EFESIOS 1
1
Alillachu capanguichi nishcami
1Taita Dios munajpi, Jesucristo villachun cachashca Pablomi cani. Caitaca, Efeso pueblopi Taita Diospajlla causanajuj, Cristo Jesusta aligutapacha cazushpa pactachijcunamanmi escribini. 2Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munani.
Cristomandami bendiciai tucushcanchi
3Ñucanchi Apunchi Jesucristopaj Taita Diosca, aligumari cangui ni tucushca cachun. Cristomandami Diosca, ñucanchita jahua pachamanda ninanda bendiciashca. 4Diosca, cai pachata nara rurashpallatami ñucanchitaca, ima nalitapash ama rurashpa, paipajlla causachun, ama mapayashpa causachun Cristomanda agllarca. 5Paillatami, ñucanchitaca pundamandapacha juyashpa, Jesucristomanda paipaj huahuacunapacha cachun, paillata agllangapaj munashpa agllarca. 6Paipaj juyashca Churimandami, punchapamba Diosca ñucanchita ninanda juyashpa chasquirca. Paita ninanda alicachinajuchunmi chasquirca. 7Jesucristopaj yahuarmandami, Diosca ninandapacha juyashpa, ñucanchipaj juchacunataca anchuchishpa quishpichirca. 8Shina juyashpami, ali yachaita, ali yuyaita charichumbash, ninan ushaita caramujun. 9Shina caramushpami, ali munaita pai charinshnallata, pacalla yarijushcata rijsichirca. Chaita ruranataca, paillatami yarijushca carca. 10Diosca, pai munashcata rurana huatacuna chayamujpica, jahua pachapi tiajcunahuan, cai pachapi tiajcunahuambashmi, tucuillata tandachishpa, Cristo mandashpa tiajuchun churanga.
11Paihuan shujlla tucushpami, Dios carajpi japircanchi. Ñucanchi chaita japichunga, Diosmi pundamandapacha munashpa, paillata pactachijun. 12Punchapamba Diosta ñucanchi alicachishpa causachunmi, chashna pactachijun. Cristotaca pundamandapachami shuyanajurcanchi. Ñucanchimi, chashna alicachina canchi. 13Quishpirinamanda ali villaita villajuj, na llullaj Shimitaca cangunapash uyashpami, Cristotaca crircanguichi. Shina crijpimi, carashapachami nishca paipaj jucha illaj Espirituhuan sellai tucushca canchi. 14Chai Espiritumi, Dios quishpichishcamanda ñucanchi imata japigrinatapash ricuchijun. Punchapamba Diosta alicachishpa causanatami ricuchijun.
Ali yachaita, imatapash ricuchij Espiritumi caramujun
15“Apunchi Jesusta alipacha crishpami, Diospajlla causajcunatapash tucuicunata juyanajun” nijtami cangunamandaca uyarcani. 16Chaimandami cungaitapash na cungashpa, na shaijushpa cangunamandaca, Diosta pashi nishpa mañajunilla. 17Ñucanchi Apunchi Jesucristopash, punchapamba Taita Diospash, canguna paita ashtahuan ali rijsichun, ali yachaita imatapash ricuchij Espirituta carachunmi mañajuni. 18Imaguta canguna japigringapaj shuyanajuchun, Dios agllashcatapash yachashpa, cangunapaj yuyaita punchayachijuchunmi mañajuni. Shinallata paipajlla causajcunaca, Diospaj punchapamba llactagupi imata japigrinatapash yachachunmi, chashna mañajuni. 19Ñucanchica, paita crijcuna cajpimi, imata rurachumbash, paipaj jatun ushaitapacha ninanda caramujun. Diosca, jatun ushaita charishcata ricuchingapajmi, 20Cristotaca, huañushcacunapaj chaupimanda causachirca. Shina causachishpami, jahua pachaman pushashpaca, paipaj ali ladoman tiachirca. 21Cristoca, mandajcunatapash, ushaita charijcunatapash, jatun mandajcunata, cati mandajcunatapash, tucuita mandangapajmi chashna tiarirca. Na cunan punllacunapilla mandajungachu, ashtahuangarin shamui punllacunapipashmi tucuita mandajunga. 22Tucui ima tiajtapash sarunshna mandachunmi, Diosca Cristoman ushaita cararca. Shina tucuita mandajushpa, tandanajuj crijcunatapash umashna mandachunmi, paiman ushaita cararca. 23Tandanajuj crijcunaca, tucui maipipash paillata junda Cristopaj cuerposhnami.
Currently Selected:
EFESIOS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.