1 Samuel 20

Davidta Jonatán yanapashqan

1Tsaypitanami Ramá cercancho kaykaq Naiot markapita David qeshpikurqan Jonatán kaqman. Chayaykurmi kayno nirqan: <<¿Ima jutsatataq noqa rurashqä? ¿Imachötaq papänikita rabyanätsishqä wanutsimayta yarpänanpaq?>>

2Tsaymi Jonatán kayno nirqan: <<¡Manami wanutsishunaykipaq yarpantsu! Papänïqa imata rurananpaq kaqtapis noqataraqmi wilaman. Rasunpa wanutsiyta munashushpaykiqa ¿imanirraq mana wilamashqatsu? Payqa manami wanutsishunkitsu>>.

3Tsawraqa David kayno nirqan: <<Kuyanakushqantsita musyarmi lakikunaykita mana munashpan papäniki mana wilashushqankitsu. Tayta Diospis musyanmi wanutsimänanpita awja puntalanpa qeshpimushqäta>>.

4Tsayno niptinmi Jonatán kayno nirqan: <<Tsayno kaptinqa ¿imatataq ruräman qamta yanapanäpaq?>>

5Tsawraqa David kayno nirqan: <<Warami lulu killa kaptin fiesta kanqa.#Núm. 28.11. Tsay fiestachöqa imaypis papänikiwanmi mësacho jamakuq kä. Warami itsanqa fiestaman aywanäpa trukan chakrapa aywaykur ishkay junaqyaq pakaräkushaq. 6Fiestacho papäniki noqapaq tapushuptikiqa kayno ninki: <Belénchöshi aylunkuna wata wata fiestata rurar sacrificiuta rupatsipäkun. Tsayman aywananpaqmi ruwakamashqa>. 7Tsawraqa <alimi aywashqa> nishuptikiqa manami mantsakushaqnatsu. Rabyaptinmi itsanqa qampis musyankipaq rasunpa wanutsimayta munaykashqanta>>.

8Mastapis David kayno nirqan: <<Imaypis yanapanakunantsipaqmi Tayta Diospa nawpancho pactuta rurashqantsi. Tsaymi kanan ruwakü jutsata rurashqa kaptïqa kikiki wanutsimänaykipaq. Ama papänikimanraqqa apamaytsu>>.

9Tsayno niptin Jonatán kayno nirqan: <<¡Tsaykunata ama yarpaytsu! Papänï wanutsishunaykipaq yarpashqanta musyarqa imanöpapis juklami wilakatsimushaq>>.

10Tsawraqa David kayno nirqan: <<¿Piraq wilamanqa papäniki toscu shiminwan imatapis nishushqaykita?>>

11Tsayno niptin Jonatán kayno nirqan: <<Aku aywashun chakrapa>>.

Tsayno nirmi ishkan aywapäkurqan. 12Chakraman chayaykurnami Jonatán kayno nirqan: <<Yärakushqantsi Tayta Diospa jutinchömi promitï papänï imata yarpashqantapis wara o warapa waran kay hörano qamta musyatsinäpaq. Qampita mana rabyaptinqa juklami wilakatsimushayki. 13Rabyashqa imatapis contrayki rimaptinqa juklami qeshpikunaykipaq wilakatsimushaq. Mana wilakatsimuptïqa Tayta Dios castigamätsun. Papänïta yanapashqannöla qamtapis Tayta Dios yanapaykuläshunki>>.

14Mastapis Jonatán kayno nirqan: <<Kawaykaptïraqqa Tayta Dios kuyapäshushqaykino noqatapis kuyapaykalämanki. 15Tayta Dios contraykikunata ushakätsiptinpis aylükunata kuyapaykulanki. 16Lapan contrayki kaqtaqa Tayta Dios juzgar chipyaq ushakätsitsun>>.

Tsayno nirmi Davidwan Jonatán pactuta rurarqan promitinakushqanta imaypis cumplinanpaq.#2Sam. 9.1. 17Tsaypitami Davidta pasaypa kuyashpan Jonatánwan imaypis mana kachanakunanpaq yapay promitinakurqan.

18Tsaymi Jonatán kayno nirqan: <<Wara junaq lulu killa fiestacho mikuy höra mana kaptiki papänï watukushunkipaqmi. 19Kimsa junaq pakarashqayki tardina puntata pakarashqaykiman aywaykur Ezel rumi waqtalanman pakakunki. 20Tsayman shamurmi yachakuq tumpala kimsa kuti flëchamushaq pakarashqayki nawpankunapa. 21Nirkurna pusharashqä ashmaynïta tsay flëchamushqäkunata shuntamunanpaq nishaq. <Flëchakuna kay läduchömi kaykan; tsayta shuntamuy> niptïqa mana mantsakuypa yarqamunki. Tayta Diospa jutinchömi promitï imapis mana pasashunaykipaq. 22<Mas washa läduchömi flëcha kaykan> niptïmi itsanqa musyankipaq aywakunaykipaq Tayta Dios munashqanta. 23Kanan parlashqantsita cumplinantsipaq Tayta Diosmi testïgu kaykan>>.

24Tsawraqa parlakushqannölami David aywaykur pakakurqan. Waraynin#20.24 Wakin runakunaqa warantin nipäkun. junaq lulu killa kaptin fiestata rurashpanmi rey Saúl mikunanpaq jamakurqan. 25Costumbrin kashqanno Saúlqa perqa kaq lädupa jamakurqan. Jonatánnami jamakurqan Saúlpa tsimpanman. Abnernami jamakurqan Saúlpa nawpanman. David jamakunan kaqmi itsanqa jäkurarqan. 26Tsay junaqmi Saúl kayno nir yarparqan: <<Davidtaqa imalapis pasashqami kanqa. Tsaychari impüru kar mana shamunraqtsu>>.#Lev. 7.20-21; 15.1-33.

27Waraynin junaqpis Davidta mana rikarmi Jonatánta tapurqan kayno nir: <<¿Imanirtaq qanyanpis ni kananpis Isaípa#20.27 Wakin traduccionkunachöqa Jesépa ninmi. tsurin mikuq shamushqatsu?>>

28Tsayno tapuptin Jonatán kayno nirqan: <<Belénman aywananpaqmi ruwakamashqa. 29Tsaychöshi aylunkuna sacrificiuta rupatsir fiestata rurarkaykan. Tsay fiestacho kananpaqshi wawqin qayatsishqa. Tsaynöpis nimashqa tsayman aywaqnöla aylunkunata watukunanpaq kashqanta. Tsaymi mikuq mana shamushqatsu, papä>>.

30Tsayno niptinmi Saúl pasaypa rabyashpan kayno nirqan: <<¡Supaypa wawan! Isaípa tsurinwan pasaypa kuyanakushqaykita ¿mana tantiyashqätaku yarpanki? Tsayno karqa pasaypa penqakuypaqmi kaykanki. Mamaykitapis penqaymanmi churaykanki. 31David kawaptinqa manami imaypis rey kankipaqtsu. ¡Jukla maypitapis chätsimuy wanutsinäpaq!>>

32Tsawraqa Jonatán kayno nirqan: <<¿Ima jutsatataq rurashqa wanutsinaykipaqqa?>>

33Tsayno niptinmi pasaypa rabyashpan tsurin Jonatán jananpa lanzanwan Saúl lanzaykurqan. Tsayno ruraptinmi Jonatán tantiyakurqan rasunpa Davidta wanutsiyta munaykashqanta. 34Tsaymi pasaypa rabyakushpan mikuytapis mana mikuylapa mësapita sharkurkur aywakurqan. Davidpaq tsayno juraptinmi pasaypa lakikurqan.

35Waraynin tutanami wilanakushqannöla Jonatán aywarqan David pakaraykashqan chakraman. Tsaypa aywarmi pusharqan juk ashmaynin wamrata. 36Tsaymi tsay wamrata kayno nirqan: <<Ayway flëchashqä flëchakunata shuntamunaykipaq>>.

Tsayno niptinmi tsay wamra cörrirqan flëchata shuntamunanpaq. Tsawraqa wamra jananpa flëcharqan mas washa läduman chayananpaq. 37Flëchashqan kaqman chayaykaptinna Jonatán qayakurqan kayno nir: <<¡Mas washa läduchöraqmi flëcha kaykan!>>

38Nirkurna Jonatán yapay kayno nirqan: <<¡Mana ichiypa warakayla ayway!>>

Tsayno niptinmi wamraqa flëchakunata shuntarkamur Jonatánman apaparqan. 39Tsay wamraqa imanir tsayno nishqantapis manami musyarqantsu. Tsaytaqa Jonatán y Davidlami musyarqan.

40Nirkurna flëchankunata ashmaynin wamrata aptaparkur markapa kutikunanpaq nirqan. 41Wamra aywakuptinnami pakaraykashqanpita David yarqamur Jonatánpa nawpanman kimsa kuti qonqurpakuykurqan urkunpis pampaman töpashqanyaq. Tsaypitami ishkan makalanakurkur waqapänakurqan. Davidmi Jonatánpitapis mas waqarqan. 42Tsaymi Davidta Jonatán kayno nirqan: <<Ama lakikuytsu. Imaypis kuyanakunantsipaqmi Tayta Diospa jutincho promitinakushqantsi. Mana cumpliptintsiqa noqantsitapis y wamrantsikunatapis Tayta Dios juzgamäshun>>.

1 (21.1) Tsayno wilanakurkurmi David aywakurqan y Jonatánpis markapa kutikurqan.

Currently Selected:

1 Samuel 20: qvmB

Highlight

Copy

Compare