1 Reyes 11

Juk dioskunata Salomón adorashqan

1Salomónqa atska jäpa warmikunatami ashirqan warminpaq. Manami Faraónpa tsurilantsu warmin karqan, sinöqa warminkuna karqan Moab nacionpita, Amón nacionpita, Edom nacionpita, Sidón markapita y heteo runakunapitapis. 2Jäpa warmiwan Israel runakuna tänanta mana munarmi Tayta Dios unayna kayno nirqan: <<Jäpa nación warmikunawanqa ama tankitsu ni paykunapis qamkunawan ama tätsuntsu. Tsay warmikunaqa diosninkunatami adoratsishunkipaq>>.#Éxo. 34.15-16; Deut. 7.3-4.

Tsayno niykaptinpis Salomónqa mana cäsukuypami tsay warmikunawan tarqan. 3Salomónpa warminkuna karqan qanchis pachakmi (700). Concubïna warminkunami karqan kimsa pachak (300). Tsay warmikunami Salomónta ïdulukuna rurayman jitarpurqan. 4Tsaymi Salomónqa awkinna kashpan warminkunata cäsukur ïdulukunatana adorarqan. Manami taytan Davidnötsu Tayta Dioslaman yärakur kawarqan. 5Tsaymi Sidón runakuna adorashqan Astoret diösata y amonita runakuna adorashqan melanaypaq Milcom diosta Salomón adorarqan.

6Tsayno rurar Salomónqa manami taytan Davidnötsu lapan shonqunwan Tayta Diosta cäsukurqan, sinöqa Tayta Dios mana munashqantami rurarqan. 7Tsaymi Jerusalén markapa tsimpan jirkancho moabita runakuna adorashqan melanaypaq Quemos diospaq altarta sharkatsirqan. Tsaynöpis altarta sharkatsirqan amonita runakuna adorashqan melanaypaq Moloc diospaq. 8Tsaynölami jäpa warminkuna adorapäkushqan dioskunapaq altarta Salomón sharkatsirqan. Tsay altarkunachömi tsay warmikuna diosninkunapaq inciensuta y sacrificiukunatapis rupatsipäkurqan.

9Mana cäsukur Salomón juk dioskunata adorashqanpitami Tayta Dios pasaypa rabyakurqan. Salomón tsayno rurarqan Israel runakunata kuyaq Tayta Dios ishkay kuti yuripaykaptinpis.#1Rey. 3.5-14; 9.2-9. 10Payta yuriparkurmi Tayta Dios nirqan juk dioskunata imaypis mana adorananpaq. Tsayno niykaptinpis Salomón mana cäsukuptinmi 11Tayta Dios kayno nirqan: <<Pactu rurashqäta manami cumplishqankitsu y leynïkunata manami cäsukushqankitsu. Tsayno kashqaykipitami qampita miraqkuna wakin Israel runakunapa mandaqnin rey mana kanqanatsu. Tsaypa trukanqa juk ashmaynikinami rey kanqapaq. 12Tsayno kaptinpis taytayki Davidta kuyashpämi kawashqaykiyaqqa tsay ashmaynikita mana churashaqraqtsu, sinöqa tsuriki rey kaykaptinraqmi pulan Israel nacionta makinpita qechushaq. 13Imano kaptinpis sirvimaqnï David rayku y akrashqä Jerusalén rayku juk trïbutaqa kachapäshaq tsuriki mandananpaq>>.

Salomónpa contran sharkuqkuna

14Tsaypitanami edomita runa Hadadpa yarpayninman Tayta Dios churarqan Salomónpa contran sharkunanpaq. Hadadqa Edom nacionpa mandaqnin rey castami karqan. 15Salomón manaraq rey kaptinmi rey David aywar Edom nación runakunawan pelyapäkurqan. Nirkurmi Israel soldädukunapa capitannin Joab aywarqan pelyacho wanuq Israel soldädukunata pampananpaq. Tsaycho kaykarmi Edom nacioncho lapan olqu kaqkunata wanutsipäkurqan. 16Wanutsir ushashqanyaqmi Joabqa Israel soldädukunawan soqta killa Edomcho tarqan.

17Tsay witsanqa wamralaraqmi Hadad kaykarqan. Edomita runa mayinkunata Joab wanutsishqanta musyarmi papäninpa yanapaqninkunawan Egiptupa qeshpir aywakurqan. 18Madián nacioncho kaykashqanpita Egiptupa aywakurmi chayarqan Parán partiman. Tsaypitanami mas runakuna paykunata qatikurqan. Tsaymi paykunawan aywar Egiptuman chayaykushpan rey Faraón kaqman aywapäkurqan. Chayaykuptinmi Faraónqa wayikunata y chakrakunata rikatsirqan tsaycho tänanpaq. Tsaynölami mikuytapis kamariparqan.

19Hadadmi Faraónwan kirun tinkuptin yachanakurqan. Tsaymi Faraónqa warmin reina Tahpenespa nananwan Hadadta tätsirqan. 20Hadadwan taptinmi yurirqan wawan Genubat. Paytami Faraónpa palaciuncho Tahpenes ashmakurqan kikinpa wawankunatawan juntu.

21Rey David y soldädunkunapa capitannin Joabpis wanushqanta mayaykurmi Faraónta Hadad kayno nirqan: <<Markäman kutikushaqna, tayta>>.

22Tsayno niptinmi Faraón kayno nirqan: <<¿Imanirtaq markaykiman kutikuyta munaykanki? ¿Imataq kaycho pishïshunki?>>

Tsayno niptinmi Hadad kayno nirqan: <<Manami imapis pishïmantsu, tayta. Imano kaptinpis markäpami kutikuyta munaykä>>.

23Tsaynölami Eliadapa tsurin Rezónpa yarpayninman Tayta Dios churarqan Salomónpa contran sharkunanpaq. Nawpataqa Soba markapa mandaqnin rey Hadad-ezerpa ashmaynilanmi Rezón karqan. Ashmay kaykashqanpitami qeshpir aywakushpan 24asaltantikunawan juntakar paykunapa cabecïllan rikakurqan. Hadad-ezerta rey David vincirkuptinmi Rezón y paywan puriq runakuna qeshpir Damascuman aywakärirqan. Damascuchönami runakuna payta churapäkurqan rey kananpaq. 25Tsaynöpami Siria nacionpa mandaqnin rey kananpaq yaykurqan. Israel runakunapa contran Hadad kashqannömi Salomón wanushqanyaq Rezónpis Israel runakunata chikir contran karqan.

Salomónpa contran Jeroboam sharkushqan

26Tsaynölami Salomónpa contran sharkurqan ashmaynin Jeroboam. Paypa papänin karqan Nabat y mamanmi karqan Zerúa. Zerúaqa viüdami karqan. Paykunaqa Efraíncho kaq Sereda markapitami karqan.

27Kaychömi qelqaraykan Salomónpa contran imano Jeroboam sharkushqanpis. Rey Salomón taytan Davidpa Markanchömi Milo patak perqata y marka murälla kachakashqankunata altsatsirqan. 28Jeroboam ali chölu y habilösu kashqanta Salomón tantiyarmi Josépita miraq runakunapa#11.28 Josépita miraq runakunaqa Efraín trïbu y Manasés trïbu runakunami karqan. capataznin kananpaq churarqan.

29Juk kuticho Jerusalénpita Jeroboam yarqurmi nänicho tinkurqan Silupita kaq profëta Ahíaswan. Ahíasqa aywaykarqan mushuq tünican jatishqami. Tsay höra manami pipis tsaycho karqantsu. 30Tsaychömi Ahíasqa jatiraykashqan mushuq tünicanta chunka ishkay pedäzuman rachirir 31chunka pedäzuta Jeroboamta aptapar kayno nirqan: <<Yärakushqantsi Tayta Dios kaynömi nin: <Salomónpa makinpita qechurkurmi chunka trïbuta qoykushayki mandaqnin rey kanaykipaq. 32Sirvimaqnï David rayku y Israel markakunapita akrashqä Jerusalén marka raykumi Salomónta kachapaykushaq juk trïbulatana mandananpaq. 33Tsayno rurashaq Salomón manana cäsukamar Sidón runakuna adorashqan Astoret diösata, moabita runakuna adorashqan Quemos diosta y amonita runakuna adorashqan Moloc diosta adorashqanpitami. Payqa manami taytan Davidnötsu mandamientükunata, leynïkunata y nishqäkunata cäsukushqa.

34<< <Tsayno kaptinpis sirvimänanpaq akrashqä David mandamientükunata y leynïkunata cäsukur kawashqanpitami Salomón kawashqanyaqqa lapan trïbu runakunapa mandaqnin kanqa. 35Tsurin rey kaptinnami itsanqa chunka trïbu Israel runakunata qechurkur qamta qoykushayki rey kanaykipaq. 36Salomónpa tsurintaqa kachapaykushaq juk trïbulatanami mandananpaq. Tsaynöpami sirvimaqnï Davidpita miraqkuna Jerusaléncho mandayta sïguinqapaq. Jerusalén markatami akrashqä imayyaqpis tsaycho adorapäkamänanpaq.

37<< <Qamtanami churashayki Israel runakunapa mandaqnin rey kanaykipaq.#11.37 Israel runakunapa mandaqnin rey kanaykipaq nirqa norti kaq läducho taq chunka trïbu Israel runakunapa mandaqnin rey kananpaqmi nirqan. Tsaynöpami shonquyki yarpashqanno mandar kushikunkipaq. 38Sirvimaqnï rey David cäsukamashqanno qampis mandamientükunata y leynïkunata cumpliptikiqa Davidta yanapashqänölami yanapashayki. Rey kanaykipaq qamta churashqänölami qampita miraqkunatapis churashaq Israel runakunapa mandaqnin rey kananpaq. 39Davidpita miraqkunataqa mana cäsukamashqanpita castigarpis manami cadalaqa castigashaqtsu> >>.

40Profëta Ahías tsayno wilashqanta musyarmi Jeroboamta Salomón wanutsiyta munarqan. Tsaymi Jeroboamqa Egiptupa mandaqnin Sisacman qeshpir tsaycho tarqan Salomón wanunanyaq.

Rey Salomón wanushqan

2 Crónicas 9.29-31

41Rey Salomón rurashqankuna y yachaq kashqanpis qelqaraykan Salomónpa vïdanta qelqashqan libruchömi. 42Chusku chunka (40) watami Israel runakunata Jerusalénpita Salomón mandarqan. 43Wanuykuptinmi pampapäkurqan taytan Davidpa Markanman. Salomónpa trukannami tsurin Roboamna rey karqan.

Currently Selected:

1 Reyes 11: qvmB

Highlight

Copy

Compare