1 Reyes 3
3
Faraónpa mashan Salomón yaykushqan
1Tsaypitanami Salomónqa Egipto nacionpa mandaqnin rey Faraónpa tsurinta jorqurkur Davidpa Markanman aparqan. Tsay witsanmi Salomón aruykätsirqan palaciunta, Tayta Diospa wayinta y Jerusalén markapa murällanta. 2Tayta Diosta adorananpaq wayin manaraq kaptinmi altarkunalacho sacrificiuta rupatsipäkuq.
Tantiyakuq kananpaq Tayta Diosta Salomón manakushqan
2 Crónicas 1.1-13
3Salomónqa Tayta Diosta kuyashpanmi taytan David yätsishqankunata lapanta cumplirqan. Itsanqa juk lädu altarkunachömi sacrificiukunata rupatsirqan y inciensuwan qoshtatsirqan. 4Lapan tsay altarkunapitapis Gabaóncho kaykaq altarqa mas jatun y mas reqishqami karqan. Tsaymi rey Salomón tsayman aywaykur waranqa (1,000) uywakunata pishtarkur rupatsina sacrificiukunata rupatsirqan.
5Gabaóncho kaykaptinmi sueñuynincho yuriparkur Salomónta Tayta Dios kayno nirqan: <<Imatapis manakamashqaykitami kamaripäshayki>>.
6Tsayno niptin Salomón kayno nirqan: <<Sirvishuqniki papänï David lapan shonqunwan munashqaykino kawaptinmi ali yanapashqanki. Kananpis payta kuyarmi trukan rey kanäpaq churamashqanki. 7Tsaymi noqata churamaptiki papänïpa trukan rey kaykä. Mözularaq karmi imano mandanäpaqpis mana musyäraqtsu. 8Kananqa yupaytapis mana atipaypaq akrashqayki runakunapa mandaqnin reymi kaykä. 9Tsay runakunata shumaq mandanäpaq ali yarpayta y yachayta qoykalämay, Tayta. Shumaq tantiyaykatsilämay yarpaynïkuna ali kashqanta o mana ali kashqantapis musyanäpaq. Tantiyayta mana qomaptikiqa manami kuyashqayki tsaytsika runakunata mandayta kamäpakushaqtsu>>.
10Salomón manakushqan ali kaptinmi 11Tayta Dios kayno nirqan: <<Qamqa manami manakamashqankitsu atska wata kawanaykipaq, rïcu kanaykipaq ni contraykikunata ushakätsinäpaq. Tsaypa trukanqa manakamashqanki shumaq tantiyakur ali mandanaykipaqmi. 12Tsaymi manakamashqaykino yanapashayki ali tantiyakuq y yachaq kanaykipaq. Qam yachaq kashqaykinöqa manami pipis yachaq kashqatsu ni kanqatsu. 13Tsaynölami mana manakaykämaptikipis yanapashayki rïcu kanaykipaq y munayniyuq kanaykipaq. Tsaymi kawashqaykiyaqqa qampita mas munayniyuq reyqa mana kanqatsu. 14Lapan leynïkunata y mandamientükunata papäniki Davidno cumpliptikiqa atska wata kawanaykipaqmi yanapashayki>>.
15Punushqanpita rikcharkamurmi Salomón tantiyakurqan sueñushqanta. Tsaymi Jerusalénman kutiykur jukla aywarqan Tayta Diospa Pactu Babulnin kaykashqan kaqman. Tsaychömi rupatsina sacrificiukunata y jawka kawakuy sacrificiukunata rupatsirqan. Nirkurmi lapan yanapaqninkunapaq mikuyta ruratsirqan.
Arreglananpaq Salomón ali tantiyakushqan
16Tsay witsanmi ishkay wayrapakuq warmikuna rey Salomón kaqman quejakuq aywapäkurqan. 17Chayaykurmi jukaq warmi kayno nirqan: <<Tayta rey, kay warmiwan ishkanï juk wayilacho taykarmi wachakushqä. 18Wachashqäpita kimsa junaqlatami paypis wachashqa. Tsay höra manami pipis kashqatsu. Ishkalämi kashqä. 19Tsaypitami punuykashqancho kay warmiqa wawanta nitiykushqa. 20Nirkurmi wanushqa wawanta noqa punuykashqäman pulan paqas oqlaparkamashqa. Nirkurmi noqapa wawäta oqlayninman apakushqa. 21Rikcharkamur chuchunäpaqqa wanushqa wamralana oqlanïcho kaykashqa. Patsa wararkuptin rikaykunäpaq manami wawätsu tsay wanushqa wamra kashqa, sinöqa kay warmipa wawanmi>>.
22Tsayno niptinpis jukaq warmi kayno nirqan: <<Manami nishqaykinötsu. Kawaykaqmi noqapa wawäqa. Qampa wawaykimi wanushqaqa>>.
Niptin jukaq warmina kayno nirqan: <<Manami nishqaykinötsu. Qampa wawaykiqa wanushqa kaqmi. Noqapa wawäqa kawaykaqmi kaykan>>.
Tsayno nirmi reypa nawpancho fiyupa rimanakurqan. 23Tsawraqa rey kayno nirqan: <<Jukniki kayno niykanki: <Noqapa wawäqa kawaykaqmi. Wanushqa kaykaqqa paypami>. Tsaynölami juknikipis kayno niykanki: <Paypami wanushqa kaqqa. Noqapaqa kawaykaqmi> >>.
24Tsayno nirmi yanapaqninta kayno nirqan: <<¡Espädata apamuy!>>
Espädata chayatsiptinnami 25rey kayno nirqan: <<Kawaykaq wamrata pulanpa kutsuriykuy. Pulanta qoykuy jukaq warmita y pulantana qoykuy jukaq warmita>>.
26Tsawraqa wamrapa maman fiyupa qapachakur reyta ruwakur kayno nirqan: <<¡Ama wanutsiytsu, tayta! ¡Tsaypa trukanqa kawaykaqlata kay warmita qoykuy!>>
Jukaq warminami kayno nirqan: <<Wamrata ishkayman kutsuritsun. Tsaynöpami paypis ni noqapis mana qechunakuykäshaqnatsu>>.
27Tsawraqa rey kayno nirqan: <<Amana kutsuytsu. Wanunanta mana munaq kaq warmita qoykuy. Paymi rasunpa kaq mamanqa>>.
28Tsay warmikuna quejakushqanta rey Salomón shumaq arreglashqanta mayarmi lapan runakuna tantiyakurqan yachaq kananpaq Tayta Dios yanapashqanta. Tsaymi lapan runakunapis rey Salomónta respitapäkurqan.
Currently Selected:
1 Reyes 3: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
