Olaawo 16
16
Nluku omperekha Mana
1Mahimo a atthu ooshi a meezirayiilu khulankha nti wa Elimu khulawa mpakha yaara ya Siimu, eriiye enakatthi-nakatthi ya Elimu na Sinaayi. Yaari siikhu ya khuumi na thaanu mweezi wa phiiri paata ya olaawo Misuri. 2N'yaara mphule meezirayiilu ooshi khusala amwaapa Munsa na Haruni. 3Alupaka yoori: “Afwataali nkhono wa Nnyizinku onuuleeliye Misuri! Maana okhu fweeyo naari wiiya nshini wa vikhalako za nyama na naari ojaka etthu yoojiwa woohiivo hatha shaakha mpakha orupala, ila mweeyo khunitiisa n'yaara mphu yoori mwinuule jala fooshi fweeyo.”
4Aphano Nnyizinku khumuuza Munsa yoori: “Miiyo kintta okwisa etthu yoojiwa ya pinkuuni. Atthu nka asaruwaka na olokotthela wakhula siikhu khwa khiima eniwaafiyelaaye siikhu yaya etile, khwa etthiipo kinttela oweeza yoori kiwoone nkhama yo anshututela kano zaka. 5Siikhu ya sitha mwina yoolokotthela swaafu piiri zayita epile mwinlokotthelakaaye siikhu kiina zaya.”
6Aphano Munsa na Haruni khuwooza meezirayiilu ooshi yoori: “Makaaripi mwinttela ojuwa yoori ti Nnyizinku oolaziyeenini nti wa Misuri. 7Meesho supu mwinttela woona siifwa ya Nnyizinku maana asiila waapa weenu. Fweeyo na paani mwinnaapaaye?” 8Khurutela olupa theenya araka: “Nnyizinku oniwinkhani nyama yoorafuna makaaripi na etthu yoojiwa ya supu yoori mwirupale, maana asiila waapa weenu. Fweeyo na a paani? Mweeyo khamwinnaapa fweeyo, ila Nnyizinku.”
9Munsa khumuuza Haruni yoori: “Owooze meezirayiilu ooshi oraka: Mweette mmakhono wa Nnyizinku, maana asiila ojiliza weenu.”
10Haruni eettaka ottakhulana meezirayiilu, ooshi khusala eekesa phantte ya n'yaara na siifwa ya Nnyizinku khupuwa mmawiku.
11Na Nnyizinku khumuuza Munsa yoori: 12“Kinsiila ojiliza wa meezirayiilu, ila owaajipu yoori: ‘Njuwa leettelaka otupweela mwinttela orafuna nyama, na supu mwiniiyana yoojiwa ya wuutoshani. Toowo mwinttela ojuwa yoori miiyo ki Nnyizinku, Nluku enu.’ ”
13Makaaripi khupuwa khwaali khwiitaala aphale aamakiyeevo, supu waarivo mmatte phantte yaya etile. 14Wakathi mmatte opule wuumiyevo, vathi aphale khupuwa vitthu nkhama mavalako zoolattanana cheelu vatulu wa nshaka. 15Wakathi meezirayiilu ooniyeevo vitthu epile, khwaaza wuuzelana atthaaporu araka: “Niini epi za?” Maana khaari ojuwa etthu yaari orettikhanaaye. Elottelanaka, Munsa khuwooza yoori: “Eti etthu yoojiwa Nnyizinku awinkhiyeenini yoori mwije. 16Nnyizinku aruma yoori: ‘Wakhula mmote wa mweeyo ona yookusanya epile anihithajiyaaye yoori aje, khwa thamani ya atthu ariina vaje vawe, ttompwiyo moote wakhula ntthu.’ ”
17Meezirayiilu khuretta etthiipo ooziweezo; akina khukhupa zawaatta, akina vattitthiiru. 18Wakathi aphimiyeeyo na ttompwiyo, otule aalokottheliyeeyo zawaatta na otule alokottheliyeeyo vattitthiiru ooshi khupattha sawasawa. Wakhula mmote aapatthiye epile aari ohithajiyaaye oja.
19Munsa khuwooza yoori: “Ahiiyevo hatha mmote antakhaaye opweha yoori aje meesho.”
20Ila yo khuhinsiilezi Munsa, akina khulikha vattitthiiru yoori aje mmeesho mwaya; ochiyeevo khwiitaala nyunku na khusala enukha. Munsa khuwaakatipukhela venkivene.
21Wakhula siikhu supu yo eetta olokotthaka epile aari ohithajiyaaye oja, maana haari ya njuwa yeetta othulushaka etile yaari osalaaye vathi. 22Siikhu ya siitha, khulokottha swaafu piiri, wakhula ntthu ttompwiyo piiri; attunkhulu a atthu khulawa omuuza Munsa. 23Khuwaajipu Munsa araka; “Nnyizinku aruma yoori: ‘Meesho enttela wiiya siikhu yoovumula, Saapatu ttakatthiifu ya Nnyizinku etile mwintakhaaye wuumisa vamoottho muumise na etile mwintakhaaye wiipikha na maati, mwiipikhe, zooshi zinttelaaye osala mwipwehe mpakha mmeesho mwaya.’ ”
24Khupweha mpakha mmeesho mwaya nkhama etthiipo Munsa aalupiyeezo; wala khuhivutti na hatha nyunku khuhiina. 25Aphano Munsa khulupa yoori: “Mwije leelo maana Saapatu ttakatthiifu ya Nnyizinku maana leelo khamwinsikanavo hatha etthu valipuwa. 26Siikhu sitha mwina yoolokotthela ila siikhu ya saapa, yiiyiyeeyo Saapatu, khazinteela wiiyavo.”
27Olikha toowo, siikhu ya saapa aalankhiye atthu olawa olokottha ila khuhisikanivo hatha etthu. 28Aphano Nnyizinku khumuuza Munsa yoori: “Mpakha lini mwikhijilaka oshututela oruma waka na onozela waka? 29Moone saaneene yoori Nnyizinku awinkhani Saapatu, tiito siikhu ya siitha oniwinkhani etthu yoojiwa ya siikhu piiri yoori siikhu ya saapa wakhula ntthu eeye attaaphale aniiyaavo ahiiyevo ntthu antakhaaye weettetta.” 30Aphano atthu apale khuvumula siikhu ya saapa.
31Atthu a Ezirayiilu khutthaja etthu yoojiwa etile nzina la mana. Zaari nkhama peewu ya phunje zoolakala zootuva nkhama mishikoto za asali. 32Munsa khulupa araka, “Nnyizinku aruma yoori: ‘Mwilokotthele mana apa ttompwiyo moote mwipwehe, yoori khapila entaaye yoone etthu yoojiwa mwenkhiweeyo ti Nnyizinku wakathi oolaziyeenini Misuri.’ ”
33Aphano Munsa khumuuza Haruni yoori: “Othuule ttompwiyo moote ya mana, otthe mmakhono wa Nnyizinku, yoori epweheliwe khapila eto entaaye.”
34Khwa oshututela etile Nnyizinku aamuuziyeezo Munsa, Haruni khuthuula mana apale khuttha nkatthi wa aaraka wa osiilana, yoori apwehiwe. 35Meezirayiilu khuja mana nyaakha arupayiini mpakha ofiya nti waari wiikhaleyaaye; khuvira ajaka mpakha ofiya mmwiinano wa Kanaani. 36Mphimo waari ophimaniwaaye mana waari wiitthiwa ttompwiyo, ya phantte ya khuumi ya eefwa#16:36 Eefwa enlikanana phantte ya khuumi ya maliituru eshiriini..
Currently Selected:
Olaawo 16: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
