PROVERBIOS 6
6
Ama quillanayachishpa, ama llullashpa causachunmi shinlli tacurishca
1Ñuca huahualla, cambaj cumba runagupaj cashpa,
na rijsishca runapaj cashpapash, garante tucurcanguichari.
2Chaita ari nishca cashpaca, cambaj shimi rimashcahuanllatami,
lazupishna japi tucushcangui.
Cambaj shimi rimashcahuanllatami,
prezu japi tucushcashna quedashcangui.
3Ñuca huahualla, cunanga cashna rurashpa cachariri:
Chashna rurashpa cambaj cumba runagupaj maquipi
urmashcallata cashpaca, cambaj cumbapajman
rishpa, paipaj ñaupajpi cumurishpa, chaitaca
paillata alichijuchun parlajuilla.
4Ashatallapash ama puñuichu.
Cambaj ñavi puñunayachijpipash, ama saquichu.
5Huañuchij runapaj maquimanda taruga cacharirinshna,
lazumanda urpi llujshishpa calpanshna ucha cachaririyari.
6Imata ruranatapash na munaj
runalla, añangucunata ricuyari.
Paicuna imata ruranajujta ricushpa yachajuyari.
7Paicunaca ñaupashpa pushajtapash,
mandajtapash, amotapash na charinllu.
8Paicuna micushpa causangapaca, cozechana rupai
punllacunapimi micunata tandachishpa alichinajun.
9Imata ruranatapash na munaj runalla,
¿ima horascamanda puñujugringuilla?
¿Ima horasta rijcharishpa jatarigringui?
10Ashata samashpa, ashata puñushpa,
ashata samangapaj maquita cruzashpami sirijungui.
11Chashna sirijujpillatami, imapash illaj
tucunaca, purij runashna chayamunga.
Imagutapash na charij canaca, macanajunacunahuan
alichirishca runashnami chayamunga.
12Nali shungu, huagli runaca, jatun
nalitalla parlashpami purin.
13Ñavita capitsishpa, chaquita cuyuchishpa,
maqui dedohuan ricuchishpami, señasta ruran.
14Paipaj shungupica, jatun nalitallami yarijun.
Tucui causaipimi, ima llaquitapash
ruranatalla yariashpa purijun.
Fiñanajuicunapi churashpami purijun.
15Chashna nalita ruraj runataca,
cungashcapimi ninan llaqui japinga.
Ñapash chingachi tucujpimi,
pipash na ayudai ushanga.
16Mandaj Diosca nalita rurashcataca,
cai suctatami ninanda fiñan, canchistacarin
paipaj shungupica ninandapachami millanayachin:
17Jariyashpa purijta, llullashpa parlaj
jalluta, ima nalitapash na ruraj runata
huañuchishpa yahuarta jichajtami ninanda millanayachin.
18Nalita ruranatalla yarishpa purijta,
nalita rurangapaj calpajta,
19ricurcanimi nishpa llullashpa villajta,
huauqui puratallata fiñanajuipi
churajtapashmi, ninanda millanayachin.
Cazarashca jahua shujcunahuan causajcunatami shinllita tacurishca
20Ñuca huahualla, cambaj taita mandashcataca cazungui.
Cambaj mama yachachishcatapash, ama cunganguichu.
21Chaicunataca, cambaj shungupi
huatashcashna tucui causaipi charingui.
Cungapi huatarishcashna puringui.
22Chaicunaca, can maita purijpipash, aligutami pushanga.
Can puñujujpipash huacaichingami.
Ña rijcharijpipash, cambaj yuyaipimi rimanajunga.
23Mandashcapash micha lamparashna cashcamanda,
yachachishcapash michashna cashcamandami, chashna canga.
Jarcashpa rimashpa yachachishcacunapash,
causaiman apaj ñanmi canga.
24Nalita ruraj huarmimanda jarcangapajmi ali canga.
Na rijsishca huarmi, mishquilla shimicunahuan
rimashcamandapash jarcangami.
25Chai huarmitaca juyailla cajpilla,
pactara shungupillapash munanguiman.
Paipaj ñavihuan ricunman quedashpa,
prezunshna canda japichumbash ama saquinguichu.
26Culquimanda huainayaj huarmihuan
purij runaca, faqui tandashnami quedan.
Cusayu huarmicarin, jaripaj ninan valishca
almagutapash huañuiman chayachinllami.
27Runaca, ninata migllashpaca, ¿pai
churajushca na rupajpi charijunmanllachu?
28Runaca, carbón ninayashca jahuataca,
¿chaquita na rupachishpa purinmanllachu?
29Cumba runagujpaj huarmipi chayashpaca,
chashnallatami tucun.
Maijambash chashna chayashpaca,
llaquita apangapachami.
30Maijambash yarjachijushpa micunata
shuhuashpa micujpica, na fiñanllu.
31Ashtahuangarin shuhuajushpa japi tucushpaca,
canchiscaman mirachishpami tigrachinga.
Paipaj huasipi tucui charishcatapashmi cuna tucunga.
32Ashtahuangarin cazarashca jahua shujcunahuan
causajcunaca, ali yuyaita na charinllu.
Chaita rurashpaca, paipaj almatamari chingachin.
33Chugrichi tucunata, pingai tucunatallami taringa.
Rimashpa pingaichi tucushcapash, napacha chingangachu.
34Cusaca, huarmita juyaimandami ñapash fiñaringa.
Paita llaquichishcashnallata llaquichijui punllapica,
napacha cungashpa saquingachu.
35Ali tucungapaj munashpa imata
cujujpipash, napacha japingachu.
Caranacunata ashtahuan mirachijpipash,
napacha cungashpa saquingachu.
Currently Selected:
PROVERBIOS 6: QUII
Highlight
Copy
Compare
Share
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
