1 HKAWHKAM 21
21
Nabot A Tsabyi Sun
1Ya dai amu ni byin ai hpang, Yezrela masha Nabot gaw, Yezrela mare hta e tsabyi sun langai mi lu ai; dai sun gaw Samari hkawhkam Ahab a htingnu hte ni nga ai. 2Dai rai nna Ahab gaw Nabot hpe, “Na a tsabyi sun nye a nta hte ni nga ai majaw, ngai dai hpe shatmai sun shatai na matu, ngai hpe jaw e; ngai nang hpe grau kaja ai tsabyi sun galai ya na de ai; shing n rai, nang tsaw n yang gaw, jahpu rai timung jaw na de ai,” ngu nna tsun wu ai.
3Shaloi Nabot gaw, “Ji wa ni a sali wunli ga hpe nang hpe jaw kau na gaw, Yehowa hkum kau u ga,” ngu nna Ahab hpe tsun wu ai.
4Shing rai, Ngai ji wa ni a Sali wunli ga nang hpe n jaw na de ai, nga nna Yezrela masha Nabot gaw Ahab hpe tsun wu ai majaw, shi gaw myit ru nna nji nmu let shi a nta de bai wa nhtawm, yup ku hta kaleng taw let, myi man makoi kau nna, shat n sha hkraw ai.
5Dai re ai majaw shi a madu jan Yezebela gaw shi kaw sa du nna, “Nang shat n sha hkra, hpa rai myit ru nga n ta?” ngu nna shi hpe san wu ai.
6Shi gaw, “Yezrela masha Nabot hpe ngai shaga nna, Ataw, na a tsabyi sun ngai hpe dut ya e; shing n rai, nang tsaw n yang gaw, de a malai grau kaja ai tsabyi sun jaw na de ai, ngu nna hpyi we yang, ngai nye a tsabyi sun nang hpe n jaw lu na nngai, nga nna shi ngai hpe tsun ai majaw rai nngai,” ngu nna Yezebela hpe htan wu ai.
7Dai rai nna shi a madu jan Yezebela gaw, “Nang Israela mungdan hpe up nga ai n rai ni? rawt u, shat sha nna pyaw pyaw nga u: ngai mahtang Yezrela masha Nabot a tsabyi sun nang hpe sak jaw na de ai,” ngu nna shi hpe tsun shalan wu ai. 8Shaloi shi gaw Ahab a amying hte laika ka nna, Ahab a dazik dawk da nhtawm, dai laika ni hpe Nabot a mare e nga ai agyi salang ni hpang de shagun dat wu ai. 9Dai laika ni gaw ning nga nga ai: “Lusha gam ai aten madat da nna, mung masha ni hta reng grau ai shara e Nabot hpe shadun mu: 10shing rai, n hkru ai masha lahkawng shi a man e shapraw nna, Nang gaw Karai Kasang hpe mung, hkawhkam wa hpe mung matsa kau ndai, ngu nna sakse hkam shangun mu: dai hpang shi hpe shapraw nhtawm, nlung hte kabai sat kau mu, nga ai,” ngu nna ka dat wu ai.
11Ya dai mare na agyi salang ni hte hpung rawng ai ni gaw, Yezebela shanhte hpang de ka dat ai laika hte maren galaw ma ai. 12Shanhte lusha gam ai aten madat da nna, mung masha ni hta reng grau ai shara e Nabot hpe shadun da mu ai. 13Shaloi dai n hkru ai masha lahkawng gaw Nabot a man e sa dung nna, shan gaw mung masha ni a man e, “Nabot gaw Karai Kasang hpe mung, hkawhkam wa hpe mung matsa kau wu ai,” nga nna shi a lam sakse hkam ma ai. Dai hpang, dai mare de na shi hpe shapraw nhtawm, nlung hte kabai sat mu ai. 14Shing rai shanhte gaw Yezebela hpang de shangun nna, “Nabot hpe nlung hte kabai nna, shi si mat sai,” ngu dat mu ai.
15Nabot hpe nlung hte kabai nna shi si mat sai hpe, Yezebela na wu yang, shi Ahab hpe, “Rawt u, Yezrela masha Nabot nang hpe ndut ya hkraw ai tsabyi sun hpe madu la u; Nabot gaw hkrung nga ai n rai, si mat sai da,” ngu nna tsun wu ai. 16Ya Ahab gaw Nabot si ai lam na wu yang, Yezrela masha Nabot a tsabyi sun madu la na nga, rawt yu wa ai.
17Shaloi Yehowa a ga Tishbi masha Elia kaw du nna, 18“Rawt u, Samari mare e dung nga ai Israela hkawhkam Ahab hpe sa tau su: shi gaw Nabot a tsabyi sun hpe madu la na nga, yu wa sai. 19Shi hpe ning ngu u; Yehowa ning nga ai: Nang asak mung sat, shi a sut rai mung madu la nu ni? bai Yehowa ning nga ai, Gwi ni gaw Nabot a sai hpe mata lu ai shara hta e, na a sai hpe mung mata lu na mara ai, nga ai,” ngu nna htawn tsun wu ai.
20Dai rai nna Ahab gaw, “Ngai hpe hpyen ai wa e, nang ngai hpe mu da n ni?” ngu nna Elia hpe tsun wu ai. Elia gaw, “Nang Yehowa man e n kaja ai amu galaw na nga, na hkum hpe dut kau nu ai majaw, ngai nang hpe mu de ai. 21Yu u, ngai na a ntsa e tsin-yam tsindam shangun dat nna, nang hpe atsai awai ye kau na de ai; Ahab a amyu a lasha ma nlang hte hte, Israela hta bawng dung nga bawng lawt pra ai ni hpe htau di kau na we ai: 22nang ngai hpe shapawt nna, Israela amyu hpe yubak galaw shangun ai majaw, ngai na nta hpe, Nebat a kasha Yeroboam a nta hpe zawn, bai, Ahiya kasha Basha nta hpe zawn, di kau ya na de ai,” ngu wu ai. 23Bai Yehowa Yezebela a lam hpe mung, “Gwi ni gaw Yezrela bunghku makau e Yezebela hpe sha kau na mu ai. 24Ahab hte seng ai wa mare hkan e si yang gwi ni e sha kau ai hkrum na mara ai; pa hkan e si yang, ntsa malen u ni e sha kau ai hkrum na mara ai,” nga ai.
25Hpa majaw nga yang, Ahab zawn Yehowa man e n kaja ai amu galaw na nga, tinang hkum hpe dut kau ai wa kaga kadai mung n nga ai; shi a madu jan Yezebela mung shi hpe shatsam wu ai. 26Israela kashu kasha man na Yehowa shachyut kau ai Amori masha ni hkan galaw ai sumla ni nawku ai matsat shabat lam shagu hta, shi htep lahti hkan nang nga ai.
27Ya Ahab gaw dai ga na jang, shi a hpun nba gang je kau nhtawm, lachyit nba dagraw nna, lusha gam let, lachyit nba hta kaleng taw ai hte yawn hkawm nga ai.
28Shing rai Yehowa a ga Tishbi masha Elia kaw du nna, 29“Ahab gaw nye a man e kaning rai myit nem nga ai gaw, nang mu da wu ni: shi nye a man e myit nem nga ai majaw, ndai tsin-yam tsindam hpe shi a aprat hta n rai, kasha aprat hta e she, shi a nta ntsa e, ngai shapraw dat na we ai,” ngu wu ai.
Currently Selected:
1 HKAWHKAM 21: JHVT3
Highlight
Copy
Compare
Share
Want to have your highlights saved across all your devices? Sign up or sign in
Jinghpaw Hanson Version Bible © Bible Society of Myanmar, 2009.
