Arooma 4

Amini ya Eburahiima

1Nakataalikha, nilupe niini khwa marehemu papeetthu Eburahiima? 2Nkhama khweele Eburahiima ahakikhiwe mwaasa wa khaazi zawe, ye ona ya ojittitthimisa, ila woohiiyi omaasho wa Nluku. 3Zawaatikhiwa Ttakatthiifu enlupa ni? “Eburahiima khumwaamini Nluku, na ye khukhupaliwa wiiya ntthu wa shariya.”

4Moone, phakari ya ntthu ankholaaye khaazi, ehooniwe nkhama antthaaye oveka, ila nkhama teeni. 5Olikha toowo, otule ahinkholaaye khaazi za kano, ila ankhupalaka Nluku, aninhakikhaaye kaafiri, amini yawe enkhupaleliwa nkhama shariya. 6Daawuuda alupa etthiipo yoori, oniiya wooparikhiyiwa ntthu otule Nluku animwinkhaaye shariya woohiiyi mwaasa wa khaazi zawe:

7“Ooparikhiyiwa pi apale koosa zaya eswamihiweeyo,

na twampi zaya khufujiwa!

8Wooparikhiyiwa ti otule

Nluku ahinimoonanaaye paathuli.”

9Oparikhiyiwa waya opo atthomeliwa apale paasi ookhiriya ama na apale oohikhiriyi? Maana ninlupa yoori khwa amini Eburahiima akhupaliwa wiiya ntthu wa shariya. 10Zarettikhana lini? Raku ama paata ya okhiriya? Khazirettikhaneeni paata ya okhiriya, ila ahina khiriye! 11Etthiipo ye apwekherela okhiriya nkhama alama na nkhama ephariselo ya shariya aariinaaye khwa amini, wakathi nalelo aari ahinakhiriye. Nakataalikha, ye ti paapa wa ooshi apale ankhupalaaye, hatha nkhama khakhiriyeeni, yoori shariya yiiye okhupaleliwa theenya pi yo. 12Ye theenya paapa wa apale ookhiriya aheetteeni okhiriya paasi ila na theenya aneettettisaaye mwentto wa amini aariinaaye papeetthu Eburahiima ahinakhiriye.

Amini ya Eburahiima na ahiti ya Nluku

13Khahi mwaasa wa kano Eburahiima ama peewu yawe apattheliyeeyo wiiya namarithi olumwenku, ila maana ye ankhupaliye Nluku na aakhupaliwe ti ye. 14Maana, nkhama apale aniikhalaaye khwa nkatthi wa kano pi anamarithi aya, amini khina fwayita, na ahiti khinfwayi. 15Maana kano entana katapu, na vahali woohiivo kano, khiniiyavo koosa.

16Nakataalikha, ahiti enta khwa amini, yoori yiiye sawasawa na rehema na yiiye etthiipo yoolipaneya khwa peewu yooshi ya Eburahiima; khahiyo paasi apale anshututelaaye kano, ila theenya apale ariina amini etile Eburahiima aariinaaye. Ye paapa wa fweeyo fooshi. 17Nkhama yaatikhiweezo yoori: “Miiyo kooretta wiiya paapa wa khapila zawaatta.” Ye ti papeetthu omaasho wa Nluku, othuuto ankhupaliyeeyo, Nluku aniwinkhaaye ohaayi ananfwa na anrettisaaye vitthu zoohiivo nkhama za wiiyavo.

18Eburahiima, woohiivo hatha nroromelo, khwa amini khwiiyana nroromelo, khuretteya etthiipo wiiya paapa wa khapila zawaatta, nkhama yaalupiweeyo monkoni wa ye yoori: “Ojama yawo enteela wiiya etthiipo.” 19Woohishokheri nkatthi wa amini, ye khujuwa yoori onsaleela ofwa, maana aarina hirimu ya nyaakha miiya, na Suhura khaarina mavokozi. 20Ila ye nalelo khuhaakanyereli wala khuhikheeti monkoni wa ahiti ya Nluku, ila khwiiya wookhomaala nkatthi wa amini yawe, na khumwinkha siifwa Nluku, 21aakhupaleliye weekhweelevo yoori Nluku onaaye owahi wa oretta epile ahitiyeeyo. 22Tiito Eburahiima ooziweeyo wookhupaliwavo ti Nluku mwaasa wa amini yawe. 23Mattakhuzi “ooziweeyo” khaatikheliwe ye otthwe paasi, 24ila theenya khwa fweeyo, apale Nluku anttelaaye owaakhupalana shariya, fweeyo nininkhupalaaye otule ansisimuliyeeyo muufwa Yinsa, Mbwana eetthu. 25Ye enkheleliwa ofwela twampi zeetthu na khusisimuwa yoori anihakikhi.

Currently Selected:

Arooma 4: eko

Highlight

Compare

Copy