Arooma 10
10
Mayaahuuti ankatthala shariya ya Nluku
1Attwiizaku, niiya ya varoho vaka na lompa yaka wa Nluku khwa meezirayiilu ti yoori yo oosurukhe. 2Kiniwaalawela oshaahiti yoori yo ajinkha saaneene khwa Nluku, ila ojinkha waya opo khunlankha muujuwa. 3Theenya ahijuwaka shariya ya Nluku na eekesaka okheya shariya yaya ennyewe, khuhijitthi shariya ya Nluku. 4Maana mwiisho wa kano ti Al-Masiihu, yoori ahakikhiwe wooshi otule aninkhupalaaye.
5Munsa aatikha khwa nanna eti shariya entaaye khwa kano yoori: “Ntthu anrettaaye vitthu zaya epo oniikhala nkatthi wa etthiipo.” 6Ila shariya entaaye khwa amini enlupa yoori: “Ohilupe nroho mwawo yoori: ‘Paani anttelaaye owela pinkuuni?’ ” Eto, enimwiishusha Yinsa, 7“ama ‘paani anttelaaye wiishukhela nkhilintti?’ ” Eto eninretta Al-Masiihu owela vakatthi wa ananfwa. 8Ila niini alupiyeeyo? “Nttakhuzi liri kharipu na weeyo, liri nkhanyo mwawo na nroho mwawo.” Nttho, nttakhuzi la amini nintafusiraaye. 9Amana weeyo otukhuru na milomo zawo yoori “Yinsa Mbwana” na khukhupali nroho mwawo yoori Nluku ansisimula vakatthi wa ananfwa, ontta wuusurukha. 10Maana na rooho onkhupali khwa shariya, na milomo ontukhuru khwa nusura. 11Nkhama etthiipo enlupaazo Zawaatikhiwa Ttakatthiifu yoori: “Wakhula otule aninkhupalaaye ye khinteela ompattha haaya theenya.” 12Khawiivo ofwarikhana khwa mayaahuuti na amalapo, maana Mbwana othuuto mmote ti Mbwana wa atthu ooshi na oniwaaparikhiya saaneene ooshi apale aninkhuwelaaye, 13maana “wakhula otule ankhuwelaaye nzina la Mbwana ontta wuusurukha.”
14Nannani anttelaaye onkhuwela otule ahinkhupaleeni? Na anttela onkhupali toovi otule ahinasiile hatha etthu monkoni wa ye? Na anteela osiila toovi ahipuweeni ntthu wa owaatafusirela? 15Khi anttela otafusiri toovi ahirumiweeni? Nkhama yaatikhiweezo yoori: “Nanna anshapweyaazo moolu atthu apale anlaleyaaye hapari zooshapweya!”
16Nakataalikha, wala khahi meezirayiilu ooshi aakhupaliyeeyo hapari zooshapweya, maana Ezaaya alupa yoori: “Mbwana, paani akhupaleliyeeyo tafusiiri zeetthu?” 17Khwa etthiipo amini enta khwa osiila hapari, na hapari ensiiliwa khwa nttakhuzi la Al-Masiihu. 18Ila miiyo kinuuzela yoori: Yo khasiileeni? Khweele pi etthiipo asiila, nkhama etthiipo enlupaazo Zawaatikhiwa Ttakatthiifu yoori:
“Olumwenku wooshi yasiileya huula yawe,
na mattakhuzi awe mpakha okhu wiisheliyeewo olumwenku.”
19Kinuuzela opheya yoori, talili meezirayiilu khiweeleyeeni? Mwanzo Munsa alupa yoori:
“Miiyo kinuutothelani wiivu na atthu apale ohiiyi aka
na kinuutothelani katapu khwa atthu oojika.”
20Na Ezaaya khulupa woominyalavo araka:
“Kasikaniwa pi apale ahaari okeekesaaye;
kajithoonyeza vakatthi wa apale ahaari okuuzelelaaye.”
21Ila monkoni wa Ezirayiilu, ye alupa yoori:
“Wakathi wooshi kookola makhono aka
khwa atthu ookhijili na ohisiilaneyi.”
Currently Selected:
Arooma 10: eko
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
