirqan: <<¿Imalataq kaykan, tayta?>>
17Tsawraqa Elí kayno nir tapurqan: <<¿Imatataq Tayta Dios nishushqanki? Pay nishushqaykita lapanta wilamay. Mana wilamaptikiqa Tayta Dios pasaypami castigashunkipaq>>.
18Tsayno niptinmi Samuelqa Tayta Dios nishqankunata lapanta wilarqan. Wilaptinmi Elíqa kayno nirqan: <<Alfin imanäshaqtaq. Tsayno kaptinqa Tayta Dios munashqannöchari kanqa>>.
19Samueltanami winashqanman tupu Tayta Dios imachöpis yanaparqan. Tsaynöpis Samuel wilakushqannölami lapanpis pasarqan. 20Tsaymi Dan markapita Beerseba markayaq Israel runakuna tantiyapäkurqan Samuelqa Tayta Diospa profëtan kashqanta. 21Tayta Diosqa Silo markachömi Samuelta imaypis parlapaq.
Currently Selected:
1 Samuel 3: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
