Olaawo 1
1
Ohukhumwiwa wa meezirayiilu nti wa Misuri
1Apa mazina a aana a Ezirayiilu eettiyeeyo Misuri na Yaakhumpa, wakhula ntthu na ajamaaze: 2Ruubeni, Simiyooni, Leevi, Yuuda; 3Ezakaari, Zebulooni, na Bejami; 4Daani, Nafitaali, Gaati, na Asheeri. 5Ojama wa Yaakhumpa wooshi aalawaniyeeyo waari sapiyiini; ila Yuusufu aari Misuri ottuukho rakuzeene.
6Ziviriyeevo siikhu zawaatta, Yuusufu khufwa na attwiize apale na khapila yaya etile. 7Ila meezirayiilu apale aasaliyeeyo khuvokolelana khweekezeleya khwaattelana khwiiya okhomaala mpakha khufiyelela omwazeyela mmuti mphule wooshimo. 8Aphano Misuri khuthawala mfwalume mpheya, ahaari ojuwaaye hatha etthu monkoni wa Yuusufu. 9Aphano ye khuwooza atthu awe yoori: “Mwiwoone meezirayiilu pi awaattelana na ookhomaala zayita fweeyo. 10Nlaweni niwaalazele olavilavi yoori ahitepe waattelana, ehiri amana enipuwela viittha yo akusanyeya na maatuwi eetthu anirinkaanyela atthiramo mmuti mphu.”
11Aphano amisuri khuwaaretta yo wiiya anamalokozela a khaazi za nkuumu yoori apatthe owaahukhumu na khaazi zoolipa. Khwa etthiipo meezirayiilu khunjekela Firawuuna sitati piiri za sakafu zaari wiitthiwaaye Pito na Rameesi. 12Nakataalikha zaama aari ohukhumwiwaavo, pi aari otepaavo waattelana, tiito amisuri khuwaapattha woova mwaasa wa meezirayiilu. 13Aphano amisuri khwaaza owaakholisa khaazi zoolipa. 14Ohaayi aya khwiiya woowaawa, mwaasa wa okholisiwa khaazi zoolipa nkhama omeya ottophe na waattala khizolo, na okhola khaazi zooshi za mmashapa. Zooshi aari okholisiwa khwa oviitthwaana wootakhalavo.
15Mfwalume wa Misuri khuttakhulana anamavokoza a meepereewu aari wiitthiwaaye Siifwara na Puuwa yoori: 16“Amana mwiwaawunaka meezirayiilu atakhaka ovokola, mwisala mwiwoona aanaaya. Eeyaru aalume, mwisala mwiwoola, ila eeyaru aakha, mwisala mwiwaalikha wiiya haayi.” 17Khwa nanna zooshi, anamavokoza apale khumoova Nluku khuhiretti etile ooziweeyo ti mfwalume wa Misuri, khusala awaalikha aana alume wiiya haayi. 18Aphano mfwalume wa Misuri khuwaakhuwela khuwoozela yoori: “Mwari toovi, owaalikha aana aalume wiiya haayi?”
19Anamavokoza apale khujipu yoori: “Aakha a meezirayiilu afwarikhana na apa a Misuri. Yo pi oojikhitiri, ampattha ekumi ahinafiyevo hatha namavokoza.”
20Nluku khwiiya wemaani khwa anamavokoza apale, na meezirayiilu khusala avira eekezeleyaka wookhomaalavo. 21Mwaasa wa anamavokoza apale omoova Nluku, ye khuwenkha owahi wa wiiyana yo ojama aya.
22Tiito Firawuuna khuwaaruma atthu awe ooshi yoori: “Wakhula mwaana wa meepereewu anvokoliwaaye eeyaru wanlume amweeselele mmuttho oniitthiwaaye Niilu, ila eeyaru wankha asala anlikha.”
Currently Selected:
Olaawo 1: eko
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
