Mwanzo 46

Yaakhumpa onthamela Misuri na ajamaaze

1Ezirayiilu khuthuula vitthu zawe zooshi aariinaazo, khulawa mpakha Beeresheba. Noofiya okhule, khuretta twaha anrettelaka Nluku aari omwaaputwaaye papaawe, Esiyaakha. 2Nluku anteeliye Ezirayiilu osikhu nkatthi wa jozi khusala ankhuwela araka: “Yaakhumpa! Yaakhumpa!”

Ye khujipu yoori: “Lapeekha!”

3Ye khuri: “Miiyo ki Nluku, Nluku wa papaawo. Ohoove olawa tuniya ya Misuri, maana khwa weeyo kinttela opuwisa khapila khuluyeene. 4Miiyo kinlawa vamote na weeyo Misuri na kinlawa koorutisele mmuti nttumphu. Amana ofwa Yuusufu tiye anttelaaye ophulula maasho awo.”

5Aphano, Yaakhumpa khulankha nti wa Beeresheba na aanaawe na aakha aya na aanaaya khupakhira mmikukutta epile zaaperekhiweezo ti Firawuuna. 6Khuthuula maphanko a nyama, na maali zaya zooshi epile aapatthiyeeyo tuniya ya Kanaani, Yaakhumpa khusala alawa Misuri na ajamaaze ooshi. 7Aanaawe aalume na aanaaya, aanaawe aakha na yo na aanaaya, ajamaaze ooshi khuwaathuula khusala alawa Misuri.

8Apa mazina a meezirayiilu, Yaakhumpa na ajamaaze aalawaniyeeyo Misuri:

Ruubeni, mwaana wamwanzo wa Yaakhumpa.

9Aana a Ruubeni pi apa:

Enookhi, Phaalu, Hesherooni na Khariimu.

10Aana a Simiyooni pi apa:

Yemuweeli, Yamiini, Ohaati, Yakhiini, Zowaari,

na Shawaali mwaana wa nunu mmote wa Kanaani.

11Aana a Leevi pi apa:

Yeerisoni, Kowaati na Meraari.

12Aana a Yuuda pi apa:

Eeri, Onaani, Sheela, Pereezi na Zeera.

Eeri na Onaani afwa tuniya ya Kanaani.

Aana a Pereezi pi apa:

Hesherooni na Hamuuli.

13Aana a Ezakaari pi apa:

Toola, Phuuva, Yashuubu na Shimrooni.

14Aana a Zebulooni pi apa:

Seredi, Elooni, na Yaleeli.

15Apa atuulu na aana a Yaakhumpa aawaavokoliyeeyo na Liiya nti wa Pata Ara, ohintthiimo mwanawe Tiina. Ooshi aari talaathiini na attatthu.

16Aana a Gaati pi apa:

Sefiyooni, Haakhi, Shuuni, Esbooni, Eeri, Aroodi na Areeli.

17Aana a Asheeri pi apa:

Imunna, Eshwiiva, Eshwiivi, Beriiya na ttwiiye Zeera.

Aana a Beriiya pi apa;

Hepeere na Malikiyeeli.

18Apa aana a Yaakhumpa na Ziilipa, karumeya otule Labani aamwinkhiyeeyo mwanawe Liiya. Ooshi aari khumi na sitha.

19Aana a Rakeele muukha wa Yaakhumpa aari apa:

Yuusufu, na Bejami.

20Asenaathi mwaana wa Potifweera, namalokozela wa tiini ya Ooni aavokoleliwe aana awiri ti Yuusufu tuniya ya Misuri, Manaase na Efwarayiimu.

21Aana a Bejami pi apa:

Beela, Beekheri, Ashibeeli, Geera, Naamani,

Eehi, Rooshi, Muupimu, Huupimu na Haridi.

22Apa aana a Rakeele aavokoleliweeyo ti Yaakhumpa, ooshi aari khumi na wane.

23Mwaana wa Daani aari Hushimu.

24Aana a Nafitaali pi apa:

Yaseeli, Kuuni, Yeseeri, na Shileemu.

25Apa aana a Yaakhumpa na Biila, karumeya otule Labani aamwinkhiyeeyo mwanawe Rakeele. Ooshi aari sapa.

26Atthu ooshi apale aalawaniyeeyo Yaakhumpa Misuri aari ajamaaze, ohiwaatthiimo aakha a aanaawe, aari siithiini na sitha atthweene. 27Owaatthaamo aana a Yuusufu aavokoliweeyo tuniya ya Misuri, ojama wooshi wa Yaakhumpa waari wa atthu saapiini.

28Aphano Yaakhumpa khunlokozisa Yuuda wa Yuusufu, yoori alawe amuuze anthepeeze nti wa Gosheeni. Afiiyeevo nti wa Gosheeni, 29Yuusufu khuthuula nkukutta awe khusala alawa Gosheeni okutthana papaawe, Ezirayiilu. Noomoona khuntthirela khulawa khumpatikha, khuvira wakathi wa waatta eettaka olila.

30Yaakhumpa khumuuza Yuusufu yoori: “Aphano kiwooniyeevo yoori ori haayi, kinfwa kihina shaakha.”

31Yuusufu khuwooza attwiize na ajama a papaawe yoori: “Kintta wa Firawuuna kamuuze yoori attwiizaku na ajamaaze paapa apa aari wiikhalaaye tuniya ya Kanaani, ata mmuti mphu. 32Kinttela omuuza yoori yo amakhampuzi, ataaka atiisa nyama zaya, pwittipwitthi, mompe na vitthu zaya zooshi ariinaazo. 33Amana Firawuuna arumisa oteela okhuweliwa mweeyo, na awuuzelani yoori ‘Mwinkhola khaazi ni?’ 34Mwinjipu yoori: ‘Fweeyo akarumeya awo khaazi yeetthu oshukisa nyama, waaza osimaana mpakha apha, nkhama etthiipo aari orettaazo apapazetthu.’ Toowo, mwintta okhupaleliwa wiikhala nti wa Gosheeni, mwaasa yoori amakhampuzi ooshi pi ootarawiwa pi a Misuri.”

Currently Selected:

Mwanzo 46: eko

Highlight

Copy

Compare