RUT 1
1
Rutmandapash, Noemimandapashmi villajun
1Juezcuna mandajui punllacunapimi, cashna tucurca: Israel llactapica ninan yarjaimi japirca. Chaimandami, Judá llactapi tiaj Belén pueblomanda shuj runaguca, paipaj huarmindi, paipaj ishcai churicunandi, Moab llacta pambacunapi causangapaj rirca. 2Chai runagupaj shutica, Elimelecmi carca. Paipaj huarmica, Noemí shutimi carca, paipaj churicunaca Mahlón shuti, Quelión shutimi carca. Paicunaca, Judá llactapi tiaj Belén pueblomanda efrateo puracunami carca. Moab pambacunaman chayashpaca, chaipi causangapajmi quedarca. 3Chaipica, Noemipaj cusa Elimelec huañujpimi Noemica, pailla paipaj ishcai churicunahuan quedarca. 4Chai churicunaca, moabitapura huarmicunahuanmi cazararca. Chai huarmicunaca, shujca Orfa shuti, caishujca Rut shutimi carca. Chaipimi paicunaca, chunga huatatashna causanajurca. 5Mahlonbash, Quelionbashmi huañurca. Chaimandami Noemí huarmiguca, paipaj ishcandi churicunapash, cusapash huañujpi pailla causajurca. 6Noemica, Moab pambacunapi cashpami, cashna nijta uyarca: “Mandaj Diosca, pai agllashcacunata llaquishpa ricushpami, granocunata cutin fucuchijun” nijtami uyarca. Shina uyashpami, paipaj jachungunandi jatarishpa, Moab pambacunamanda tigrarca. 7Noemica, pai causajushca pushtumandami ishcandi jachungunandi llujshishpa, Judá llactaman tigrangapaj ri callarirca. 8Ña rinajushpami Noemica, paipaj ishcandi jachungunataca, cashna nirca: —Cangunapaj mamacunapaj huasiman tigrapaichilla. Cangunaca, huañushca ñuca churicunahuan, ñucahuambash aligutami causarcanguichi. Mandaj Diospash, chashnallata cangunata llaquipachun. 9Shinallata canguna cutin cazarashpa, cangunapaj cusacunapaj huasipipash aliguta causanata, Mandaj Diosca carashpami ali canman— nircami. Shina nishpallami Noemica, muchashpa cayacaman nirca. Ashtahuangarin paicunaca, shinllita huacashpami: 10—Ñucanchica, canhuambachami cambaj llactaman ringapaj munapanchi— ninajurca. 11Shina ninajujpimi Noemica, cashna nishpa tigrachirca: —Ñuca huahuacunalla, tigrapaichilla. ¿Imapajta ñucahuanga ringuichiyari? Cangunahuan cazarachunga, na ashtahuan huahuacunata ñuca vijsapi charinichu. 12Ñuca huahuacunalla, tigrapaichilla. Ñucaca, cutin cazarangapajpash ñami paya cani. Cunan tutallata cusata tarishpa, huahuacunata charisha yajunimi nijpipash, 13cangunaca ¿paicuna viñajpi cazarangapaj shuyanguichimanllu? ¿Paicunata juyaimandalla, na cazarashpa shuyanguichimanllu? Ñuca huahuacunalla, na chashna ruranachu canguichi. Mandaj Diospaj maquihuan ñucata llaquichijpimi, cangunatapash yali jatun llaquita apajuni— nircami. 14Cutinllatami paicunaca, shinllita huacanajurca. Shina cashpapash Orfa huarmica, paipaj suedrata muchashpaca rircallami. Ashtahuangarin Rutca, paihuanmi quedarca. 15Shinamandami Noemica, cashna nirca: —Ricui, cambaj jachun purapash, ñami paipaj llactaman, paipaj dioscunapajman tigrajun. Cambash, paita catishpa ripailla— nircami. 16Shina nijpimi Rutca, cashna nishpa tigrachirca: —Ama canda saquishpa, canmanda anchurishpa richun mañahuaichu. Can maiman rijpipash, ñucapashmi risha. Can maipi causajpipash, chaipimi causasha. Cambaj llactapash, ñuca llactami canga. Cambaj Taita Diospash, ñuca Taita Diosmi canga. 17Maipi can huañujpipash, chaipillatami ñucapash huañushpa pambai tucusha. Canda saquishpa rijpica, Mandaj Diosllata ninandapacha llaquichihuachun. Ñucanchi ishcandimandaca, huañushpallami shicanyashun— nijurcami. 18Paihuan rinayachijujtapacha ricushpami Noemica, na imatapash ashtahuan nirca. 19Paicunaca, Belén puebloman chayangacamanmi, ishcandi rinajurca. Belenman ña chayajpimi, cashna tucurca: Chai llactapi causajcunaca, tucuicunami paicuna chayajta ricushpa manllarinajurca. Shina manllarishpami: —¿Nachu caica Noemí?— nishpa tapurinajurca. 20Shina ninajujpimi Noemica, cashna nijurca: —Noemí#1:20 Noemí nishpaca: «Mishquillagu» nijunmi. nishpaca, na rimanachu cahuanguichi, Mara#1:20 Mara nishpaca: «Jayaj» nijunmi. nishpa rimahuaichi. Tucui Ushaita Charij Diosca, jatun llaquitami ñucaman cuhuashca. 21Caimanda llujshishpa rishpaca, ashtacatami apashpa rircani. Ashtahuangarin Mandaj Diosca, chushaj maquihuanmi tigrachimuhuashca. ¿Imashpata Noemí nihuanguichi? Mandaj Diosca, ñucata llaquichinatami villashca. Tucui Ushaita Charij Diosmi, ñucataca llaquichihuashca— nijurcami. 22Chashnami Noemica, Moab pambacunamandaca moabitapura paipaj jachun Ruthuanga tigramurca. Cebadata cozechana punllacuna chayashcapimi, Belenman chayamurca. Rutca, Booz shuti runapaj alpapimi cebadata pallajushca
Currently Selected:
RUT 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.