1 Juan 5
5
Tayta Diospa Tsurinman yärakunantsipaq nishqan
1Jesús salvamaqnintsi Cristo kashqanta criyiqkunaqa lapanpis Tayta Diospa wamrankunami karkaykan. Tayta Diosta kuyarqa wamrankunatapis kuyantsimi. 2Wamrankunata kuyashqantsita musyantsi Tayta Diosta kuyar mandamientunkunata cumplirmi.
3Tayta Diosta kuyarqa mandamientunkunata cumplintsimi.#Juan 14.15; 2Juan 6. Mandamientunkunaqa manami sasatsu kaykan.#Deut. 30.11; Mat. 11.30. 4Tsayno sasatsu kaykan Tayta Diospa wamrankuna Satanásta vincishqa kaptinmi.#Juan 16.33. Tsayno vincintsi Tayta Diosman yärakurmi. 5¿Pitaq Satanásta vincin? Jesucristo Tayta Diospa Tsurin kashqanta criyiqkunalami vincin.
Jesucristo salvamaqnintsi kashqan
6Jesucristo Diospa Tsurin kashqanta musyantsi bautizakushqan höra wamran kashqanta Tayta Dios nimushqa kaptin#Mat. 3.17; Juan 1.31-34. y yawarninta jichar wanushqa kaptinmi.#Mar. 15.39. Manami bautizakuptin Tayta Dios nimushqa kaptilantsu musyantsi, sinöqa yawarninta jichar wanushqa kaptinmi. Tsaynöpis Diospa Tsurin kashqanta musyantsi Espíritu Santu tantiyatsimaptintsimi. Espíritu Santu tantiyatsimashqantsiqa rasun kaqmi kaykan.
7Jesucristo Diospa Tsurin kashqanta musyatsimantsi [jana patsacho kaykaq] kimsa testïgukunami. [Tsay testïgukuna kaykan Tayta Dios, Tsurin Jesucristo y Espíritu Santumi. Paykunaqa kimsaq karpis juklaylami kaykan. 8Tsaynölami kay patsachöpis kimsa testïgukuna musyatsimantsi.] Tsay testïgukuna kaykan Espíritu Santu, Jesucristo bautizakushqan y wanur yawarninta jichashqanmi. Tsay kimsa testïgukuna tsay yarpaylatami musyatsimantsi.
9Runa wilapämashqantsita criyiykarqa Tayta Dios nimashqantsita masraq criyishun. Tsurin Jesucristupita Tayta Dios nimashqantsiqa masmi välin runakuna wilapämashqantsipitapis.#Juan 5.32-37; 8.18. 10Jesucristo Diospa Tsurin kashqanta criyiq kaqqa Tayta Dios tantiyatsishqanta criyinmi. Jesucristo Diospa Tsurin kashqanta mana criyiq kaqmi itsanqa Tayta Dios tantiyatsishqantapis mana criyintsu. Mana criyirmi Tayta Diosta manakaqman churan.
11 Mana ushakaq kawayta qomashqantsitami Tayta Dios tantiyatsimashqantsi. Tsay kawaytaqa tarintsi Tsurin Jesucristuta chaskikurmi. 12Tayta Diospa Tsurinta chaskikuq kaqqa mana ushakaq kawaytami tarin. Mana chaskikuq kaqmi itsanqa tsay kawayta mana tarinqatsu.#Juan 3.36.
Carta ushanan
13Tayta Diospa Tsurinman yärakäriptikimi kay cartata apaykätsimü mana ushakaq kawayta tarishqaykita musyapäkunaykipaq.#Juan 20.31.
14Tayta Dios munashqanno kananpaq imatapis manakuptintsiqa mayamashqantsitami musyantsi. 15Mayamashqantsita musyarmi manakushqantsino yanapamänantsipaq kashqantapis musyantsi.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22.
16Mayqaykipis wawqi panikuna jutsa rurashqanta musyarqa paykunapaq Tayta Diosta manakäriy. Perdonananpaq kaq jutsa kaptinqa Tayta Dios perdonanqami. Mana perdonananpaq kaq jutsa kaptinqa Tayta Diosta ama manakäriytsu.#Jer. 7.16; 14.11-12; Mat. 12.31-32; Heb. 6.4-6; 10.26. 17Mana ali rurayqa lapanpis jutsami kaykan. Tsayno kaptinpis Tayta Dios mana perdonananpaq kaq jutsa kaykanmi.#5.17 Mana perdonananpaq kaq jutsaqa jutsa rurayta mana kacharishqanmi kaykan. Tsay jutsata ruraq runaqa manami Tayta Diosta perdonta manakuntsu. Jutsa rurashqanpita lakikur perdonta manakuptinmi itsanqa Tayta Dios perdonanqapaq (1Juan 1.9).
18Musyantsimi Tayta Diospa wamran kashpantsi jutsa ruraylacho mana kawashqantsita. Tsaynöpis Tayta Diospa Tsurin Jesucristumi Satanáspita tsapaykämantsi.
19Musyantsimi Tayta Diospa wamranna kashqantsita. Tsaynöpis musyantsimi intëru kay patsa Satanáspa munaynincho kaykashqanta.
20Musyantsimi Tayta Diospa Tsurin Jesucristo kay patsaman shamur Tayta Diosta reqinantsipaq tantiyatsimashqantsita. Tsaymi Tayta Diospa y Tsurin Jesucristupa makincho kawaykantsi. Jesucristuqa kikin Diosmi kaykan. Paymi mana ushakaq kawayta qomantsi.#Juan 17.3.
21Kuyay wamräkuna, ima ïdulukunamanpis ama yärakäriytsu. [Amén.]
Currently Selected:
1 Juan 5: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.