Khaazi 22

Paawulu vakatthi wa anamaphuka

1“Attwiizaku na apapazaku, mwisiileze ojaakisa waka vakatthi venu mweeyo.” 2Wakathi ansiliyeevo attakhulaka luuka ya meepereewu, atthu apale khutepa onyamala. Aphano Paawulu khusala alupa yoori:

3“Miiyo ki yaahuuti kivokoliweeyo Taarusu ya Siliisiya, ila kaleliwa sitati ethiiti. Kaari nashikola wa Kamaliyeele, khunozeliwa wookhomaalavo nkatthi wa haakhi za kano za amarehemu apapazetthu. Miiyo kaari woojithoonyeza mmakhono wa Nluku nkhama etthiipo mwiriizo mweeyo leelo. 4Kalupattha Tarikhi eti mpakha otapwatela, kiwaakholaka anamalottela aya alume na aakha na owaattha nkalapooso. 5Haakhimu nwulu wa tiini na khuntti yooshi ya attunkhulu a tiini mashaahiti aka; maana yo ti aari okinkhaaye warakha yoori kawenkhe anamalokozela a Tamaashiku, miiyo khulawa mpakha ottuukhu, oweettela atthu Yeruzaleemu nkhama anapherezu yoori ate ahukhumwiwe.

6“Kisaleelaka ofiya Tamaashiku ntarikhi wakathi opule wa saasiitha, nasaapiru nuuru khuluyeene ya otulu khwaara khukizukulela. 7Miiyo khukwela vathi khusala kisiila huula yaari okikhuwelaaye eraka: ‘Sawulu, Sawulu, onikilupatthela ni?’ 8Miiyo khumuuzela yoori: ‘O paani weeyo, Mbwana?’ Akijipwaka ari: ‘Miiyo ki Yinsa wa Nazareeti, othuuto weeyo oninlupatthaaye.’ 9Atthu apale aari vamote na miiyo ooniye nuuru etile, ila khuhisala asiila huula etile yaari ottakhulanaaye miiyo. 10Attaaphale miiyo khuuzela yoori: ‘Kiretteni Mbwanaaka?’ Mbwana khukuuza yoori: ‘Olankhe olawe Tamaashiku, ottuukho onttela wuuziwa etthu yooretta.’ 11Atthu apale aari vamote na miiyo khukikholela mpakha Tamaashiku, mwaasa wa nuuru etile yaakuuliye maasho.

12“Aariwo Mwinyi mmote wa ntiini aari wiitthiwaaye Ananiiya, wooshututela kano za Munsa na wooshitahiwa pi mayaahuuti. 13Khuta oteela okutthanana miiyo, khulupa yoori: ‘Ttwiiyaku Sawulu, woone!’ Wakathi otthuupule khwaaza omoona ye. 14Aphano ye khukuuza araka: ‘Nluku wa amarehemu apapazetthu oothawula weeyo yoori ojuwe matakhelo awe, omoone Nashariya na osiile huula yoolankha nkhanyo mwawe. 15Maana weeyo onttela wiiya shaahiti awe vakatthi wa atthu ooshi khwa epile wooniyeezo na osiiliyeezo. 16Aphano onrupazela ni? Olankhe olawe woosiwe na woose twampi zawo, okhuwelaka nzina lawe.’ 17Wakathi kiruteliyeevo Yeruzaleemu, keettaka olompa Nnyupa Woosifwiwamo, khukiteela jozi moote. 18Khumoona otule kaari ottakhulanaaye, khukuuza yoori: ‘Waakuve oleewo Yeruzaleemu, maana khanlawa okhupalela oshaahiti awo monkoni wa miiyo.’ 19Miiyo khujipu yoori: ‘Mbwana, atthu apa anjuwa yoori miiyo kaari oviraka mmasinakooka noowakhola apale ookhupaliyeeyo na owaajapha na owaattha nkalapooso. 20Wakathi ooliweevo Shiteevawu, alazaka oshaahiti awo, miiyo karivo attaaphale, kijipwelelisaka husuti etile na osalana kuwo za apale aari onhusutaaye.’ 21Attaaphale Mbwana khukuuza yoori: ‘Olawe, miiyo kinuuperekha peetiwene vakatthi wa amalapo.’ ”

Paawulu, nnyunti wa Rooma

22Yo khusala asiila mpakha olupa nttakhuzi nttinttho, atthaapale khwaaza onyakula araka: “Ooliiwe, khansuhi wiiya haayi.” 23Atthu apale eettaka okhuwa etthiipile, avulaka ajapi zaya na afuselaka lifufu otulu. 24Nttunkhulu wa anajanka khuruma olokoziwa Paawulu puuro yookhomaaziwa yoori alawe ajaphiwe na oozeliwaka ajuwe niini atthu aari onyakulelaaye mwaasa wa ye. 25Eettaka onfuka yoori anjaphe, Paawulu khumuuza namalokozela wa anajanka otule aari attaaphale araka: “Enretteya onjapha nrooma mwihaazeeni onfiisa wa namaphuka?” 26Asiiliyeevo mattakhuzi apale namalokozela wa anajanka khumweettela nttunkhulu otule nkina khumuuza yoori: “Ontakha orette ni? Mwinyi aya otu nnyunti wa Rooma!” 27Nttunkhulu wa anajanka khulawa aphale aariivo Paawulu khumuuzela yoori: “Nkakuuze, weeyo onnyunti wa Rooma?” Ye khujipu araka: “Aayo, kiwoottuukho.” 28Aphano nttunkhulu otule khuri: “Na miiyo ki othuuto karipha nzurukhu wa waatta yoori kipatthe wiiya nnyunti.” Paawulu khujipu yoori: “Ila weekhweele miiyo kinnyunti ovokoliwa.” 29Nasaapiru, khumwaattuwa ooshi apale aari omuuzelaaye. Na nttunkhulu otule khwiiya wa woova paata ya ojuwa yoori Paawulu nnyunti wa Rooma.

30Aphano mmeesho mwaya nttunkhulu otule aari otakha ojuwa saaneene niini mayaahuuti aari onlokovezelaaye Paawulu. Khunfukulela na khurumisa okhuweliwa mahaakhimu a tiini na Mashawuriiya aya ooshi. Khuruma otiisiwa Paawulu khunttha vakatthi vaya.

Currently Selected:

Khaazi 22: eko

Highlight

Compare

Copy