Mwanzo 47
47
Yuusufu onimuuza Firawuuna ofiya wa papaawe tuniya ya Misuri
1Yuusufu khulankha olawa omuuza Firawuuna yoori: “Paapa na attwiizaku ata ari nti wa Gosheeni, atana maphanko a nyama, mompe, pwittipwitthi na vitthu zaya zooshi ariinaazo.” 2Nawiisha khuwaathuula attwiize athaanu olawa owaajuwisa Firawuuna.
3Aphano Firawuuna khuwoozela attwiize Yuusufu araka: “Mwinkhola khaazi ni?” Yo khunjipu yoori: “Mbwana eetthu, fweeyo khaazi yeetthu oshukisa nyama nkhama apapazetthu apa aviriyeeyo. 4Fweeyo nateela wiikhala mmuti mphu siikhu vattitthiiru, mwaasa yoori tuniya ya Kanaani yeetta opuwawo jala yawaatta nyama zeetthu khuhisala ziiyana etthu yoojiwa. Safwatali wa safwatali, mwinilikhe niikhale nti opu wa Gosheeni.”
5Aphano Firawuuna khulupa yoori: “Papaawo na attwiizo ata wiiya vamote na weeyo. 6Tuniya ya Misuri eri mmakhono mwawo. Apho, papaawo na attwiizo owenkhe Gosheeni ti yiiyiye phantte yooshapweya ya mmuti mphu, eekhale ottuukho. Na amana woona yoori vakatthi wa ajamaazo awaapho atthu ariina akhili, owenkhe ottunkhulu wa mompe zaka.”
7Yuusufu khunthuula papaawe Yaakhumpa khulawa onjuwisa Firawuuna, Yaakhumpa khumparikhiya. 8Firawuuna khumuuzela Yaakhumpa araka: “Mwina nyaakha mikavi?”
9Yaakhumpa khunjipu araka: “Kinaaye nyaakha miiya na talaathiini, keettaka osaafiri kijeettettelaka. Nyaakha epi kivirisiyeeyo vattitthiiru na pi zootakhala, mpakha apha akinafiye nyaakha epile eekhaliyeezo amarehemu apapazaku.” 10Aphano Yaakhumpa khumparikhiya Firawuuna, nawiisha khuruti.
11Yuusufu khumwinkha meekhazi papaawe na attwiize phantte yooshapweya ya tuniya ya Misuri waattama nti wa Ramesesi, nkhama etthiipile Firawuuna aalupiyeezo. 12Ye khumwinkha papaawe na attwiize na ajamaaze ooshi etthu yoojiwa, yoowaafiyela wakhula ntthu na aanaawe.
Nyaakha za jala
13Khuthowa etthu yoojiwa tuniya yooshi mpakha Kanaani yooshi. Atthu khusala akureya mwaasa wa jala waatta. 14Aphano Yuusufu khukusanya nzurukhu wooshi, opule waari orumeeliwaaye Misuri na wa Kanaani opule waari wuuzanyeliwaaye tiriku, khulawa khupweha owawe Firawuuna. 15Wakathi wiishiyeevo nzurukhu wa Kanaani na Misuri, khulankha Amisuri khulawa onvekela Yuusufu araka: “Safwatali, oninkhe etthu yoojiwa nihifwe onoonaka mwaasa woohiina nzurukhu.”
16Yuusufu khujipu araka: “Nkhama mweeyo khamwina nzurukhu, mwikitiisele nyama zenu nipatili na etthu yoojiwa.” 17Amisuri khuthuula pwittipwitthi zaya, mompe, khavalo, na apuuru aya, khulawa khumwinkha Yuusufu, ye khuwenkha etthu yoojiwa aari weettelaaye oja mwaakha wooshi.
18Mwaakha aya opule khwiisha, mwaakha nkina khurutela wa Yuusufu olawa omuuza yoori: “Mbwana eetthu khaninoona etthu yoovitha, nzurukhu eetthu waniishela, nyama zeetthu piipile niwinkhiyeenini. Khanisalaneeni hatha etthu, nasalana mwiili eetthu na mashapa eetthu paasi. 19Ohinilikhe nifwaka na mashapa eetthu apwecheyaka weettaka woona. Wuuzanye mashapa eetthu oninkhe etthu yoojiwa. Toowo niniiya amwiitthwaana a Firawuuna na mashapa eetthu anttela wiiya awe. Oninkhe peewu yoozala yoori nipatthe wiiyana meekhazi, nihifwe jala na nti eetthu ohiiye yaara.”
20Khwa nanna ethiito Yuusufu khuuzanya mashapa ooshi a Misuri khwiiya a Firawuuna. Amisuri ooshi aarina yawuuzanyisa mashapa aya mwaasa wa jala yeetta otepa yaattaka, nti wooshi khwiiya wa Firawuuna. 21Yuusufu khuwaaretta omwiitthwaana atthu ooshi a phantte yooshi ya Misuri. 22Ila mashapa a anamalokozela a tiini khoozanyiye mwaasa yoori yo aari winkhiwa etthu yoojiwa ti Firawuuna, ti etthu ahoozanyiseliyeeyo mashapa aya.
23Aphano Yuusufu khuwooza atthu yoori: “Mwikisiileze! Kawuuzanyani mweeyo na miti zenu zooshi. Waaza leelo mweeyo na mashapa enu anttela wiiya a Firawuuna. Peewu eti mwilawe mwazale. 24Wakhula etile mwinttelaaye oruwera mwisala mwithuula lifunku la thaanu mwimwinkha Firawuuna. Mafunku apa mane mwinsalanaaye mwisala mwija mweeyo na aaneenu na atthu apale mwiniikhalanaaye. Kinoko khupweha yoori mwirette peewu.”
25Yo khujipu araka: “Weeyo Mbwana eetthu wanuusuru, wanirettela vitthu zooshapweya, fweeyo nakhupali na rooho zeetthu zooshi, wiiya amwiitthwaana a Firawuuna.”
26Yuusufu khulaleya kano moote eriivo mpakha leelo, yoori lifunku la thaanu la vitthu zooshi zinruweriwaazo tthi la Firawuuna. Mashapa apale paasi a anamalokozela a tiini khuhinkhiwi wiiya awe.
Otakha wawiishela wa Yaakhumpa
27Meezirayiilu khuthamela Misuri nti wa Gosheeni. Ottuukho khupatthawo meekhazi khuvokolelana khwaattelana.
28Yaakhumpa eekhaliye tuniya ya Misuri nyaakha khumi na sapa, nyaakha eekhaliyeezo Yaakhumpa ohaayi awe wooshi zaari miiya na arupayiini na sapa. 29Ooniyeevo yoori mansha awe asala vattitthiiru khunkhuwela mwanawe Yuusufu khumuuza yoori: “Nkhama onikipheta othuule nkhono awo otthe vathi wa liphaja laka, olaphe nkhama onteela oretta na pheta yawaamineya etile kuuvekeliyeeyo, yoori ohikizikhe tuniya ethiiti ya Misuri. 30Amana kifwa okilazemo mmuti mphu olawe wakizikhe nti opule azikhiweewo apapazaku, kilawe keeye vamote nayo.”
Yuusufu khujipu araka: “Kinttela oretta etthiipo mwikirumiyeezo.”
31Aphano Yaakhumpa khunkhanyerela yoori alaphe, Yuusufu khulapha, Yaakhumpa khwiinamela ovishwa wa olili.
Currently Selected:
Mwanzo 47: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
