NÚMEROS 1
1
Mashna israelcuna tiajta yachangapajmi, Sinaí urcu ladopi cuentashca
1Mandaj Diosca, Sinaí shuti jichushca pambapi paihuan tuparina jatun carpapimi, israelcuna Egipto llactamanda llujshimushcapash, ña ishcai huata, ishcai quilla callari punllapi, Moisesman cashna nishpa villajurca:
2“Tandanajushca tucuilla israelcuna mashna tiajta yachangapaca, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi cuentaichi. Tucuilla jaricunata cuentashpa, shuticunata japinguichi. 3Israel puramanda jatun macanajuiman ri ushana tucuilla soldadocunata, ishcai chunga huatata charijmanda vichaiman, paicunapaj soldadocuna imashna tandanajushcapi cambash, Aaronbash cuentaichi. 4Cada ailluta shuj mandajmi, cangunataca ayudanga. Chai mandajcunaca, paicunapaj punda taitacunapaj mirai familiacunata mandajcunami canga. 5Chai mandajcunapaj shuticunaca, caicunami canga:
Rubén aillumandaca, Sedeur runapaj churi Elisur shuti runami canga.
6Simeón shuti aillumandaca, Zurisadai shuti runapaj churi Selumiel shuti runami canga.
7Judá aillumandaca, Aminadab shuti runapaj churi Naasón shuti runami canga.
8Isacar shuti aillumandaca, Zuar shuti runapaj churi Natanaelmi canga.
9Zabulón shuti aillumandaca, Helón shuti runapaj churi Eliab shuti runami canga.
10Josepaj ishcai churicunapaj aillucunamandaca, caicunami canga: Efraín aillumandaca, Amiud shuti runapaj churi Elisama shuti runami canga. Josepaj churi Manasés aillumandaca, Pedasur shuti runapaj churi Gamalielmi canga.
11Shinallata Benjamín aillumandaca, Gedeoni shuti runapaj churi Abidán shuti runami canga.
12Dan shuti aillumandaca, Amisadai shuti runapaj churi Ahiezer shuti runami canga.
13Aser shuti aillumandaca, Ocrán shuti runapaj churi Pagiel shuti runami canga.
14Gad shuti aillumandaca, Deuel shuti runapaj churi Eliasaf shuti runami canga.
15Neftalí shuti aillumandaca, Enán shuti runapaj churi Ahira shuti runami canga” nijurcami.
16Chai runacunami, tandanajushca Israel puramandaca, paicunapaj punda taitacunapaj mirai aillucunapaj mandajcuna carca. Paicunami, chai tucui huaranga huaranga Israel soldadocunata mandajcuna carca. 17Chai mandajcunapaj shuticunata escribishpa churai tucushca runacunatami, Moiseshuan, Aaronhuan japinajurca. 18Ishcai quillapaj punda punllapica, tandanajushca tucuilla israelcunatapashmi tandachinajurca. Paicunapaj familiacuna, paicunapaj punda taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami, ishcai chunga huatata charijmanda vichaiman tandachinajurca. 19Mandaj Dios imashna Moisesta mandashcashnallatami, Sinaí shuti jichushca pambapi paicunataca cuentarca.
20Taita Israelpaj punda churi Rubenbaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 21Rubén aillu puracuna cuentai tucushcacunaca, 46.500 runacunami carca.
22Simeonbaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 23Simeón aillu puracuna cuentai tucushcacunaca, 59.300 runacunami carca.
24Gad shuti runapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 25Gad shuti aillu puracuna cuentai tucushcacunaca, 45.650 runacunami carca.
26Judá shuti runapaj churicunapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 27Judá aillu puracuna cuentai tucushcacunaca, 74.600 runacunami carca.
28Isacar shuti runapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 29Isacar aillu puracuna cuentai tucushcacunaca, 54.400 runacunami carca.
30Zabulón shuti runapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuillata cuentarca. 31Zabulón aillu puracuna cuentai tucushcacunaca, 57.400 runacunami carca.
32Josepaj churi puramanda, Efrainbaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuillata cuentarca. 33Efraín aillu puracuna cuentai tucushcacunaca, 40.500 runacunami carca. 34Manasespaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 35Manasés aillu puracuna cuentai tucushcacunaca, 32.200 runacunami carca.
36Benjaminbaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata cuentarca. 37Benjamín aillu puracuna cuentai tucushcacunaca, 35.400 runacunami carca.
38Dan shuti runapaj churicunapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 39Dan shuti aillu puracuna cuentai tucushcacunaca, 62.700 runacunami carca.
40Aser shuti runapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 41Aser shuti aillu puracuna cuentai tucushcacunaca, 41.500 runacunami carca.
42Neftalí shuti runapaj churicunapaj miraicunataca, paicunapaj miraicuna, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi, paicunapaj shuticunata japishpa, imashna shuj shuj cuentashcashnallatami cuentarca. Paicunataca, ishcai chunga huatata charijmanda callarishpami, jatun macanajuiman ri ushanacunataca, tucuilla jaricunata cuentarca. 43Neftalí aillu puracuna cuentai tucushcacunaca, 53.400 runacunami carca.
44Chai tucui runacunami cuentai tucurca. Paicunataca Moiseshuan, Aaronhuan israelcunata mandaj chunga ishcai runacunahuanmi cuentanajurca. Chai chunga ishcai runacunaca, paicunapaj ñaupa taitacunapaj cada huasi ucu puramandami, shuj shuj agllai tucurca. 45Jatun macanajuiman ri ushana israelcunataca, ishcai chunga huatata charijmanda callarishpami, paicunapaj ñaupa taitacunapaj huasi ucu puracuna imashna tandanajushcapi cuentanajurca. 46Tucuilla cuentai tucushcacunaca, 603.550 runacunami carca.
Levitacunataca, paicuna ruranacunapimi churashca
47Levitacunaca, paicunapaj punda taitacunapaj aillucuna imashna tandanajushcapi, Israel puracunapica na cuentai tucunajurcachu. 48Mandaj Diosca, Moisesmanmi cashna nishpa villajurca: 49“Leví runapaj aillutallami, na cuentana cangui. Israelcunata cuentanajushpapash, paicunataca na cuentanachu cangui. 50Ashtahuangarin levitacunataca, ñuca escribichishca shimicunata alichina arca tiajuj ñucapaj jatun carpata, shinallata chai carpa ucupi tucui imalla tiajcunatapash ricunajuchun churangui. Paicunami, ñuca jatun carpataca, chaipi tucui ima tiajcunandi apanajunga. Chai carpapi imata ruranacunatapash, paicunami ruranajunga. Paicunaca, chai carpa muyundipimi causanajunga. 51Ñucapaj jatun carpata shujman apana cajpipash, levitacunami pascashpa apanajunga. Chai carpata maipi shayachina cajpipash, levitacunami shayachinajunga. Na rijsishca runa chai carpaman chayashpaca, huañungami. 52Israelcunaca, tucuicunami paicunapaj soldadocuna imashna tandanajushcapi paicunapaj bandera ladopi carpacunapi tianajunga. 53Ashtahuangarin levitacunaca, ñuca escribichishca shimicunata alichina arca tiajuj ñuca jatun carpata cuidashpami, muyundipi causanajunga. Chashna cuidanajujpimi, tandanajushca israelcunataca na fiñasha. Chaimandami levitacunaca, ñuca escribichishca shimicunata alichina arca tiajuj ñucapaj jatun carpata cuidanajunga” nijurcami.
54Mandaj Dios imashna Moisesta mandashcashnallatami israelcunaca, tucui imatapash chashnatapacha ruranajurca.
Currently Selected:
NÚMEROS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.