1 Reyes 8

Pactu Babulta templuman apatsishqan

2 Crónicas 5.2-14

1Tsaypitanami Salomónqa Jerusalénman qayatsirqan lapan Israel mayor runakunata, trïbukunapa mandaqnin runakunata y Israel aylukunacho mas respitädu runakunatapis. Paykunata qayatsirqan Tayta Diospa Pactu Babulninta Davidpa Markanpita templuman apapäkunanpaqmi.#2Sam. 6.12-16; 1Crón. 15.25-28. Davidpa Markanpa jukaq jutinmi kaykan Sión. 2Etanim killacho jatun fiestata ruraykashqan junaqmi#8.2 Tsay fiestaqa Ramäda fiestami karqan. Noqantsipa calendariuntsichöqa Etanim killa kaykan pulan setiembripita pulan octubriyaqmi. Ramäda fiestapita masta musyanaykipaq liyinki Lev. 23.33-43; Deut. 16.13-17. tsay qayatsishqan runakunawan Salomón juntakarqan. Etanim killaqa karqan qanchis kaq killami. 3Lapan mayor runakuna juntakaykuptinnami cürakuna babulta umrukurkur templuman apapäkurqan. 4Paykunawanmi levitakunapis tsay babulta, Tinkuna Tolduta y manëjunkunatapis apapäkurqan.

5Templuman chayaykatsirmi babulpa nawpanman rey Salomónqa lapan Israel runakunawan juntakarqan. Tsaychömi Tayta Diosta adorashpan yupaytapis mana atipaypaq tsaytsika uyshakunata, cabrakunata y törukunata pishtarkur altarcho rupatsirqan. 6Nirkurnami Tayta Diospa Pactu Babulninta cürakuna churarqan Lugar Santïsimucho ishkay querubinkunapa älankuna rurinman. 7Tsay querubinkunapa älankunami babul jananpa mashtararqan. Tsaynöpami babul y wintukunan qerukunapis querubinkunapa älankuna rurincho karqan. 8Wintukunan qerukunaqa largu karmi Lugar Santupita rikakarqan. Alarpitami itsanqa mana rikakarqannatsu. Tsaynölami kananyaqpis kaykan. 9Tsay babulchöqa Horebcho Moisés churashqan ishkay läja rumikunalami winararqan.#Deut. 10.5. Tsay läjakunachömi qelqararqan Israel runakuna Egiptupita yarqamushqan witsan paykunawan Tayta Dios pactuta rurashqan.

10Lugar Santupita cürakuna yarquptinmi Tayta Diospa templunta pukutay tsapakurkurqan. 11Pukutay tsayno tsapakurkuptinmi y kikin Tayta Dios tsay pukutaycho kaptinmi cürakunaqa ima ruraytapis mana kamäpakur yarqukärirqan.#Éxo. 40.34-35.

Templuta Salomón dedicashqan

2 Crónicas 6.1—7.10

12Tsaymi Tayta Diosta manakur Salomón kayno nirqan: <<Tayta Dios, yanawyaykaq pukutay rurincho tashqaykitami nishqanki. 13Tsayno kaptinpis kananqa templuta sharkatsishqä imayyaqpis tsaycho tänaykipaqmi>>.

14Nirkurnami tsaycho kaykaq Israel runakunaman tikraykur bendicionta qoshpan rey Salomón 15kayno nirqan: <<Alabashqa kaykulätsun yärakushqantsi Tayta Dios. Paymi papänï Davidta promitishqankunata lapanta cumplishqa. Promitirmi kayno nirqan: 16<Kuyashqä Israel runakunata Egiptupita jorqamushqä junaqpita patsa manami manakushqätsu mayqan Israel trïbukunapa markanchöpis täkunä templuta rurapämänanpaq. Davidtami itsanqa akrarqä Israel runakunapa mandaqnin rey kananpaq>.#2Sam. 7.4-8; 1Crón. 17.3-6.

17<<Papänï Davidqa kuyamaqnintsi Tayta Diosta adoranantsipaq templuta ruratsiytami munarqan. 18Tsayno munaptinpis Tayta Dios kaynömi nirqan: <Noqapaq templuta sharkatsiyta yarpashqayki alimi kaykan.#2Sam. 7.1-3; 1Crón. 17.1-2. 19Itsanqa manami qamtsu sharkatsinkipaq, sinöqa tsurikiraqmi noqapaq templuta sharkatsinqa>.#2Sam. 7.12-13; 1Crón. 17.11-12.

20<<Promitishqannölami Tayta Dios cumplishqa. Tsaymi papänï Davidpa trukan Israel runakunapa mandaqnin rey kaykä. Tsaynöpis kuyamaqnintsi Tayta Diospaq templuta sharkatsishqä. 21Tsaymanmi Tayta Diospa Pactu Babulninta churatsishqä. Tsay babul rurinchömi qelqaraykan Egiptupita jorqamur unay ayluntsikunawan Tayta Dios rurashqan pactu>>.

22Tsayno nirkurmi Salomónqa Tayta Diospa altarnin nawpanman aywaykur lapan Israel runakuna rikaykaptin makinta altupa joqarirqan. 23Nirkurmi Tayta Diosta manakushpan kayno nirqan: <<Israel runakunata kuyaq Tayta Dios, jana patsachöpis ni kay patsachöpis qamnöqa manami ima diospis kantsu. Sirvishuqnikikunawan pactu rurashqaykitaqa imaypis cumplinkimi. Tsaynömi lapan shonqunwan munashqaykino kawaqkunata imaypis kuyapanki. 24Sirvishuqniki papänï Davidta lapan promitishqaykita cumplirmi templuykita sharkatsinäpaq yanapamashqanki.

25<<Israel runakunata kuyaq Tayta Dios, papänï Davidta promitirmi kayno nirqayki: <Qampita miraqkunapis qam cumplishqaykino mandamientükunata cumpliptinqa Israel runakunapa mandaqnin reykuna kananpaqmi imaypis churashaq>.#2Sam. 7.11-16; 1Rey. 2.4. 26Tsay promitishqaykita imaypis cumpliykulay, Tayta.

27<<Itsanqa ¿rasunpatsuraq kay patsaman aywaykamur runakuna tashqancho tankipaq? Jana patsapis tsayjinanpa tsikankaray kaykarpis manami aypantsu tänaykipaq. Tsayno kaykaptinqa ¡imanöparaq kay ruratsipashqä templu aypanqa!#2Crón. 2.6. 28Imano kaptinpis lapan shonqüwan manakamushqäta mayaykalämay, Tayta Dios. Tsaynöla kanan ruwakamushqäta chaskiykalämay. 29Kikikimi nirqayki kay templucho imaypis tänaykipaq. Tsayno kaptinqa paqaspapis junaqpapis kay templucho kaykulay manakamushqäta imaypis mayaykamänaykipaq. 30Noqa manakuptïpis y kuyashqayki Israel runakuna kay templucho manakushuptikipis mayaykulay. Ima jutsata rurapäkuptïpis perdonta manakamuptïqa jana patsacho tashqaykipita patsa perdonaykalämay.

31<<Pipis runa mayinpa contran sharkur jukta jitapaptinqa rasun kaqta musyapäkunanpaq kay altarnikiman qayaykatsimur juratsiptin 32jana patsapita patsa mayaykalämunki. Nirkur jutsayuq kaqta castigarpis jutsaynaq kaqtaqa ama castigaykulankitsu.

33<<Kuyashqayki Israel runakuna jutsata rurashqanpita contrankuna vincir nacionninman apakuptin kay templu lädupa rikäramur perdonta manakur alabashuptikiqa 34jana patsapita patsa mayaykalämunki. Nirkur perdonashpayki unay aylükunata qoykushqayki nacionman kutiykatsilämunki, Tayta.

35<<Jutsata rurashqanpita pasaypa usyawan castigaptiki kay templu lädupa rikäramur perdonta manakur alabashuptikiqa 36jana patsapita patsa mayashpayki kuyashqayki Israel aylu ashmaynikikunata perdonaykulanki. Nirkur tantiyaykatsilanki cäsukushushpayki shumaq kawapäkunanpaq. Tsaynöpis qoykushqayki chakrakunaman tamyaykatsilämunki, Tayta.

37<<Kay nacioncho muchuy kaptin, pesti kaptin, usyawan lapan tsakiptin, mikuykunata rancha ushaptin, chukluskuna o malumyakuna ushaptin, mayqan markatapis contrankuna jiruruypa tsapaptin, o ima desgraciapis o ima qeshyapis tsariptin kuyapaykulanki, Tayta. 38Kuyashqayki Israel runakuna mayqanpis jutsayuq kashqanta tantiyar kay templu lädupa makinkunata joqarkur manakamushuptiki 39jana patsacho tashqaykipita patsa mayashpayki perdonaykulanki. Qam musyankimi runa imata yarpashqantapis, Tayta. Tsawraqa runakunata cada ünunta imano kawashqanman tupu yanapaykulanki. 40Tsayno yanapashqaykita tantiyakurmi unay aylükunata qoykushqayki nacioncho imaypis mantsakärishunkipaq.

41<<Tsaynölami kuyapäkuq Tayta Dios kashqaykita mayar juk lädu nacioncho taq mana Israel runakunapis kay nacionman shamunqa. 42Paykunapis musyanqami lapanpaq munayniyuq Dios kashqaykita y qampaq imapis sasa mana kashqanta. Kay templu lädupa rikäramur manakushuptiki 43jana patsapita patsa mayashpayki yanapaykulanki. Tsayno yanapaykulanki kay patsacho lapan nación runakunapis rikakushpan kuyashqayki Israel runakunano mantsakushunaykipaq. Tsaynölami paykunapis tantiyakärinqa kay sharkatsishqä templucho adorapäkushushqaykita.

44<<Kuyashqayki Israel runakuna contrankunawan pelyananpaq maymanpis kachaptiki kay akrashqayki marka lädupa y qampaq sharkatsishqä templu lädupa rikäramur manakamushuptiki 45jana patsapita patsa mayashpayki yanapaykulanki.

46<<Lapan runakunapis jutsa ruraqlami kaykan, Tayta. Tsayno kashpan kuyashqayki Israel runakuna jutsata ruraptin imaptinqa pasaypa rabyashpayki capazchari manana yanapankipaqnatsu. Tsayno kaptin contrankuna shamushpan capazchari nacionninman apakärinqa cercaman karpis o karuman karpis. 47Tsaycho kaykar capazchari cuentata qokushpan kayno nir perdonta manakushunkipaq: <Jutsata rurashpämi qamta mana cäsukushqätsu, Tayta>. 48Tsaynöpis capazchari contran runakunapa markancho kaykar lapan shonqunwan yärakamur manakushunkipaq. Unay aylükunata qoykushqayki nación lädupa rikäramur, kay akrashqayki marka lädupa rikäramur y qampaq sharkatsishqä templu lädupa rikäramur ruwakushuptiki 49taykashqayki jana patsapita patsa mayar yanapaykulanki, Tayta. 50Kuyashqayki Israel runakuna jutsata rurashqanpita perdonaykulanki. Tsaynöpis munaynincho tsararaq runakunata tantiyaykatsilanki Israel runakunata kuyapänanpaq. 51Kuyashqayki runakuna kaykaptinqa tsayno yanapaykulanki. Egiptucho fiyupa nakaptinmi kuyapashpayki jorqamurqayki.#Deut. 4.20; Jer. 11.4.

52<<Noqa manakamushqäta y Israel runakuna manakamushqantapis mayaykalämay, Tayta. Tsayno mayaykalämanki imay höra manakärimuptïpis. 53Unay aylükunata Egiptupita jorqamushqayki witsanmi sirvishuqniki Moiséswan musyatsirqayki Israel runakunata kuyar akrashqaykita. Tsaynöpis musyatsirqayki juk nacionta akranaykipa trukan Israel nación runakunata akrashqaykita. Tsaynöpami Israel runakunaqa qampa herenciaykina kaykan>>.

54 Tayta Diospa altarnin nawpancho makinta joqarkur Salomón manakuyta usharirmi qonqurparaykashqanpita sharkurqan. 55Nirkurmi Israel runakunata bendicionta qoshpan qayaraypa kayno nirqan: 56<<Tayta Dios alabashqa kaykulätsun promitishqanno Israel runakunata ali kawananpaq yanapashqanpita. Moisés wilakushqannölami lapan promitimashqantsikunata cumplishqa.#Jos. 21.44-45. 57Unay ayluntsikunata mana kachaypa yanapashqannöla noqantsitapis Tayta Diosnintsi mana kachaypa imaypis yanapaykalämäshun. 58Tsaynöpis ali yarpayta y ali tantiyayta qoykalämäshun unay ayluntsikuna chaskishqan mandamientunkunata, estatütunkunata y leyninkunata cumplir pay munashqanno kawanantsipaq.

59<<Kanan manakushqäta tsakaypapis junaqpapis Tayta Diosnintsi imaypis yarpaykulätsun. Tsaynöpami noqatapis y qamkunatapis mana kachaypa yanapamäshunpaq. 60Tsayno yanapamaptintsimi maytsay nacioncho taq runakuna musyapäkunqa Tayta Dios japalan lapanpaq munayniyuq kashqanta y paypita mas juk dios mana kashqanta. 61Kanan junaq lapantsimi promitiykantsi lapan shonquntsiwan Tayta Diosnintsi nishqankunata cäsukur leyninkunata, mandamientunkunata cumplir kawanantsipaq. Kanan junaq promitishqantsinöla imaypis cumplishun>>.

62Tsaypitanami rey Salomón y lapan Israel runakuna Tayta Diospaq sacrificiukunata rupatsipäkurqan. 63Tsaymi ali kawakuy sacrificiupaq rupatsipäkurqan ishkay chunka ishkay waranqa (22,000) törukunata y pachak ishkay chunka waranqa (120,000) uyshakunata y cabrakunata. Tsaynömi Tayta Diospaq sharkatsishqan templuta lapan Israel runakunawan Salomón dedicarqan.

64Rupatsina sacrificiukuna, tsaki mikuy ofrendakuna y ali kawakuy sacrificiukuna tsaytsika kaptinmi Tayta Diospa nawpancho bronci altar mana ayparqantsu rupatsipäkunanpaq. Tsaymi templu patiu chawpintapis Salomón tsay junaqla dedicarqan tsay pampacho rupatsipäkunanpaq.

65Altarta dedicarmi Salomónqa lapan Israel runakunawan Tayta Diosnintsipa nawpancho qanchis junaq fiestata rurapäkurqan. Tsay fiestamanmi Israel nación lapan markakunapita shapäkamurqan. Fiestata usharkurnami qanchis junaq mastapis Ramäda fiestata rurapäkurqan. Tsaywanqa chunka chusku junaqmi fiestata rurapäkurqan. 66Fiesta ushaynami runakuna kutikärinanpaq rey Salomón despachaptin agradëcikurkur wayinpa kushishqa kutikärirqan. Tayta Diostami agradëcikärirqan sirviqnin Davidta y kuyashqan Israel runakunata yanapashqanpita.

Currently Selected:

1 Reyes 8: qvmB

Highlight

Copy

Compare