JUECES 21
21
1Israel runacunaca, Mizpa shuti pueblopimi cashna nishpa juramentushca carca: “Ñucanchi puramandaca, maijanllapash ñucanchi ushicunataca, Benjamín aillu runacunapaj huarmi cachunga, na cushunllu” nishcami carca. 2Gentecunaca, Taita Diospaj huasiman shamushpami, Taita Diospaj ñaupajpi ninanda caparishpa tutayangacaman huacashpa, cashna ninajurca: 3“Israelcunata Mandaj Taita Dioslla. Israel puracunapaj shuj aillu illaj quedangapaca, ¿imashpata ñucanchi Israel purapica, cashna tucushcayari?” ninajurcami. 4Chai cayandi punllapimi gentecunaca, tutamandata jatarishpa, chaipillata shuj altarta ruranajurca. Chai jipami, Diosman animalcunata cushpa tucuillata rupachinajurca. Shinallata Dioshuan ali cangapaj shuj caranacunatapashmi caranajurca. 5Chai jipami israelcunaca, cashna ninajurca: “Tucui Israel aillu puramandaca, ¿maijan ailluta Mandaj Diospaj ñaupajpi tandanajungapaj, na vichai shamushca? Mizpa shuti puebloman, Mandaj Diospajman maijambash na vichai shamujpica: ‘Huañuchishumbacha’ nishpami, alipacha juramenturcanchi” ninajurcami. 6Shinallata tucuilla israelcunami, paicunapaj huauqui Benjamín aillumandaca, ninanda llaquirishpa cashna ninajurca: “Cunanga, Israel puramandaca, shuj aillumari anchuchi tucushca. 7Ñucanchica, Mandaj Diospaj shutipimi, cashna nishpa juramenturcanchi: ‘Benjamín aillu runacunapaj huarmi cachunga, ñucanchi ushicunataca na cushunllu’ nircanchimi. Chai huaquin puchushca runacunataca, ¿maijan huarmicunahuanshi cazarachishun?” ninajurcami. 8Cashnatapashmi ninajurca: “Ñucanchi Israel aillu puramandaca, ¿maijan aillupash na shamushpa quedashcachu?” nishpami tapunajurca. Shina tapushpami, Galaad llactapi tiaj Jabes shuti pueblopi causajcunamandaca, shujllapash na shamushcata tarirca. 9Tucuicunata cuentajpica, Galaad llactapi tiaj chai Jabes shuti pueblopi causajcunaca, shujllapash na ricurircachu. 10Chaimandami chai tandanajushca gentecunaca, chunga ishcai huaranga ashtahuan shinlli runacunata cashna nishpa cacharca: “Galaad llactapi tiaj Jabes shuti pueblopi causajcunataca, huarmicunandi, huahuacunandi, espadahuan chugrichishpa huañuchigrichi. 11Ashtahuangarin cashnami rurana canguichi: Tucuilla jaricunatapash, jarihuan ña tacarishca tucuilla huarmicunatapash huañuchina canguichi” ninajurcami. 12Galaad llacta Jabes shuti pueblopi causanajuj puramandaca, jarihuan nara tacarishca chuscu patsaj cuitsacunatami tandachinajurca. Paicunataca, Canaán llactapi carpacunata shayachishca tianajuj Silo shuti pueblomanmi pushamunajurca. 13Chai jipami, tandanajushca tucui israelcunaca, Rimón shuti jaca rumi ladopi tianajuj Benjamín aillupaj miraicunahuan parlachun cacharca. Paicunataca, casilla aligutami pusharca. 14Shina cachajpimi, Benjamín aillu runacunaca, israelcunapajman tigramurca. Paicunataca, Galaad llacta Jabes shuti pueblopi causajcunata huañuchishca puramanda pushamushca huarmicunahuanmi cazarachirca. Ashtahuangarin huarmicunaca, tucuicunahuan cazarachingapaca na pactarcachu. 15Israel aillu puramandaca, patata t'uninshna Mandaj Dios anchuchishcamandami, israelcunaca Benjamín ailluta ninanda llaquinajurca. 16Shinamandami, tandanajushca puramanda mandaj rucucunaca, cashna ninajurca: “Cunanga, chai aillu puramanda puchushca runacunataca, ¿maijan huarmicunahuanshi cazarachishun? Benjamín aillu huarmicunaca, huañuchi tucushcamari” ninajurcami. 17Cashnatapashmi ninajurca: “Israel aillu puramanda shuj aillullapash ama chingachunga, Benjamín aillu puramanda puchushca cai runacunallapash, alpata japishpami ali canman. 18Shina cashpapash ñucanchi ushicunataca, napacha paicunahuan cazarachi ushashunllu. Israelcunaca: ‘Benjamín aillu runacunahuan maijambash cazarachishpaca, jatun llaquita apachun’ nishpami juramenturcanchi. 19Cunanga uyaichi. Silo shuti pueblopimi, Mandaj Diosman jatun fiestata huatapi huatapi ruran. Chai puebloca, Bet-el shuti pueblo janaj ladomanmi. Bet-el shuti pueblomanda, Siquem shuti puebloman rina ñanmandaca, indi huashajuj ladomanmi. Shinallata Lebona shuti pueblomandaca, urai ladomanmi” ninajurcami. 20Chashna ninajushpami, Benjamín aillupaj miraicunataca, cashna nishpa mandanajurca: “Uvas chagracunapi pacalla chapagrichi. 21Chaipica, Silo shuti pueblopi causajcunapaj ushicuna tandanajushca bailangapaj llujshinajujta, ali ricurianguichi. Ña llujshijpica, pacajushpa tianajushcamanda llujshishpa, tucuicuna chai cuitsacunata, cangunapaj cachun shuj shuj shuhuashpa, canguna causanajuj Benjamín llactaman tigranguichilla. 22Canguna shuhuashcamanda, chai cuitsacunapaj taitacuna, na cashpaca turicuna ñucanchita imatapash nij shamujpica, cashnami nishun: ‘Paicunahuan cazarachun saquipaichilla. Ñucanchimi, jatun macanajuiman rishpapash, huarmicunataca na tucuillaman apamushcanchi. Ashtahuangarin paicunapaj huarmi cachunga canguna cushca cashpachu, cangunaca juchachi tucunguichiyari’ nishunmi” ninajurcami. 23Shina nijpimi, Benjamín aillupaj miraicunaca, paicuna mashna cashcashnallata, chai pueblopi danzangapaj llujshishca cuitsacunataca, shuj shuj shuhuashpa, paicunapaj llactaman tigranajurca. Chai jipami, paicunapaj pueblocunata alichishpa, chaipillata causai callarirca. 24Shinallata caishuj israelcunaca, tucuicunami chaimandaca paicunapaj aillu purapajman, paicunapaj familiacunapajman rinajurca. Chaimanda llujshishpaca, tucuicunami paicunapaj alpacunaman rinajurca. 25Chai punllacunapica, Israel llactapica jatun mandaj na tiarcachu. Chaimandami, tucuicuna paicuna munashcata rurashpa causanajurca.
Currently Selected:
JUECES 21: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.