1 Juan 4
4
Lutan yachatsikuqkuna imano kashqanpis
1Kuyay wawqi panikuna, kay patsacho atskaqmi lula profëtakuna purirkaykan. Tsayno kaykaptinqa pipis <<Espíritu Santumi tantiyatsimashqa wilakunäpaq>> nir chayamuptin shumaqraq tantiyapäkuy Tayta Diospa wilakuqnin kashqanta o mana kashqantapis. 2Tayta Diospa wilakuqnin karqa Jesucristo kay patsaman shamur rasunpa runa kashqantami yachatsin.#4.2 Jesucristo Dios kashqanta criyirpis wakin runakuna manami criyirqantsu rasunpa runa kashqanta, sinöqa runa niraqla kashqantami yarparqan. 3Jesucristo rasunpa runa kashqanta mana yachatsirqa manami Tayta Diospa wilakuqnintsu kaykan, sinöqa anticristumi. Anticristo shamunanpaq kashqanta musyashqaykinölami kananqa anticristukuna kay patsacho purirkaykan.#Mat. 7.15; 2Juan 7.
4Kuyay wamräkuna, Tayta Diospa wamrankunami karkaykanki. Qamkunacho kaykaq Espíritu Santuqa kay patsacho kaykaq espïritupitapis mas munayniyuqmi kaykan. Pay yanapashuptikimi tsay lutan yachatsikuqkunata mana chaskipankitsu. 5Paykunaqa Diospa wamran mana karmi kikinpa yarpaynilanpita yachaykätsin. Tsaymi paykunataqa Diosta mana cäsukuq runakunala chaskipan.#Juan 15.19.
6Noqakunaqa Diospa wilakuqninmi karkaykä. Tsaymi wilakärishqäta chaskikuqkuna Tayta Diosta reqipäkun. Wilakärishqäta mana chaskikuqkunaqa manami Tayta Diospa wilakuqninkunatsu karkaykan. Tsaynöpami musyantsi mayqan runa rasun kaqta yachatsishqanta y mayqan runa lutanta yachatsishqantapis.
Tayta Dios kuyamashqantsino kuyanakunantsipaq nishqan
7Kuyay wawqi panikuna, Tayta Dios kuyakuq kaykaptinqa juknintsi juknintsipis kuyanakushun. Kuyanakurqa Diospa wamran karmi payta reqintsi. 8Mana kuyanakurmi itsanqa Diosta mana reqintsitsu. Tayta Diosqa kuyakuqmi kaykan.
9 Mana ushakaq kawayta tarinantsipaqmi Tayta Dios japalan Tsurinta kay patsaman kachamurqan. Tsaynöpami pasaypa kuyamashqantsita musyatsimashqantsi.#Juan 3.16. 10Rasunpa kaq kuyakuyqa manami noqantsi Tayta Diosta kuyashqantsitsu kaykan, sinöqa noqantsita pay kuyamashqantsimi. Jutsata rurashqantsipita sacrificiu kananpaqmi Tsurin Jesucristuta kachamurqan. Tsaymi rasunpa kaq kuyakuyqa kaykan.
11Kuyay wawqi panikuna, Tayta Dios tsayno kuyaykämaptintsiqa noqantsipis kuyanakur kawashun. 12Tayta Diosta manami pipis rikashqatsu.#Juan 1.18. Tsayno kaptinpis kuyanakuptintsiqa noqantsiwanmi kaykan. Tsaymi yanapaykämantsi pay kuyakuq kashqanno noqantsipis kuyakuq kanantsipaq.
13Espíritu Santuta chaskikushqa karmi Tayta Dios noqantsiwan kaykashqanta y noqantsipis paywan kaykashqantsita musyantsi.#Rom. 8.9; 1Juan 3.24. 14Tsaynöpis kikïkunami rikashqä Diospa Tsurin Jesucristo kay patsacho kaykaqta. Tsaymi wilakärï runakunata salvananpaq Tayta Dios payta kachamushqanta.#Juan 3.17. 15Jesucristo Tayta Diospa Tsurin kashqanta criyir chaskiq kaqqa Tayta Dioswanmi kaykan y Tayta Diospis paywanmi kaykan.
16Kananqa Tayta Dios kuyamashqantsita musyarmi payman yärakuykantsi. Tayta Diosqa kuyakuqmi kaykan. Noqantsipis kuyanakurqa paywanmi kaykantsi y paypis noqantsiwanmi kaykan. 17Tsaynöpami Tayta Dios munashqanno kuyanakuntsi. Tsayno kuyanakur kawar y Jesucristo kay patsacho kawashqanno kawarqa juiciu finalchöpis manami mantsakushuntsu. 18Tayta Dios kuyamashqantsita mana tantiyarmi castigamänantsipaq kashqanta yarpantsi. Tayta Dios kuyamashqantsita tantiyarmi itsanqa mana castigamänantsipaq kashqanta musyar payta mana mantsantsitsu.
19Puntata pay kuyamashqa kaptintsimi noqantsi [payta] kuyantsi. 20Pipis <<Tayta Diosta kuyämi>> niykar runa mayinta chikirqa lulakuykanmi. Runa mayintsita rikaykar mana kuyaykarqa ¿imanöparaq mana rikashqantsi Tayta Diosta kuyashwan? 21Tayta Diospa mandamientunchömi nimantsi: <<Tayta Diosta kuyarqa runa mayikitapis kuyay>>.#Mar. 12.29-31.
Currently Selected:
1 Juan 4: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.