CANTARES 8
8
1¡Canga, ñuca mamapaj chuchunatallata chuchushca ñuca turishna cashcanguiman! Shina cajpica, canllapi tuparishpapash muchaimanllami. Chashna cajpica, ñucataca na yangapi churanajunmanllu. 2Canda pushashpaca, ñuca mamapaj huasimanmi apaiman. Canmi ñucataca, imata cashpapash yachachihuanguiman, ñucaca vinotami canman ufiachiman. Shinallata granadillacunata capishpami, llullu vinotapash ufiachiman. 3Paipaj lluqui lado rigrata saunachishpa, paipaj ali lado rigrahuanga, ugllashpami ali cahuanman. 4Jerusalenbi causaj, jarihuan nara tacarishca cuitsacunalla, cashna nishpami ari nichini: Juyaitaca, pai munashcacaman puñujuchun, na rijchachinachu canguichi. Juyaica, ninan ushaitami charin 5Paipaj juyashcapaj rigra jahuapi siririshpa, ¿jichushca pambamanda vichai rijuj huarmica maijandayari? Manzana yura ucupimi, candaca rijchachircani. Chaipimi cambaj mamataca, unguna nanai japirca. Chaipimi, canda unguj mamataca nanai japirca. 6Cambaj shungupica, sellashcashna charihuayari. Cambaj rigrapica, señaltashna charihuayari. Juyaica, huañuishnallata ushaitami charin. Paipajlla cachun munaicunaca, Seol na cacharinshnami. Ninayashca paipaj carbongunaca, ninandapacha rupajuj carbonshnami. 7Juyaitaca, ashtaca yacucunapash napacha huañuchi ushangachu. Jatun yacucunapash na quilpai ushangachu. Chai juyaimandaca, huasipi tucui imatalla charishcacunata shuj runa cungapaj munajpipash, chaitaca yangapipachami churanman. 8Chuchucunapash nara viñashca, uchilla ñañagutami charinchi. Maijambash paita cazarangapaj munashpa parlajpica ñucanchi ñañataca, ¿imatashi rurashun? 9Pai jatun pirca cajpica, paipaj jahuapimi, mandashpa tiajuna huasita, culquita churashpa ruranchiman. Pungu cajpica, cedro caspicunahuanmi juyaillaguta churanchiman. 10Ñucaca, jatun pircashnami cani. Ñuca chuchucunaca, torrecunashnami. Chaimandami paipaj ñaupajpica, casilla ali causaita tarircani. 11Salomonga, Baal-hamón shuti pushtupica, uvas chagratami charirca. Chaitaca, cuidajcunamanmi cuidachun mingarca. Paicunaca, tucuicunami fucushca uvasmandaca, huaranga culquita apamuna carca. 12Ñuca uvas chagraguca, ñucapaj cashpami ñuca ñaupajpi tiajun. Salomonlla, huaranga culquica cambajmi canga. Ishcai patsaj culquica, uvas fucushcata cuidajcunapajmi canga. 13Huertacunapi causaj huarmilla. Can rimashcataca, cambaj cumbacunami uyanajun. Can rimashcataca, ñucamambash uyachihuayari. 14Ñuca juyashcagulla, ucha shamupailla. Canga, corzo nishca animalshna, maltun tarugashna, mishquilla ashnajuj jambicuna viñashca urcucunata ucha shamupailla.
Currently Selected:
CANTARES 8: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.